નવી દિલ્હી :છેલ્લા બે અઠવાડિયાથી યમનના હોદેદાહ અને સનામાં ફસાયેલા ૧૯ ભારતીય ખલાસીઓને સુરક્ષિત રીતે બચાવી લેવામાં આવ્યા છે અને તેઓ ઘરે પરત ફરી રહ્યા છે. યમનમાં ભારતીય દૂતાવાસે એક પોસ્ટમાં જણાવ્યું હતું કે, "બધા ખલાસીઓ સલામત અને સ્વસ્થ છે અને ભારત પરત ફરી રહ્યા છે. દૂતાવાસે અમારા નાગરિકોને બહાર કાઢવામાં તેમના મૂલ્યવાન સહયોગ અને સતત સમર્થન બદલ તમામ સંબંધિતોનો હૃદયપૂર્વક આભાર માન્યો છે." ભારતે જણાવ્યું હતું કે યમનના દરિયાકાંઠે એક બોટમાં સવાર ૧૪ ભારતીય નાગરિકો સુરક્ષિત છે. જોકે, બચાવાયેલા ૧૯ ખલાસીઓમાં ૧૪ ભારતીય ખલાસીઓ હતા કે કેમ તે તાત્કાલિક સ્પષ્ટ થયું નથી.