નવી દિલ્હી, તા.૨૧: વર્ષ ૨૦૧૬ના બહુચર્ચિત સૂરજગઢ આયર્ન ઓર ખાણ આગચંપી કેસમાં જેલમાં બંધ એડવોકેટ સુરેન્દ્ર ગાડલિંગની જામીન અરજી પર સુપ્રિમ કોર્ટમાં સુનાવણી ફરી એકવાર ટળી છે. સુપ્રિમ કોર્ટના ન્યાયાધીશ જસ્ટિસ શ્રી ચંદ્રશેખરે મંગળવારે આ કેસની સુનાવણીમાંથી પોતાને અલગ (Recuse) કરી લીધા છે. આ કેસની સુનાવણીમાંથી હટનારા તેઓ ત્રીજા ન્યાયાધીશ બન્યા છે.

આ મામલો જસ્ટિસ પ્રશાંત કુમાર મિશ્રા અને જસ્ટિસ શ્રી ચંદ્રશેખરની બેન્ચ સમક્ષ સુનાવણી માટે આવ્યો હતો. રાષ્ટ્રીય તપાસ એજન્સી (NIA) ના વકીલે પાસઓવર માગ્યો હતો, પરંતુ જસ્ટિસ મિશ્રાએ સ્પષ્ટ કર્યું કે આ કેસ હવે અન્ય બેન્ચ સમક્ષ જશે કારણ કે તેમના સાથી જજને આ કેસની સુનાવણીમાં કેટલીક મુશ્કેલી પડી રહી છે. આ પહેલાં જસ્ટિસ અતુલ ચાંદુરકર અને જસ્ટિસ એમ.એમ. સુંદરેશ પણ આ કેસમાંથી પોતાને અલગ કરી ચૂક્યા છે.

સાડા સાત વર્ષથી જેલમાં બંધ છે ગાડલિંગ

ગાડલિંગ તરફથી હાજર થયેલા વરિષ્ઠ વકીલ કપિલ સિબ્બલે અદાલત સમક્ષ તાત્કાલિક સુનાવણીની માંગ કરતા જણાવ્યું હતું કે, અરજદાર સાડા સાત વર્ષથી વધુ સમયથી કસ્ટડીમાં છે. અદાલતે ૨૦૨૩માં જ જામીન અરજી પર નોટિસ જારી કરી હતી, પરંતુ જજોના અલગ થવાને કારણે સુનાવણી લંબાઈ રહી છે.

ઉલ્લેખનીય છે કે, બોમ્બે હાઈકોર્ટની નાગપુર બેન્ચે ૩૧ જાન્યુઆરી, ૨૦૨૩ના રોજ ગાડલિંગને જામીન આપવાનો ઇનકાર કર્યો હતો, જેને તેમણે સુપ્રિમ કોર્ટમાં પડકારી છે. ગાડલિંગ જૂન ૨૦૧૮ થી ભીમા કોરેગાંવ કેસમાં પણ UAPA હેઠળ જેલમાં બંધ છે.

શું હતો ૨૦૧૬નો સૂરજગઢ કેસ?

૨૫ ડિસેમ્બર, ૨૦૧૬ના રોજ મહારાષ્ટ્રના ગઢચિરોલી સ્થિત સૂરજગઢ ખાણોમાંથી આયર્ન ઓર (લોખંડની કાચી ધાતુ) નું પરિવહન કરતા ૭૬ વાહનોને પ્રતિબંધિત સંગઠન CPI (માઓવાદી) ના બળવાખોરોએ સળગાવી દીધા હતા. તપાસ એજન્સીઓનો આરોપ છે કે ગાડલિંગે માઓવાદીઓને ગુપ્ત માહિતી પૂરી પાડી હતી અને સ્થાનિક લોકોને ખાણકામ વિરૂદ્ધ ઉશ્કેરવામાં મદદ કરી હતી.