તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
૨૩ વર્ષના ભારતીય મૂળના કાઉન્સિલર તુષાર કુમાર બન્યા યુકેના સૌથી યુવા મેયર
બ્રિટનના રાજકારણમાં ભારતીય મૂળના લોકો સતત ઈતિહાસ રચી રહ્યા છે : ૧૩ મેના રોજ યોજાયેલા વાર્ષિક મેયર મેકિંગ સેરેમની દરમિયાન તેમણે સત્તાવાર રીતે એલસ્ટ્રી એન્ડ બોરહામવુડના મેયર તરીકે શપથ લીધા હતા
લંડન તા.૧૮: બ્રિટનના રાજકારણમાં ભારતીય મૂળના લોકો સતત ઈતિહાસ રચી રહ્યા છે. આ કડીમાં હવે એક નવું અને ગૌરવપૂર્ણ નામ ઉમેરાયું છે. યુકેમાં માત્ર ૨૩ વર્ષના કાઉન્સિલર તુષાર કુમારે બ્રિટનના ઇતિહાસમાં સૌથી નાની ઉંમરના ભારતીય મૂળના મેયર બનીને એક અભૂતપૂર્વ રેકોર્ડ પોતાના નામે કર્યો છે. ૧૩મે, ૨૦૨૬ના રોજ યોજાયેલા કાઉન્સિલના વાર્ષિક મેયર મેકિંગ સેરેમની દરમિયાન તેમને સત્તાવાર રીતે એલસ્ટ્રી એન્ડ બોરહામવુડના મેયર તરીકે નિયુક્ત કરવામાં આવ્યા છે. બોરહામવુડના ફેરવે હોલ ખાતે યોજાયેલા આ સમારોહમાં વિવિધ કાઉન્સિલરો, સામાજિક નેતાઓ, ધાર્મિક પ્રતિનિધિઓ, સ્થાનિક રહેવાસીઓ અને તુષારના પરિવારજનો ઉપસ્થિત રહ્યા હતા.
લેબર પાર્ટીનું પ્રતિનિધિત્વ કરતા તુષાર કુમાર લાંબા સમયથી સ્થાનિક સ્તરે સક્રિય છે. તેઓ અગાઉ આ જ કાઉન્સિલમાં ડેપ્યુટી મેયર તરીકે સેવા આપી ચૂક્યા છે અને આ વર્ષે તેમને મેયર તરીકેની સર્વોચ્ચ અને પ્રતિષ્ઠિત જવાબદારી સોંપવામાં આવી છે. તુષાર કુમારે લંડનની પ્રતિષ્ઠિત કિગ્સ કોલેજ લંડનમાંથી પોલિટિકલ સાયન્સનો અભ્યાસ કર્યો છે.
તુષાર કુમારની રાજકીય સફર અસાધારણ રહી છે. તેઓ જ્યારે કિગ્સ કોલેજમાં અભ્યાસ કરતા હતા, ત્યારે માત્ર ૨૦ વર્ષની નાની ઉંમરે પ્રથમ વખત કાઉન્સિલર તરીકે ચૂંટાયા હતા. તે સમયે તેઓ યુકેના સૌથી યુવા ભારતીય મૂળના કાઉન્સિલર બન્યા હતા અને કન્ઝર્વેટિવ પાર્ટીના પરંપરાગત ગઢ ગણાતા વિસ્તારમાં લેબર પાર્ટીને જીત અપાવી હતી. માત્ર ૧૦ વર્ષની ઉંમરે લંડન આવીને વસેલા તુષાર નાનપણથી જ રાજકારણ અને સામાજિક કાર્યો પ્રત્યે ખૂબ જ ઉત્સાહી હતા. તેઓ બ્રિટનમાં 'હિન્દી શિક્ષા પરિષદ યુકે'માં મફત હિન્દી પણ ભણાવે છે.
તુષાર કુમારની આ સફળતા પાછળ તેમની માતા કાઉન્સિલર પરવીન રાનીનો મોટો હાથ છે. પરવીન રાની પોતે પણ પૂર્વ ડેપ્યુટી મેયર રહી ચૂક્યા છે અને તુષાર તેમને પોતાના રાજકીય ગુરુ અને સૌથી મોટી પ્રેરણા માને છે. વર્ષ ૨૦૨૩માં આ માતા-પુત્રની જોડીએ બ્રિટનની સ્થાનિક ચૂંટણીમાં જીત મેળવીને ભારે ચર્ચા જગાવી હતી.
આ ઐતિહાસિક પદ સંભાળ્યા બાદ તુષાર કુમારે આ સફરને અત્યંત અવાસ્તવિક અને એક અદ્ભુત સન્માન જણાવી હતું. તેમણે કહ્યું હતું કે, જે શહેરને હું પ્રેમ કરું છું, તેના મેયર તરીકે સેવા આપવી તે મારા માટે ગર્વની વાત છે. હું આ સફરમાં સાથ આપનાર તમામ લોકોનો આભારી છું. તેમણે પૂર્વ મેયર ડેન ઓઝારોવનો પણ આભાર માન્યો હતો, જેમણે ડેપ્યુટી મેયર તરીકેના કાર્યકાળ દરમિયાન તુષારને ઘણું માર્ગદર્શન આપ્યું હતું. આગામી વર્ષ માટે લિન્ડા સ્મિથને ડેપ્યુટી મેયર તરીકે નિયુક્ત કરવામાં આવ્યા છે.
મેયર તરીકે તુષાર કુમારનું મુખ્ય ધ્યાન સ્થાનિક સ્તરે સામાજિક એકતા વધારવા, સ્થાનિક ચેરિટી અને સંસ્થાઓને મદદ કરવા પર રહેશે. આ સાથે જ તેઓ બ્રિટનના યુવાનોને સ્થાનિક લોકશાહી અને જાહેર સેવામાં સક્રિયપણે ભાગ લેવા માટે પ્રેરિત કરવા માંગે છે. તુષારે ભારપૂર્વક જણાવ્યું હતું કે, જો સમાજમાં કોઈ સકારાત્મક પરિવર્તન લાવવું હોય, તો ઉંમર ક્યારેય પણ બાધક બની શકતી નથી.
(10:05 AM IST)
છેલ્લા 8 દિવસમાં સૌથી લોકપ્રિય 
