​કોલકાતા: પશ્ચિમ બંગાળમાં મતદાર યાદીઓની ખાસ સુધારણા પ્રક્રિયા એટલે કે સ્પેશિયલ ઇન્ટેન્સિવ રિવિઝન (SIR) ને લઈને ચાલી રહેલા તીવ્ર રાજકીય ઘમાસાણ વચ્ચે એક મોટો ધડાકો થયો છે. રાજ્યમાં મતદાર યાદીમાંથી ૨૭ લાખ જેટલા મતદારોના નામ કમી થવા અંગે ચાલી રહેલા આક્ષેપ-પ્રતિઆક્ષેપ વચ્ચે પશ્ચિમ બંગાળના મુખ્યમંત્રી સુવેન્દુ અધીકારીએ સ્પષ્ટતા કરતા જણાવ્યું છે કે આ સમગ્ર પ્રક્રિયા માટે ભાજપ કે ચૂંટણી પંચ કોઈપણ રીતે જવાબદાર નથી, પરંતુ તેના માટે પૂર્વ મુખ્યમંત્રી અને તૃણમૂલ કોંગ્રેસના સુપ્રીમો મમતા બેનર્જી ખુદ સંપૂર્ણપણે જવાબદાર છે.

​કોલકાતા ખાતે યોજાયેલી પત્રકાર પરિષદને સંબોધતા સુવેન્દુ અધીકારીએ વિગતો આપતા જણાવ્યું હતું કે, ૨૭ લાખ નામો રદ કરવાનો નિર્ણય કોઈ રાજકીય પક્ષ કે પંચ દ્વારા લેવામાં આવ્યો નથી. આ નિર્ણય મમતા બેનર્જી દ્વારા સર્વોચ્ચ અદાલતમાં દાખલ કરવામાં આવેલી અરજી પર સુપ્રીમ કોર્ટે આપેલા સ્પષ્ટ નિર્દેશોને આધીન રહીને ન્યાયિક અધિકારીઓ (જ્યુડિશિયલ ઓફિસર્સ) દ્વારા લેવામાં આવ્યો હતો. તાજેતરમાં યોજાયેલી વિધાનસભા ચૂંટણીમાં પરાજયનો સામનો કર્યા બાદ મમતા બેનર્જી અને તેમની પાર્ટી જનતાના જનાદેશને પચાવી શકતા નથી અને તેથી પોતાની ભૂલોનો દોષ ચૂંટણી પંચ અને ભાજપ માથે મઢવાનો નિષ્ફળ પ્રયાસ કરી રહ્યા છે.

​વિરોધ પક્ષોના બેવડા વલણ પર આકરા પ્રહારો કરતા સુવેન્દુ અધીકારીએ પ્રશ્ન ઉઠાવ્યો હતો કે, જો કેરળમાં SIR ની પ્રક્રિયા યોગ્ય અને આવકારદાયક ગણાતી હોય તો પશ્ચિમ બંગાળમાં જ તેને ખોટી કેમ ઠેરવવામાં આવી રહી છે? કેરળમાં ચૂંટણી જીત્યા હોવાથી વિપક્ષને ત્યાં કોઈ વાંધો નથી, પરંતુ બંગાળમાં જનતાએ ભાજપ અને તેના સહયોગીઓને ૨૦૮ બેઠકો સાથે ભવ્ય વિજય અપાવ્યો છે અને તૃણમૂલ કોંગ્રેસ તથા તેના સહયોગીઓને માત્ર ૮૦ બેઠકો પર સીમિત કરી દીધા છે, તેથી જ મમતા બેનર્જી આ વાસ્તવિકતા સ્વીકારી શકતા નથી.

​ચૂંટણી પંચની ભૂમિકા અને તેની કામગીરી અંગે સ્પષ્ટતા કરતા તેમણે ઉમેર્યું હતું કે, મુખ્ય ચૂંટણી કમિશ્નર જ્ઞાનેશ કુમાર અને ચૂંટણી કમિશ્નરો સુખબીર સિંહ સંધૂ તથા વિવેક જોશી વચ્ચે તાજેતરમાં યોજાયેલી બેઠક અને ત્યારબાદ જાહેર કરવામાં આવેલા સત્તાવાર નિવેદનથી એ બાબત સંપૂર્ણપણે સાબિત થઈ ગઈ છે કે બંગાળ SIR અંગેના તમામ નિર્ણયો કોઈ એક વ્યક્તિ દ્વારા એકતરફી રીતે લેવાયા નથી પરંતુ ચૂંટણી પંચ દ્વારા સર્વાનુમતે અને નિયમાનુસાર લેવામાં આવ્યા છે. મમતા બેનર્જી અને તૃણમૂલ કોંગ્રેસ દ્વારા રજૂ કરવામાં આવતા તમામ દાવાઓ પાયાવિહોણા અને જનતાને ગેરમાર્ગે દોરનારા છે.