રાજકોટ: આજે તારીખ ૨૬-૦૪-૨૦૨૬ ના રોજ સમગ્ર ગુજરાતમાં સ્થાનિક સ્વરાજ્યની સામાન્ય ચૂંટણીઓ માટે મતદાન યોજાઈ રહ્યું છે. રાજ્યમાં મહાનગરપાલિકાઓ, નગરપાલિકાઓ, જિલ્લા અને તાલુકા પંચાયતો માટે સવારના ૭ વાગ્યાથી મતદાન પ્રક્રિયા શરૂ થઈ ગઈ હતી. રાજ્યના મુખ્યમંત્રીશ્રી અને ગૃહમંત્રીશ્રી સહિતના અગ્રણીઓએ પણ પોતાના મતાધિકારનો ઉપયોગ કરી નાગરિકોને સો ટકા મતદાન કરવા અપીલ કરી છે. સમગ્ર રાજ્યમાં ઈવીએમ (EVM) મશીનો મારફતે શાંતિપૂર્ણ રીતે મતદાન ચાલી રહ્યું છે અને ક્યાંય પણ કાયદો કે વ્યવસ્થાનો ગંભીર પ્રશ્ન ઉપસ્થિત થયો નથી.

 

ગુજરાતમાં સાંજે ૪ વાગ્યા સુધીની સ્થિતિ:

 

સમગ્ર ગુજરાત રાજ્યની સાંજે ૪ વાગ્યા સુધીની સત્તાવાર સ્થિતિ જોઈએ તો, શહેરોની સરખામણીમાં ગ્રામ્ય વિસ્તારોમાં મતદારોનો ઉત્સાહ વધુ જોવા મળ્યો છે.

 

  તાલુકા પંચાયતોમાં સૌથી વધુ ૫૨.૧૬% મતદાન નોંધાયું છે.

  જિલ્લા પંચાયતોમાં ૫૧.૮૫% મતદાન થયું છે.

  નગરપાલિકાઓમાં ૪૮.૬૫% મતદાન નોંધાયું છે.

  મહાનગરપાલિકાઓમાં ૪૦.૭૯% મતદાન થયું છે.

 

રાજકોટ જિલ્લાની તાલુકા પંચાયતોનું બપોરે ૩ વાગ્યા સુધીનું ચિત્ર:

 

રાજકોટ જિલ્લાની સામાન્ય ચૂંટણીઓ માટે બપોરે ૩ વાગ્યા સુધીના આંકડાઓ જાહેર કરવામાં આવ્યા છે.

  રાજકોટ જિલ્લાની ૧૧ તાલુકા પંચાયતોમાં કુલ ૯,૩૬,૫૯૪ મતદારો નોંધાયેલા છે.

  આ મતદારોમાં ૪,૯૦,૯૨૮ પુરુષ અને ૪,૪૫,૧૮૮ સ્ત્રી મતદારોનો સમાવેશ થાય છે.

  બપોરે ૩ વાગ્યા સુધીમાં કુલ ૩,૯૧,૬૪૪ મતદારોએ પોતાનો વોટ આપ્યો છે.

  જેમાં ૨,૨૮,૭૯૪ પુરુષો અને ૧,૬૨,૮૫૦ સ્ત્રીઓએ મતદાન કર્યું છે.

  જિલ્લાનું કુલ સરેરાશ મતદાન ૪૧.૮૨% રહ્યું છે.

  પુરુષોનું મતદાન ૪૬.૬૦% અને સ્ત્રીઓનું મતદાન ૩૬.૫૮% નોંધાયું છે.

 

 

 

 રાજકોટ જિલ્લાના વિવિધ તાલુકાઓમાં મતદાનની સ્થિતિ નીચે મુજબ છે:

 

  લોધિકા તાલુકાના મતદારોમાં સૌથી વધુ ઉત્સાહ જોવા મળ્યો છે. અહી સૌથી વધુ ૫૪.૦૮% મતદાન નોંધાયું છે, જેમાં પુરુષોનું ૫૯.૧૧% અને સ્ત્રીઓનું ૪૮.૫૪% મતદાન થયું છે.

  પડધરી તાલુકામાં ૫૧.૪૨% મતદાન થયું છે.

  કોટડાસાંગાણીમાં ૪૬.૮૯% મતદાન નોંધાયું છે.

  ઉપલેટા તાલુકામાં ૪૩.૧૬% મતદાન થયું છે.

  જસદણ તાલુકામાં ૪૧.૬૨% મતદાન નોંધાયું છે.

  રાજકોટ તાલુકામાં ૪૧.૪૬% અને ધોરાજીમાં પણ ૪૧.૪૬% જેટલું એકસમાન મતદાન થયું છે.

  ગોંડલમાં ૩૮.૯૩% મતદાન થયું છે.

  જેતપુર તાલુકામાં ૩૮.૨૩% મતદાન નોંધાયું છે.

  જામકંડોરણામાં ૩૬.૮૯% મતદાન નોંધાયું છે.

  વીંછીયામાં જિલ્લામાં સૌથી ઓછું ૩૬.૭૯% મતદાન થયું છે.

 

સાંજના ૬ વાગ્યા સુધી મતદાન પ્રક્રિયા ચાલવાની હોય, ડિજિટલ પ્લેટફોર્મ અને ન્યૂઝ એજન્સીઓના જણાવ્યા મુજબ અંતિમ આંકડાઓમાં હજુ મોટો ઉછાળો આવવાની પૂરી સંભાવના છે. આ સાથે જ તમામ ઉમેદવારોનું ભાવિ આજે ઈવીએમ મશીનોમાં કેદ થઈ જશે.