બસવેશ્વર,તા.૦૭: દેશમાં રામમંદિર દાન ચોરી કેસની તપાસ વચ્‍ચે કર્ણાટકના શ્રી પાવડા બસવેશ્વર મંદિરના ગર્ભગૃહમાંથી ૩૨ કિલો ચાંદીની મૂર્તિ સહિત  ૬૦ કિલોથી વધુ વજનની ચાંદીની વસ્‍તુઓની ચોરીની ઘટના પ્રકાશમાં આવી છે.

આ અંગે મળતી માહિતી મુજબ કર્ણાટકના વિજયપુરા જિલ્‍લાના મુદ્દેબિહાલ તાલુકાના બસરાકોડ ગામમાં આવેલા  શ્રી પાવડા બસવેશ્વર મૂર્તિની ચોરી ૫-૬ જુલાઈની રાત્રે થઈ હતી. જેમાં એકલી મૂર્તિની કિમત આશરે રૂ.૫૧.૨૦ લાખ આંકવામાં આવી છે. જ્‍યારે ચોરાયેલા ચાંદીના આભૂષણોની કુલ બજાર કિમત રૂ.૧.૨૦ કરોડથી વધુ હોવાનો અંદાજ છે. આ ભગવાન બસવેશ્વરને સમર્પિત એક મહત્‍વપૂર્ણ  મંદિર છે.

આ અંગે ૭૦ વર્ષીય કરનડપ્‍પા બિરદાર દ્વારા નોંધાવવામાં આવેલી ફરિયાદ   મુજબ  ચોરીની જાણ સવારે ૪ વાગ્‍યાની આસપાસ થઈ જ્‍યારે નિવાસી પૂજારી સાધુ શંકરલિગે જોયું કે મંદિરના દરવાજા ખુલ્‍લા હતા અને તાળા તૂટેલા હતા.

આ મૂર્તિ તેના આસન પરથી ગાયબ હતી. ફરિયાદીએ જણાવ્‍યું હતું કે મંદિરના પૂજારી શરણય્‍ય સલીમથે ૫  જુલાઈના રોજ રાત્રે ૯ વાગ્‍યે સાંજની પ્રાર્થના કરી હતી અને બહાર જતા પહેલા અંદરના અને બહારના લોખંડના દરવાજા બંધ કરી દીધા હતા. એવું માનવામાં આવે છે કે ચોરી રાત્રે ૯ વાગ્‍યાથી સવારે ૪.૩૦ વાગ્‍યાની વચ્‍ચે થઈ હતી