<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 1st May 2024

દિલ્હી - નોઇડાની હાઇપ્રોફાઇલ શાળાઓને બોમ્બના ધમકીભર્યા ઇમેલ

શાળાઓને ફુંકી મારવાની ધમકી મળતા ખળભળાટ : પોલીસ - બોંબ સ્કવોડ દ્વારા ચેકિંગ : શાળાઓમાં રજા : ગઇકાલથી ઇ-મેઇલ મોકલાયા : બધાની એક જ પેટર્ન : દેશ બહારથી મોકલાયાની શંકા : તપાસ શરૂ

નવી દિલ્હી તા. ૧ : દિલ્હી અને નોઈડાની ૧૩ શાળાઓમાં ધમકીભર્યા ઈમેલ મોકલવામાં આવ્યા છે, જેમાં આ શાળાઓમાં બોમ્બ મૂકવાના સમાચારે હલચલ મચાવી દીધી છે. તેમાં નોઈડાની ડીપીએસ સિવાય દ્વારકાની ડીપીએસ, મયુર વિહારની મધર મેરી સ્કૂલ અને નવી દિલ્હીની સંસ્કૃતિ સ્કૂલ જેવી હાઈપ્રોફાઈલ સ્કૂલોનો સમાવેશ થાય છે.જે શાળાઓમાં ધમકીઓ મળી છે ત્યાંથી બાળકોને રજા  આપી દેવાંમાં આવી છે છે. પોલીસ, બોમ્બ સ્કવોડ, ડોગ સ્કવોડ અને ફાયર બ્રિગેડ ઘટનાસ્થળે પહોંચી ગઈ છે. શાળાઓ વાલીઓને જાણ કરવામાં આવી રહી છે.

દ્વારકાની હાઈપ્રોફાઈલ ડીપીએસ સ્કૂલમાં બોમ્બ હોવાની ધમકી મળી હતી. સવારે છ વાગ્યે ફાયર વિભાગને આ અંગેની જાણ કરવામાં આવી હતી, ત્યારપછી દિલ્હી પોલીસ, બોમ્બ ડિસ્પોઝલ સ્કવોડ અને ફાયર ફાઇટર ઘટનાસ્થળે પહોંચી ગયા હતા. સમગ્ર શાળામાં તપાસ કરવામાં આવી હતી.

પૂર્વ દિલ્હીના મયુર વિહારમાં આવેલી મધર મેરી સ્કૂલને પણ ધમકીભર્યો ઈમેલ મળ્યો છે. સમગ્ર શાળાને ખાલી કરાવીને સર્ચ કરવામાં આવી રહ્યું છે. નવી દિલ્હીની સંસ્કૃતિ સ્કૂલને પણ ઈમેલ દ્વારા આવી જ ધમકી મળી હતી. શાળામાં બોમ્બની ધમકી મળતાં સમગ્ર શાળાને ખાલી કરાવવામાં આવી હતી.

વસંત કુંજની ડીપીએસ સ્કૂલ અને દક્ષિણ પશ્ચિમ જિલ્લાની ડીએવી સ્કૂલને પણ સમાન ધમકીભર્યા ઈમેલ મોકલવામાં આવ્યા છે. બુધવારે સવારે ૪.૩૦ વાગ્યે પુષ્પ વિહારની એમિટી સ્કૂલને ધમકીભર્યો ઈમેલ પણ મોકલવામાં આવ્યો હતો, જેમાં કહેવામાં આવ્યું હતું કે સ્કૂલમાં બોમ્બ મૂકવામાં આવ્યો છે.

નોઈડાની ડીપીએસ સ્કૂલને પણ બોમ્બથી ઉડાવી દેવાની ધમકી આપવામાં આવી છે. નોઈડા ડીપીએસ સ્કૂલના પ્રિન્સિપાલે કહ્યું કે નોઈડા ડીપીએસ સ્કૂલને પણ એક ઈમેલ મળ્યો છે જેમાં બોમ્બ હોવાની ધમકી આપવામાં આવી હતી. સાવચેતીના ભાગરૂપે અમે વિદ્યાર્થીઓને તાત્કાલિક ઘરે મોકલી દીધા છે.

દિલ્હી પોલીસ સાથે જોડાયેલા સૂત્રોનું કહેવું છે કે બુધવારે સવારે દિલ્હીની ઘણી સ્કૂલોમાં બોમ્બની ધમકીભર્યા ઈમેલ મોકલવામાં આવ્યા હતા. ઈમેલના આઈપી એડ્રેસ પરથી એવું લાગે છે કે આ ઈમેલ દેશની બહારથી મોકલવામાં આવ્યો છે. આ મામલે તપાસ ચાલી રહી છે.

સૂત્રોના જણાવ્યા અનુસાર, દિલ્હી પોલીસનું કહેવું છે કે પ્રારંભિક તપાસમાં એવું લાગે છે કે ગઈકાલથી ઘણી જગ્યાએથી ઈમેલ આવ્યા છે. આ ઈમેલમાં કોઈ ડેટલાઈન નથી. એક જ ઈમેલ અનેક જગ્યાએ મોકલવામાં આવ્યો છે.

દિલ્હીની શાળાઓને આ પ્રકારના ધમકીભર્યા ઈમેલ વારંવાર મોકલવામાં આવ્યા છે. ફેબ્રુઆરી મહિનામાં, દિલ્હીના આરકેપુરમ સ્થિત ડીપીએસ સ્કૂલના પ્રિન્સિપાલને આવો જ એક ઈમેલ મોકલવામાં આવ્યો હતો. ફેબ્રુઆરીમાં સાકેતની એમિટી સ્કૂલને પણ આવો જ ઈમેલ મોકલવામાં આવ્યો હતો. આ ઈમેલમાં શાળા પાસેથી પૈસા પણ માંગવામાં આવ્યા હતા.

(1:54 PM IST)