<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 8th May 2024

હાઇકોર્ટમાં વિચિત્ર કેસ અંગે ફેંસલો

વિચાર્યુ નહોતું કે ભગવાન હનુમાન કેસમાં પક્ષકાર બનશે..: જજ આશ્ચર્યચકિત

દિલ્‍હી હાઈકોર્ટે ખાનગી જમીન પર અતિક્રમણના કેસમાં ભગવાન હનુમાનને સહ-વાદી બનાવવાની અરજીને ફગાવી દીધી છે : આ ઉપરાંત અરજદાર પર ૧ લાખ રૂપિયાનો દંડ પણ ફટકારવામાં આવ્‍યો છે

નવી દિલ્‍હી તા. ૮ : દિલ્‍હી હાઈકોર્ટે એક ખાનગી જમીનના અતિક્રમણના સંબંધમાં ભગવાન હનુમાનને સહ-વાદી બનાવવા માટે અરજીકર્તા પર ૧ લાખ રૂપિયાનો દંડ ફટકાર્યો છે. જસ્‍ટિસ સી હરિશંકરની અધ્‍યક્ષતાવાળી બેન્‍ચે પણ અરજી ફગાવી દીધી હતી. અરજદારે ટ્રાયલ કોર્ટના આદેશને હાઈકોર્ટમાં પડકાર્યો હતો. આ મામલો ઉત્તમ નગરની જૈન કોલોનીના પાર્ટ વનમાં આવેલી એક પ્રોપર્ટીનો છે.

અરજીમાં કહેવામાં આવ્‍યું છે કે મિલકત પર સાર્વજનિક હનુમાન મંદિર છે અને તેથી જમીન ભગવાન હનુમાનની છે. અરજદારે ભગવાન હનુમાનના નજીકના મિત્ર અને ઉપાસક તરીકે હાઇકોર્ટ સમક્ષ અરજી દાખલ કરી હતી. સુનાવણી દરમિયાન, હાઈકોર્ટે કહ્યું કે અરજદારે મિલકત પર કબજો કરવાના ઈરાદાથી કાવતરું ઘડ્‍યું હતું અને જમીનના હાલના કબજેદારો સાથે સાંઠગાંઠ કરી હતી. જેથી ટ્રાયલ બાદ પ્રતિવાદી પક્ષને ફરીથી કબજો લેતા અટકાવી શકાય.

આ કેસમાં કોર્ટે કહ્યું કે ટ્રાયલ કોર્ટના પ્રતિવાદીઓએ જમીન ખાલી કરવા માટે ૧૧ લાખ રૂપિયા માંગ્‍યા હતા અને અરજદારે ૬ લાખ રૂપિયા પણ ચૂકવ્‍યા હતા. આમ છતાં આરોપીઓએ જમીન ખાલી કરી ન હતી. આ કેસમાં પ્રતિવાદીઓ વર્તમાન કબજેદાર છે. કોર્ટે કહ્યું કે આ કેસમાં અરજદારે વાંધો ઉઠાવતા કહ્યું કે આ જમીન ભગવાન હનુમાનની છે અને ભગવાન હનુમાનના પૂજારી અને તેમના નજીકના મિત્ર હોવાના કારણે તેમને તેમના હિતોની રક્ષા કરવાનો અધિકાર છે.

અરજદાર આ કેસમાં ન તો વાદી છે કે ન તો ટ્રાયલ કોર્ટનો પ્રતિવાદી, પરંતુ તે ત્રીજો પક્ષ છે. કોર્ટે કહ્યું કે જાહેર જનતાને ખાનગી મંદિરમાં પૂજા કરવાનો અધિકાર નથી જયાં સુધી મંદિરનો માલિક આમ ન કરે. અથવા સમયની સાથે ખાનગી મંદિર જાહેર મંદિરમાં ફેરવાઈ જાય છે. જસ્‍ટિસ સી હરિશંકરે સુનાવણી દરમિયાન કહ્યું કે મારી સામે આવો કેસ પહેલીવાર આવ્‍યો છે. મેં ક્‍યારેય વિચાર્યું ન હતું કે એક દિવસ ભગવાન હનુમાન મારી સામે ઊભા થશે.

(10:20 AM IST)