<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 8th May 2024

શહેરો કરતા ગામડાઓમાં સાબુ-શેમ્‍પૂ અને બિસ્‍કીટનું વેચાણ વધી રહ્યું છે

શું FMCG ઉદ્યોગ ગામડાઓ પર આધારિત છે ? હાલમાં ગ્રામીણ વિસ્‍તારોમાં FMCG વૃધ્‍ધિ શહેરો કરતા વધુ

નવી દિલ્‍હી તા. ૮ : નૂડલ્‍સ-પાસ્‍તા, સોસ-કેચઅપ, મેયોનેઝ, બટાકાની ચિપ્‍સ, ફળોના રસ, ચીઝ, પનીર, પીણાં, તેલનો સાબુ, શેમ્‍પૂ, બિસ્‍કિટ વગેરે જેવા પેકેજડ અથવા પ્રોસેસ્‍ડ ખોરાક ફાસ્‍ટ મૂવિંગ કન્‍ઝ્‍યુમર ગુડ્‍સ અથવા એફએમસીજીના નામ છે . થોડા વર્ષો પહેલા સુધી આ સામાન મોટાભાગે શહેરોમાં જ વેચાતો હતો. પરંતુ હવે ગામડાઓએ શહેરોને પાછળ છોડી દીધા છે. હા, કન્‍ઝ્‍યુમર ઇન્‍ટેલિજન્‍સ ફર્મ NielsenlQ ના રિપોર્ટ પરથી આ વાતનો અંદાજ લગાવવામાં આવી રહ્યો છે.

NielsenlQના   આ રિપોર્ટમાં જણાવવામાં આવ્‍યું છે કે આ વર્ષે જાન્‍યુઆરીથી માર્ચ દરમિયાન ગ્રામીણ વિસ્‍તારોમાં પેકેજડ ફૂડ, પીણાં, તેલ, સાબુ, શેમ્‍પૂ જેવી વસ્‍તુઓનું વેચાણ શહેરી વિસ્‍તારોની તુલનામાં ઝડપથી વધી રહ્યું છે. છેલ્લા ૧૫ મહિનામાં આવું પહેલીવાર બન્‍યું છે. આ સૂચવે છે કે ગ્રામીણ અર્થવ્‍યવસ્‍થામાં સુધારો છે, તેથી જ ત્‍યાં FMCG ઉત્‍પાદનોની માંગ વધી છે.

જાન્‍યુઆરી-માર્ચ ક્‍વાર્ટરમાં વધુ એક સંકેત મળ્‍યો છે. આ સમયગાળા દરમિયાન, ખાદ્ય ચીજોને બદલે, તેલ, સાબુ, શેમ્‍પૂ અને ટૂથપેસ્‍ટ સહિત વ્‍યક્‍તિગત અને ઘરની સંભાળ ઉત્‍પાદનોનું વેચાણ વધુ હતું. નોન-ફૂડ કેટેગરીની વૃદ્ધિ ખાદ્ય પદાર્થો કરતાં લગભગ બમણી હતી. NielsenlQ નો આ અહેવાલ જણાવે છે કે ગ્રામીણ વિસ્‍તારોમાં માંગ ક્‍વાર્ટર-દર-ક્‍વાર્ટરના આધારે ૭.૬% વધી છે, જયારે શહેરી વિસ્‍તારોમાં તે ૫.૭% ઘટી છે.

રૂઝવેલ્‍ટ ડિસોઝા, હેડ કસ્‍ટમર સક્‍સેસ ઈન્‍ડિયા, નીલસેનક્‍યુએ જણાવ્‍યું હતું કે હોમ અને પર્સનલ કેર કેટેગરીઓએ ફૂડ કેટેગરીઝ કરતાં વધુ સારૂં પ્રદર્શન કર્યું છે. નોન-ફૂડ સેક્‍ટરનો ગ્રોથ ૧૧% હતો, જયારે ઓક્‍ટોબર-ડિસેમ્‍બર ૨૦૨૩ ક્‍વાર્ટરમાં ફૂડ સેક્‍ટરમાં વેચાણ ૪.૮% વધ્‍યું હતું અને ફૂડ સેક્‍ટરનો ગ્રોથ ૫.૪% હતો.

બેંક ઓફ બરોડાના ચીફ ઈકોનોમિસ્‍ટ મદન સાવનવીસે જણાવ્‍યું હતું કે, ‘વાસ્‍તવિક રીતે વપરાશ વૃદ્ધિ નાણાકીય વર્ષ ૨૪ માં માત્ર ૩% હતી. પરંતુ જો ફુગાવો ઘટશે, તો પરિવારોની ખરીદ શક્‍તિ વધશે. ઉદ્યોગમાં ક્ષમતાનો ઉપયોગ વધવાથી રોકાણ વધશે, જે રોજગાર અને આવકમાં વધારો થશે.' જો ચોમાસું સારૂં રહેશે, તો ગ્રામીણ અર્થતંત્ર મજબૂત રહેશે, તેથી નાણાકીય વર્ષ ૨૫ માં વપરાશમાં સુધારો થવાની ધારણા છે.

(10:21 AM IST)