તા. ૧૯ એપ્રિલ ર૦ર૪ વિક્રમ સંવત ર૦૮૦ ચૈત્ર સુદ - ૧૧ શુક્રવાર
News of Thursday, 9th May 2024
બાળકને મતદાન કરાવનાર જિલ્લા પંચાયતના સભ્ય સામે નોંધાઈ FIR
EVM મશીન બન્યું રમકડુઃવોટિંગ દરમિયાન એક સગીર બાળકને વોટ આપવા માટે કહેવામાં આવી રહ્યો હોવાનો વીડિયો વાયરલ થયો

ભોપાલ, તા.૯
મધ્યપ્રદેશની ભોપાલ લોકસભા સીટ પર ૭ મેના રોજ યોજાયેલા વોટિંગ દરમિયાન એક સગીર બાળકને વોટ આપવા માટે કહેવામાં આવી રહ્યો હોવાનો વીડિયો વાયરલ થઈ રહ્યો છે. કોંગ્રેસનો દાવો છે કે જિલ્લા પંચાયતના સભ્ય અને ભાજપના નેતા વિનય મેહરે પોતે આ વીડિયો સોશિયલ મીડિયા પર શેર કર્યો છે. આ મામલો ચર્ચામાં આવ્યા બાદ વીડિયો પણ ડિલીટ કરી દેવામાં આવ્યો હતો.આ મામલો ધ્યાને આવ્યા બાદ રાજ્ય ચૂંટણી પંચે પ્રિસાઇડિંગ ઓફિસરને સસ્પેન્ડ કરી દીધા છે. સાથે જ, વીડિયોમાં દેખાતા વ્યક્તિ વિરુદ્ધ લોક પ્રતિનિધિત્વ અધિનિયમ ૧૯૫૧ની કલમ ૧૨૮ અનu IPCની કલમ ૧૮૮ હેઠળ FIR દાખલ કરવામાં આવી છે.
વાસ્તવમાં, સોશિયલ મીડિયા પર શેર કરવામાં આવેલા વીડિયોમાં જોવા મળે છે કે એક વ્યક્તિ નાના બાળક સાથે મતદાન કેન્દ્ર પર જઈ રહ્યો છે અને તેને ઈવીએમ બટન દબાવવા માટે કહી રહ્યો છે. આ પછી VVPAT મશીન પર કમળના ફૂલની સ્લિપ આવી રહી છે.વીડિયો વાયરલ થતાની સાથે જ કોંગ્રેસ સક્રિય થઈ ગઈ અને આરોપ લગાવ્યો કે વીડિયોમાં દેખાતો વ્યક્તિ બીજેપી કાર્યકર અને જિલ્લા પંચાયત સભ્ય વિનય મેહર છે.પૂર્વ મુખ્યમંત્રી કમલનાથના મીડિયા સલાહકાર અને કોંગ્રેસના નેતા પીયૂષ બાબિલેએ કહ્યું કે, ભાજપે ચૂંટણી પંચને બાળકોનો ખેલ બનાવી દીધો છે. ભોપાલમાં, ભાજપના જિલ્લા પંચાયત સભ્ય વિનય મેહરે તેમના સગીર પુત્રને પોતાનો મત આપ્યો. વિનય મેહરે વોટ કાસ્ટ કરતી વખતે એક વીડિયો પણ બનાવ્યો હતો. વિનય મેહરે આ વીડિયો ફેસબુક પર પોસ્ટ કર્યો છે. શું કોઈ કાર્યવાહી થશે?સાથે જ આ ફરિયાદ ચૂંટણી પંચ સુધી પણ પહોંચી હતી. જ્યારે મામલો તેમના ધ્યાન પર આવ્યો, ત્યારે જિલ્લા ચૂંટણી અધિકારી ભોપાલ કલેક્ટર કૌશલેન્દ્ર વિક્રમ સિંહે બેરસિયા એસડીએમને તપાસનો આદેશ આપ્યો. જો તપાસમાં દોષી જણાશે તો પ્રિસાઇડિંગ ઓફિસર અને સંબંધિત વ્યક્તિ સામે કાર્યવાહી કરવામાં આવશે તેમ પણ જણાવ્યું હતું.ભોપાલ જિલ્લા પ્રશાસને એક નિવેદન જારી કરીને કહ્યું છે કે કલેક્ટર કૌશલેન્દ્ર વિક્રમ સિંહે બેરસિયા વિધાનસભામાં લોકસભા ચૂંટણી સંબંધિત વીડિયો અંગે એસડીએમ બેરસિયાને તપાસના આદેશ આપ્યા છે. કાર્યવાહી ચાલુ છે. જો તપાસમાં દોષિત જણાશે તો પ્રિસાઇડિંગ ઓફિસર અને સંબંધિત વ્યક્તિ સામે કડક કાર્યવાહી કરવામાં આવશે.મુખ્ય ચૂંટણી અધિકારી અનુપમ રાજને જણાવ્યું હતું કે, ભોપાલ કલેક્ટર કૌશલેન્દ્ર વિક્રમ સિંહ દ્વારા આ મામલાની તપાસ કરવામાં આવી હતી અને તે સાચું હોવાનું જાણવા મળ્યું હતું. આ પછી પોલિંગ બૂથ નંબર ૭૧ પર તૈનાત પ્રિસાઇડિંગ ઓફિસર સંદીપ સૈનીને સસ્પેન્ડ કરવામાં આવ્યા છે. આ સાથે વિડિયો બનાવનાર વ્યક્તિની ઓળખ વિનય મેહર તરીકે કરવામાં આવી છે, જેની વિરુદ્ધ લોક પ્રતિનિધિત્વ અધિનિયમ ૧૯૫૧ની કલમ ૧૨૮ અને IPCની કલમ ૧૮૮ હેઠળ FIR દાખલ કરવામાં આવી છે.મુખ્ય ચૂંટણી અધિકારીએ મતદારોને અપીલ કરી છે કે મતદાનની ક્ષણને યાદગાર બનાવવા માટે તેઓ મતદાન કેન્દ્રોની બહારના સેલ્ફી પોઈન્ટ પર સેલ્ફી લઈ શકે છે પરંતુ આ રીતે મતદાનની ગુપ્તતાનો ભંગ ન કરો.
(9:01 PM IST)









છેલ્લા 8 દિવસમાં સૌથી લોકપ્રિય 
