<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 14th May 2024

રામદેવ-બાલકૃષ્‍ણને સુપ્રીમ કોર્ટમાંથી રાહતઃ જજે કહ્યું યોગમાં તમારૂં અમૂલ્‍ય યોગદાન

SCએ IMA ચીફને ફટકાર લગાવી : બાબા રામદેવની પ્રશંસા કરી

નવી દિલ્‍હી તા. ૧૪ : પતંજલિની ભ્રામક જાહેરાતના કેસમાં આચાર્ય બાલકૃષ્‍ણ અને બાબા રામદેવને સુપ્રીમ કોર્ટમાંથી રાહત મળી છે. સુપ્રીમ કોર્ટે યોગ ગુરુ સ્‍વામી રામદેવ અને બાલકૃષ્‍ણને આગામી આદેશ સુધી હાજર રહેવામાંથી મુક્‍તિ આપી છે. આટલું જ નહીં સુપ્રીમ કોર્ટે યોગ ક્ષેત્રે બાબા રામદેવના યોગદાનની પણ પ્રશંસા કરી છે. જોકે, સુપ્રીમ કોર્ટમાં જસ્‍ટિસ હિમા કોહલી અને જસ્‍ટિસ અહસાનુદ્દીન અમાનુલ્લાહની ખંડપીઠે બાબા રામદેવ અને બાલકૃષ્‍ણ વિરૂદ્ધ કોર્ટની અવમાનના માટે કેસ ચલાવવામાં આવશે કે નહીં તે અંગે પોતાનો નિર્ણય અનામત રાખ્‍યો હતો.

વાસ્‍તવમાં, પતંજલિ આયુર્વેદ દ્વારા યોગગુરુ રામદેવ અને પતંજલિ આયુર્વેદના એમડી આચાર્ય બાલકૃષ્‍ણ વિરૂદ્ધ તેની દવાઓ માટે ‘ભ્રામક દાવા' કરવા માટે દાખલ કરવામાં આવેલા અવમાનના કેસ પર મંગળવારે સુપ્રીમ કોર્ટમાં સુનાવણી હાથ ધરવામાં આવી હતી. આ કેસની સુનાવણી દરમિયાન સુપ્રીમ કોર્ટે પતંજલિને જે દવાઓના લાયસન્‍સ સસ્‍પેન્‍ડ કરવામાં આવ્‍યા છે તેને રોકવા અને તેને પરત લાવવા માટે તેના દ્વારા લેવામાં આવેલા પગલાઓ અંગે સોગંદનામું દાખલ કરવા જણાવ્‍યું હતું.

સુપ્રીમ કોર્ટે આ મામલે પતંજલિ પાસેથી ત્રણ સપ્તાહમાં જવાબ માંગ્‍યો છે. પતંજલિ કેસની સુનાવણી દરમિયાન આચાર્ય બાલકૃષ્‍ણ અને બાબા રામદેવ બંને કોર્ટમાં હાજર હતા. આ પછી સુપ્રીમ કોર્ટે કહ્યું કે અમારો હેતુ માત્ર એટલો જ છે કે લોકો સતર્ક રહે. લોકોને બાબા રામદેવમાં વિશ્વાસ છે. તેણે તેનો સકારાત્‍મક ઉપયોગ કરવો જોઈએ. બાબા રામદેવે પણ વિશ્વભરમાં યોગના પ્રચારમાં યોગદાન આપ્‍યું છે. આ પછી બાબા રામદેવે સુપ્રીમ કોર્ટની બેંચનો આભાર માન્‍યો અને સલામ કરી, જેના પર જસ્‍ટિસ અમાનુલ્લાહે કહ્યું કે અમે પણ તેમને સલામ કરીએ છીએ.

આ સાથે જ સુપ્રીમ કોર્ટે IMA પ્રમુખ અશોકનને ફટકાર લગાવતા કહ્યું કે, ‘તમે આવા શબ્‍દોનો ઉપયોગ કેમ કર્યો? તે ખૂબ જ દુર્ભાગ્‍યપૂર્ણ છે કે તમે તે જ કર્યું જે અન્‍ય પક્ષે કર્યું. તમે જાણતા હતા કે તમે શું કરી રહ્યા છો. તમે તમારા પલંગ પર બેઠેલા કોર્ટ વિશે કંઈ કહી શકતા નથી. આ કેસમાં તમે પક્ષકાર હોવા છતાં પણ અમે તમારી એફિડેવિટથી સંતુષ્ટ નથી. આ ખૂબ જ દુર્ભાગ્‍યપૂર્ણ છે. ' આ પછી, કોર્ટમાં હાજર IMA પ્રમુખે તેમના ઇન્‍ટરવ્‍યુ અંગે સુપ્રીમ કોર્ટમાં બિનશરતી માફી માંગી.

સુપ્રીમ કોર્ટે વધુમાં કહ્યું કે તમે IMAના પ્રમુખ છો અને ૩ લાખ ૫૦ હજાર ડોક્‍ટર IMAના સભ્‍ય છે. તમે લોકો પર તમારી છાપ કેવી રીતે છોડવા માંગો છો? તમે જાહેરમાં માફી કેમ ન માગી? તમે પેપરમાં માફીપત્ર કેમ ન છાપ્‍યું? તમે એક જવાબદાર વ્‍યક્‍તિ છો. તમારે જવાબ આપવો પડશે. તમે ૨ અઠવાડિયામાં કંઈ કર્યું નથી. અમે તમારી પાસેથી જાણવા માંગીએ છીએ કે તમે આપેલા ઇન્‍ટરવ્‍યુ પછી તમે શું કર્યું.

સુપ્રીમ કોર્ટે IMA પ્રમુખને આગળ કહ્યું, ‘તમે પક્ષમાં હોવા છતાં પેન્‍ડિંગ કેસ વિશે તમે જે કહ્યું તે અમને અત્‍યંત આઘાતજનક લાગ્‍યું. તમે દેશના નાગરિક છો. શું દેશના ન્‍યાયાધીશો તેમના નિર્ણયોની ટીકા સહન કરતા નથી? પણ આપણે કશું બોલતા નથી કારણ કે આપણામાં અહંકાર નથી. આ પછી સુપ્રીમ કોર્ટે IMA પ્રમુખની માફી નકારી કાઢી અને કહ્યું કે અમે સંતુષ્ટ નથી.

(3:03 PM IST)