મોદીની શપથવિધિ માટે ૭૦૦૦ નિમંત્રણ : પાડોસી દેશોના દિગ્ગજો હાજર રહેશે : કાલે સાંજે યોજાશે સમારોહ
પાડોસી દેશોના ૭ રાષ્ટ્રાધ્યક્ષો ઉપસ્થિત રહેશે : રાષ્ટ્રપતિ દ્વારા ડીનર પાર્ટી
નવી દિલ્હી તા. ૮ : નરેન્દ્ર મોદી રવિવારે સતત ત્રીજી વખત વડાપ્રધાન તરીકે શપથ લેવા જઈ રહ્યા છે. આ સમારોહને ભવ્ય બનાવવા માટે સંપૂર્ણ તૈયારીઓ ચાલી રહી છે. આ માટે ૭ પાડોશી દેશોના રાષ્ટ્રાધ્યક્ષોને આમંત્રણ આપવામાં આવ્યું છે. બાંગ્લાદેશના વડા પ્રધાન શેખ હસીના અને માલદીવના પ્રમુખ મોહમ્મદ મુઇઝુ સહિત પડોશી અને સાત હિંદ મહાસાગર ક્ષેત્રના દેશોના નેતાઓ ૯ જૂને શપથ ગ્રહણ સમારોહમાં હાજરી આપશે. વિદેશ મંત્રાલયે શનિવારે એક નિવેદનમાં જણાવ્યું હતું કે મોદીના શપથ ગ્રહણ સમારોહમાં હાજરી આપવા માટે આ નેતાઓની મુલાકાત ભારત દ્વારા તેની ‘નેબરહુડ ફર્સ્ટ' નીતિના ભાગ રૂપે હાથ ધરવામાં આવી છે. નરેન્દ્ર મોદીના શપથ ગ્રહણ સમારોહમાં ૭૦૦૦ લોકોને આમંત્રણ આપવામાં આવ્યું છે. તેમજ શપથ ગ્રહણ સમારોહમાં ૭ દેશોના નેતાઓને આમંત્રણ આપવામાં આવ્યું. છે.મોદી આવતીકાલે એટલે કે રવિવારે સાંજે ૭.૧૫ કલાકે શપથ લેશે. પીએમના શપથ ગ્રહણ માટેના આમંત્રણની તસવીર સામે આવી છે. શપથ ગ્રહણ સમારોહ માટે રાષ્ટ્રીય રાજધાનીને છાવણીમાં ફેરવી દેવામાં આવી છે. દરેક જગ્યાએ કડક સુરક્ષા વ્યવસ્થા કરવામાં આવી છે. દિલ્હીને નો ફલાઈંગ ઝોન જાહેર કરવામાં આવ્યું છે. ઉડતા ડ્રોન અને પેરાગ્લાઈડિંગ પર પ્રતિબંધ મુકવામાં આવ્યો છે. દિલ્હીમાં ૯-૧૦ જૂન સુધી કલમ ૧૪૪ લાગુ રહેશે. રાષ્ટ્રપતિ ભવનની સુરક્ષા માટે અર્ધલશ્કરી દળોની ૫ કંપનીઓ તૈનાત કરવામાં આવશે. એનએસજી કમાન્ડો, ડ્રોન અને સ્નાઈપર્સ તૈનાત રહેશે.
આ સમારોહમાં શેખ હસીના અને મુઇઝુ ઉપરાંત, શ્રીલંકાના રાષ્ટ્રપતિ રાનિલ વિક્રમસિંઘે, સેશેલ્સના ઉપરાષ્ટ્રપતિ અહેમદ અફિફ, મોરેશિયસના વડા પ્રધાન પ્રવિંદ કુમાર જુગનાથ, નેપાળના વડા પ્રધાન પુષ્પા કમલ દહલ અને ભૂટાનના વડા પ્રધાન શેરિંગ તોબગેનો સમાવેશ થાય છે. નિવેદનમાં કહેવામાં આવ્યું છે કે શપથ ગ્રહણ સમારોહમાં હાજરી આપવા ઉપરાંત, આ નેતાઓ રવિવારે સાંજે રાષ્ટ્રપતિ ભવનમાં રાષ્ટ્રપતિ દ્રૌપદી મુર્મુ દ્વારા આયોજિત ભોજન સમારંભમાં પણ હાજરી આપશે.
આ પછી રાષ્ટ્રપતિએ તેમને રવિવારે સરકાર બનાવવા માટે આમંત્રણ આપ્યું હતું. મોદીના શપથ ગ્રહણ સમારોહમાં અનેક દેશોના રાષ્ટ્રાધ્યક્ષો હાજરી આપશે. આને લઈને દિલ્હીમાં કડક સુરક્ષા વ્યવસ્થા કરવામાં આવી છે. દિલ્હીને નો ફલાઈંગ ઝોન જાહેર કરવામાં આવ્યું છે. દરેક ખૂણે-ખૂણે પોલીસ બંદોબસ્ત રહેશે. રાષ્ટ્રપતિ ભવનની સુરક્ષા ખૂબ જ કડક કરવામાં આવી છે.
આ વખતે લોકસભા ચૂંટણીના પરિણામોમાં ભાજપ બહુમતી મેળવી શકી નથી. જોકે એનડીએને બહુમતી મળી હતી. એનડીએને ૨૯૩ બેઠકો મળી હતી. જેમાંથી ભાજપને ૨૪૦ બેઠકો મળી હતી. બીજી તરફ ઈન્ડિયા એલાયન્સને ૨૩૪ સીટો મળી છે. જેમાં કોંગ્રેસે ૯૯ સીટો જીતી હતી.
આમંત્રિતોની યાદીમાં મુઇઝુનો સમાવેશ એક આﾍર્યજનક પગલું હતું. ગયા વર્ષે તેમની ચૂંટણી બાદથી ભારત અને માલદીવ વચ્ચેના સંબંધો વણસેલા છે. મુઇઝુએ માલદીવને ચીનની નજીક લાવવા માટે અનેક પગલાં લીધાં છે. ભારતે ૮૫ થી વધુ સૈન્ય કર્મચારીઓને પાછા ખેંચવાની ફરજ પડી હતી. તેમણે તુર્કી અને ચીન સાથે ખાદ્ય ચીજવસ્તુઓ અને સંરક્ષણ સાધનોની સપ્લાય માટે પણ કરાર કર્યા છે. તેમણે ભારત પર નિર્ભરતા ઘટાડવાનો પ્રયાસ કર્યો છે.
અત્યારે એ સ્પષ્ટ નથી કે પીએમ મોદી ભારતની મુલાકાતે આવેલા આ નેતાઓ સાથે અલગ-અલગ દ્વિપક્ષીય બેઠક કરશે કે નહીં. બાંગ્લાદેશના વડાપ્રધાન અને સેશેલ્સના રાષ્ટ્રપતિ શનિવારે નવી દિલ્હી પહોંચવાના છે. અન્ય તમામ નેતાઓ રવિવારે જ આવશે. નેપાળના વડાપ્રધાન શપથ ગ્રહણ સમારોહના લગભગ ચાર કલાક પહેલા નવી દિલ્હી પહોંચશે.
(3:02 PM IST)
છેલ્લા 8 દિવસમાં સૌથી લોકપ્રિય 
