નવી દિલ્હી તા.૮ :   રાજસ્થાન સરકારે ખેડૂતો માટે મોટી જાહેરાત કરી છે. મુખ્યમંત્રી ભજનલાલ શર્માએ કિસાન સન્માન નિધિમાં 2000 રૂપિયાનો વધારો કરવાની જાહેરાત કરી છે. હવે રાજસ્થાનમાં કિસાન સન્માન નિધિ તરીકે 8000 રૂપિયા આપવામાં આવશે. મુખ્યમંત્રીએ કહ્યું કે અમે જે વચનો આપ્યા હતા તે હવે પૂરા થઈ રહ્યા છે. નરેન્દ્ર મોદી ત્રીજી વખત વડાપ્રધાન બનવાના એક દિવસ પહેલા આ મોટી જાહેરાત કરવામાં આવી છે . એનડીએને બહુમતી મળ્યા બાદ, શુક્રવારે નરેન્દ્ર મોદીને આગામી સરકાર બનાવવા માટે ગઠબંધનના તમામ પક્ષોનું સમર્થન મળ્યું. નરેન્દ્ર મોદી રવિવારે ત્રીજી વખત દેશના વડાપ્રધાન બનવા જઈ રહ્યા છે.

મુખ્યમંત્રી ભજનલાલ શર્માએ સોશિયલ મીડિયા પ્લેટફોર્મ પર લખ્યું તેના કારણે ખેડૂતો માટે કેન્દ્ર સરકારની વાર્ષિક રકમ 6 હજાર રૂપિયાથી વધીને 8 હજાર રૂપિયા થઈ ગઈ છે. મુખ્યમંત્રીએ કહ્યું કે તેમણે ખેડૂતોના હિતમાં આ નિર્ણય લીધો છે. આ વધારાના પૈસાથી ખેડૂતોને ટેકો મળશે. તેમણે કહ્યું કે સરકાર ખેડૂતોને આગળ વધારવા માટે મિશન મોડમાં કામ કરી રહી છે.

વાવણીની મોસમ શરૂ થાય તે પહેલા લેવાયેલ નિર્ણય 

વાવણીની મોસમ શરૂ થાય તે પહેલા લેવાયેલા આ નિર્ણયથી ખેડૂતોમાં ખુશીની લહેર જોવા મળી રહી છે. ચોમાસું આવતાની સાથે જ સમગ્ર દેશમાં વાવણી શરૂ થઈ જશે. રાજ્યના ઘણા ખેડૂતોએ કહ્યું કે આ રકમથી તેમના માટે બિયારણ અને ખાતર ખરીદવામાં સરળતા રહેશે.