મુંબઈ : ટી20 વર્લ્ડ કપ 2024 માં રવિવારે બે કટ્ટર હરીફ ભારત અને પાકિસ્તાન આમને સામને ટકરાશે. ન્યૂયોર્કના નાસાઉ કાઉન્ટી ઇન્ટરનેશનલ ક્રિકેટ સ્ટેડિયમ ખાતે ભારત તેની ગ્રુપ એની બીજી મેચમાં પાકિસ્તાન સામે ટકરાશે.

IND vs PAK ટી20 વર્લ્ડ કપ 2024 ની આ મેચ ભારતીય સમય મુજબ રાતે 8 વાગે શરુ થવાની છે. ભારતમાં લાઇવ સ્ટ્રીમિંગ અને લાઇવ ટેલિકાસ્ટ જોઇ શકાશે.ડિઝની હોટ સ્ટાર પર આ મેચ લાઇવ જોઇ શકાશે.

ભારત અને પાકિસ્તાન વચ્ચેની આ મેચને લઇને ક્રિકેટ રસિકોમાં ભારે ઇંતેજારી છે. ભારત અને પાકિસ્તાન મેચ હંમેશાની જોઇ હાઇ પ્રોફાઇલ બનશે. ભારત અને પાકિસ્તાન બંને ટી20 વર્લ્ડ કપ વિજેતા ટીમો છે.

ભારતે 2007 માં પ્રથમ ટી20 વર્લ્ડ કપ ફાઇનલ મેચમાં પાકિસ્તાનને હરાવી ભારત ચેમ્પિયન બન્યું હતું. જ્યારે પાકિસ્તાન 2009 માં ચેમ્પિયન બન્યું હતું. ત્યાર બાદ બંને ટીમો એકેય વાર ચેમ્પિયન બની શકી નથી.

કેપ્ટન રોહિત શર્માના નેતૃત્વમાં ટીમ ઇન્ડિયા આ વખતે ટી20 વર્લ્ડ કપ 2024 જીતવા હોટ ફેવરીટ મનાય છે. ગ્રુપ એની પ્રથમ મેચમાં ટીમ ઇન્ડિયાએ આયર્લેન્ડને આસાનીથી આઠ વિકેટથી હરાવી પોતાનો દબદબો યથાવત રાખ્યો છે. જ્યારે પાકિસ્તાન ગ્રુપ એની પ્રથમ મેચમાં યુએસએ સામે હાર્યું હતું.

આત્મ વિશ્વાસ સાથે આગળ વધી રહેલ ભારત પાકિસ્તાન સામે જીતવા મક્કમ છે તો આયર્લેન્ડ સામેની પ્રથમ મેચ હારી ગયેલું પાકિસ્તાન ભારત સામે જીતી ગુમાવેલો પોતાનો આત્મ વિશ્વાસ પરત લાવવા પ્રયાસ કરશે.

ટી20 વર્લ્ડ કપ મેચમાં ભારત વિ પાકિસ્તાન મેચની વાત કરીએ તો વિરાટ કોહલી સૌથી બેસ્ટ બેટર છે. વિરાટ કોહલીએ પાકિસ્તાન સામે 5 ઇનિંગમાં 308 રન બનાવ્યા છે.

ભારત અને પાકિસ્તાન વચ્ચે ટી20 ઇન્ટરનેશનલ 12 મેચ રમાઇ છે. IND vs PAK મેચમાં ભારતનું પલડું ભારે રહ્યું છે. ભારતે 8 મેચ જીતી છે અને પાકિસ્તાન માત્ર 3 મેચ જ જીતી શક્યું છે. બંને વચ્ચે એક મેચ ટાઇ થયેલી છે. ટી20 વિશ્વ કપ રેકોર્ડ જોઇએ તો ભારત વિ પાકિસ્તાન 7 મેચ રમાઇ છે. જેમાં ભારત 5 મેચ જીત્યું છે અને પાકિસ્તાન માત્ર એક જ મેચ જીતી શક્યું છે. જ્યારે એક મેચ ટાઇ થઇ છે.

આજે ન્યૂયોર્ક ખાતે રમાનાર ભારત વિ પાકિસ્તાન વચ્ચેની ટી20 મેચ ડીઝની હોટસ્ટાર પર લાઇવ સ્ટ્રીમ કરવામાં આવશે. ટી20 વર્લ્ડ કપ મેચનું જીવંત પ્રસારણ ભારતમાં સ્ટાર સ્પોર્ટ્સ અને ડીડી સ્પોર્ટ્સ પર જોઇ શકાશે. ભારતીય સમય મુજબ રાતે 8 વાગે મેચ શરુ થશે.