નવી દિલ્હી :બિહાર LJPRના વડા અને જાણીતા રાજકારણી સ્વર્ગસ્થ રામવિલાસ પાસવાનના પુત્ર ચિરાગ પાસવાનને મોદી 3.0ની કેબિનેટમાં સ્થાન મળ્યું છે. તેમણે પદના શપથ લઈને મંત્રી તરીકે ડેબ્યુ કર્યું છે. આ વખતે તેમની પાર્ટીએ ચૂંટણીમાં સારું પ્રદર્શન કર્યું. બિહારમાં NDAએ LJPRને 5 સીટો આપી હતી. ચિરાગની પાર્ટીએ પાંચેય બેઠકો જીતી હતી. પરિણામ આવ્યા બાદ ચિરાગે ભાજપને બિનશરતી સમર્થન જાહેર કર્યું હતું.

  લોક જનશક્તિ પાર્ટી (રામ વિલાસ)ના વડા ચિરાગ પાસવાને 2024માં હાજીપુર બેઠક પરથી ચૂંટણી જીતીને આ વખતે જીતની હેટ્રિક બનાવી છે. તેમજ બિહારની આ ચૂંટણીમાં તેમની પાર્ટીએ શ્રેષ્ઠ પ્રદર્શન કર્યું હતું. ચિરાગ પાસવાન અગાઉ જમુઈથી લોકસભા ચૂંટણી જીતી ચૂક્યા છે. આ વખતે તેમની પાર્ટીના અરુણ ભારતીએ ત્યાંથી ચૂંટણી લડી હતી અને જીત પણ મેળવી હતી

  ચિરાગ પાસવાનના પિતા રામવિલાસ પાસવાન દેશની કેટલીક રાજકીય હસ્તીઓમાંથી એક હતા. તેઓ તેમની રાજકીય કારકિર્દીમાં 11 વખત લોકસભા ચૂંટણી લડ્યા અને 9 વખત જીત્યા. રામવિલાસ પાસવાને છ વડાપ્રધાનો સાથે કામ કર્યું હતું. પાંચ વખત કેન્દ્રમાં મંત્રી બન્યા અને ત્રણ વખત પીએમ તરીકે મંત્રીપદ સંભાળ્યું. આવા શક્તિશાળી નેતાના પુત્ર ચિરાગ પાસવાન પ્રથમ વખત કેન્દ્રમાં મંત્રી બની રહ્યા છે. તેઓ અત્યાર સુધીમાં ત્રણ વખત સંસદીય ચૂંટણી જીતી ચૂક્યા છે, પરંતુ આજ સુધી મંત્રી બની શક્યા નથી. આ વખતે નરેન્દ્ર મોદીએ તેમનામાં વિશ્વાસ વ્યક્ત કર્યો છે. 

    રાજકારણમાં આવતા પહેલા ચિરાગ પાસવાન બોલિવૂડમાં અભિનેતા હતા. હાલમાં તેઓ લોક જનશક્તિ પાર્ટી (રામવિલાસ)ના પ્રમુખ છે. ચિરાગ દિવંગત સાંસદ અને કેન્દ્રીય મંત્રી રામવિલાસ પાસવાનનો પુત્ર છે. 2019 સુધી,તેમણે બિહારના જમુઈ લોકસભા મતવિસ્તારનું પ્રતિનિધિત્વ કર્યું. તેઓ 2024ની લોકસભા ચૂંટણીમાં બિહારની હાજીપુર બેઠક પરથી જીત્યા હતા. તેમના પિતા રામવિલાસ પાસવાન આ બેઠક પરથી લોકસભા ચૂંટણી લડ્યા હતા.   

    ચિરાગનો જન્મ 31 ઓક્ટોબર 1982ના રોજ દિલ્હીમાં થયો હતો. તેણે એન્જિનિયરિંગમાં ગ્રેજ્યુએશન કર્યું છે. તેણે 2011માં કંગના રનૌત સાથે હિન્દી ફિલ્મ મિલે ના મિલે હમમાં અભિનય કર્યો હતો. ફિલ્મોમાં નસીબ અજમાવ્યા પછી, તેમણે બિહારના રાજકારણમાં પ્રવેશ કર્યો અને જમુઈ બેઠક પરથી લોક જનશક્તિ પાર્ટી માટે 2014ની ચૂંટણી લડી. અહીં તેઓ તેમના નજીકના પ્રતિસ્પર્ધી રાષ્ટ્રીય જનતા દળના સુધાંશુ શેખર ભાસ્કરને 85,000થી વધુ મતોથી હરાવીને પ્રથમ વખત લોકસભામાં પહોંચ્યા હતા.

  ચિરાગે પહેલીવાર જમુઈથી લોકસભા ચૂંટણી જીતી હતી. આ પછી ચિરાગ પાસવાને 2019ની ચૂંટણીમાં પણ પોતાની સીટ જાળવી રાખી હતી. 2019ની સામાન્ય ચૂંટણીમાં કુલ 528,771 મતો મેળવીને તેમના નજીકના હરીફ ભૂદેવ ચૌધરીને હરાવ્યા. જ્યારે ચિરાગ પાસવાન 2014માં જમુઈ મતવિસ્તારમાંથી ચૂંટણી લડ્યા હતા, ત્યારે તેમના પિતા રામવિલાસ પાસવાન હાજીપુર મતવિસ્તારમાંથી લોક જનશક્તિ પાર્ટી દ્વારા જીત્યા હતા.

  રામવિલાસ પાસવાનના મૃત્યુ પછી, 14 જૂન, 2021ના રોજ, પશુપતિ કુમાર પારસે તેમના ભત્રીજા ચિરાગ પાસવાનના સ્થાને પોતાને એલજેપીના લોકસભાના નેતા જાહેર કર્યા. એક દિવસ પછી, ચિરાગે તેના કાકા પશુપતિ કુમાર પારસ અને પિતરાઈ ભાઈ પ્રિન્સ રાજ સહિત પાંચ બળવાખોર સાંસદોને પક્ષ વિરોધી પ્રવૃત્તિઓ માટે હાંકી કાઢ્યા. આ પછી લોક જનશક્તિ પાર્ટી બે ભાગમાં વહેંચાઈ ગઈ અને 2024 સુધી બંને પોતાને રામવિલાસ પાસવાનના અસલી વારસદાર તરીકે સ્થાપિત કરવાનો પ્રયાસ કરતા રહ્યા. 

   2024ની સામાન્ય ચૂંટણી પહેલા પણ પશુપતિ પારસ અને ચિરાગ પાસવાન બંને હાજીપુર બેઠક પરથી ચૂંટણી લડવાનો દાવો કરી રહ્યા હતા. એનડીએમાં કાકા-ભત્રીજા બંનેના પક્ષ સામેલ હતા. આવી સ્થિતિમાં, ઘણા પ્રયત્નો પછી, 18મી લોકસભા ચૂંટણી પહેલા બંને વચ્ચેની મડાગાંઠ સમાપ્ત થઈ ગઈ અને NDAએ બિહારમાં ચિરાગ પાસવાનની પાર્ટીને 5 સીટો આપી, જેના પર ચિરાગ પાસવાનની જીત થઈ