તા. ૧૭ નવેમ્બર ર૦ર૬ વિક્રમ સંવત ર૦૮૩ કારતક સુદ – ૮ મંગળવાર
News of Monday, 10th June 2024
ચંદ્રબાબુ નાયડુ પરિવારને હાલમાં રોજના સેંકડો કરોડ રૃપિયાનો નફો
કેન્દ્રમાં તેમના ટેકાથી સરકાર બની હોવાથી રાજકીય વજન વધ્યું:હેરિટેજ ફૂડ્સ કંપનીનો શેર ૧૨ દિવસમાં ડબલ થઈ જવાના કારણે નાયડુ પરિવારને ૧૨૦૦ કરોડ કરતા વધારે કમાણી થઈ ે

હૈદરાબાદ, તા.૧૦
લોકસભાની ચૂંટણીના પરિણામો આવ્યા ત્યારથી ટીડીપીના વડા ચંદ્રબાબુ નાયડુનું રાજકીય વજન વધી ગયું છે. નાયડુની સાથે સાથે તેમના પરિવારને પણ મોટો આર્થિક ફાયદો થયો છે. હેરિટેજ ફૂડ્સ નામની કંપનીમાં ચંદ્રબાબુ નાયડુ, તેમના પત્ની ભુવનેશ્વરી અને ફેમિલીના બીજા સભ્યો મોટો હિસ્સો ધરાવે છે અને આ કંપનીમાં તેમને ૧૨ દિવસની અંદર ૧૨૨૫ કરોડ રૃપિયાનો ફાયદો થયો છે. એક્ઝિટ પોલ આવ્યા ત્યારથી અત્યાર સુધીમાં હેરિટેજ ફૂડ્સનો શેર ૧૦૦ ટકા વધી ગયો છે જેના કારણે ચંદ્રબાબુ નાયડુના પત્નીની એસેટ્સ ડબલ થઈ ગઈ છે. ભુવનેશ્વરીને માત્ર પાંચ દિવસની અંદર ૫૮૦ કરોડનો ફાયદો થયો હતો. ત્યાર પછી પણ શેર એટલો વધ્યો કે હવે તેઓ અબજોપતિ થઈ ગયા છે.
૨૩ મેના દિવસે હેરિજેટ ફૂડ્સનો શેર ૩૫૪ રૃપિયાા સ્તરે હતો. ત્યાર પછી ત્રીજી જૂનથી લઈને ૧૦ જૂન સુધી તેમાં સળંગ તેજી જોવા મળી છે. આજે આ શેર બોમ્બે સ્ટોક એક્સ્ચેન્જ પર ૭૨૮ રૃપિયાના લેવલે પહોંચી ગયો છે. હેરિટેજ ફૂડ્સમાં નાયડુ પરિવાર ૩૫.૭૦ ટકા હિસ્સો ધરાવે છે. ચંદ્રબાબુના પત્ની એન. ભુવનેશ્વરી એકલા પાસે ૨૪ ટકાથી વધારે સ્ટેક છે.
ચંદ્રબાબુ નાયડુનો પરિવાર આમ તો ઘણા બિઝનેસમાં હાજરી ધરાવે છે, પરંતુ હેરિટેજ ફૂડ્સ કંપનીમાં તેમનો હિસ્સો સૌથી મોટો છે અને આ શેર ૧૨ દિવસમાં ૧૦૫ ટકા વધી ગયો છે. ચંદ્રબાબુ નાયડુનો પરિવાર આ કંપનીમાં ૩ કરોડ ૩૧ લાખ ૩૬ હજાર શેર ધરાવે છે. નાયડુનો પુત્ર એન. લોકેશ આ કંપનીના પ્રમોટર છે અને ૧૦.૮૨ ટકા હિસ્સો ધરાવે છે. આ ઉપરાંત ચંદ્રબાબુના પત્ની એ. ભુવનેશ્વરી પાસે આ કંપનીમાં ૨૪.૩૭ ટકા હિસ્સો અને પૌત્રી દેવાંશ નારા પાસે ૦.૦૬ ટકા હિસ્સો છે. તેવી જ રીતે તેમની પુત્રવધુ એન. બ્રહ્માણી પણ હેરિટેજ ફૂડ્સમાં ૦.૪૬ ટકા હિસ્સો ધરાવે છે.
હેરિટેજ ફૂડ્સનો શેર વધ્યો તેના કારણે ભુવનેશ્વરી નારાની સંપત્તિ હવે ૧૬૩૧ કરોડ રૃપિયા થઈ ગઈ છે જ્યારે તેમના પુત્ર લોકેશની સંપત્તિ ૭૨૪ કરોડ રૃપિયા કરતા વધુ છે. હેરિટેજ ફૂડ્સમાં આખા પરિવારના હિસ્સાની વેલ્યૂ વધીને ૨૩૯૧ કરોડ રૃપિયા થઈ ગઈ છે.
ચંદ્રબાબુ નાયડુએ વિધાનસભાની ચૂંટણીમાં જોરદાર દેખાવ કરીને જગન મોહન રેડ્ડીને હરાવ્યા છે અને હવે ચોથી વખત આંધ્રના મુખ્યમંત્રી બનવા જઈ રહ્યા છે. તેના કારણે હેરિટેજ ફૂડ્સનો શેર ટોપ ગિયરમાં છે. હેરિટેજ ફૂડ્સ એ ભારતની અગ્રણી વેલ્યૂ એડેડ અને બ્રાન્ડેડ ડેરી પ્રોડક્ટ્સ કંપની છે અન તે પોતાની પેટાકંપની હેરિટેજ ન્યુટ્રીવેટ લિમિટેડ મારફત પશુચારાના ફિલ્ડમાં કામ કરે છે. હેરિટેજ ફૂડ્સ એટલી મોટી કંપની છે કે દેશના ૧૧ રાજ્યોમાં હાજરી ધરાવે છે અને ૧૫ લાખ ગ્રાહકો સુધી પહોંચે છે. ચંદ્રબાબુ નાયડુને આ રાજકીય વારસો તેમના સસરા એન.ટી.આર પાસેથી મળ્યો હતો જેને તેમણે આગળ વધાર્યો છે.
ચંદ્રબાબુ નાયડુના ટેકાથી જ અત્યારે મોદી સરકાર પણ બની ગઈ છે જેમાં તેમના બે મંત્રીઓને સામેલ કરવામાં આવ્યા છે. ભૂતકાળમાં મોદી અને ચંદ્રબાબુ વચ્ચે રાજકીય મામલે ટક્કર થઈ હતી. પરંતુ અત્યારે બંને એકબીજાને વખાણે છે અને મોટા નેતા તરીકે બોલાવે છે. નરેન્દ્ર મોદીએ ગઈકાલે સતત ત્રીજી વખત ભારતના વડાપ્રધાન તરીકે શપથ લીધા હતા.
રાજકીય સ્થિરતા આવવાની સાથે શેરબજારમાં પણ તેજી જળવાઈ રહી છે. એક્ઝિટ પોલના દિવસે સેન્સેક્સ ૨૦૦૦ પોઈન્ટ કરતા વધારે વધ્યા પછી રિઝલ્ટના દિવસે ૪૩૦૦ પોઈન્ટનો ઘટાડો થયો હતો. પરંતુ એનડીએને આસાનીથી બહુમતી મળી જવાના કારણે બજાર એક્ઝિટ પોલ અગાઉના સ્તરથી ઉપર આવી ગયું છે.
(7:46 PM IST)









છેલ્લા 8 દિવસમાં સૌથી લોકપ્રિય 
