નવી દિલ્હી :મોદી સતત ત્રીજી વખત વડાપ્રધાન બન્યા બાદ તેમની પ્રથમ સત્તાવાર દ્વિપક્ષીય મુલાકાતના ભાગરૂપે આ મહિનાના અંત સુધીમાં ઢાકાની મુલાકાત લે તેવી શક્યતા છે. પીએમ મોદીએ 9 જૂને એક ભવ્ય સમારોહમાં વડાપ્રધાન તરીકે શપથ લીધા હતા, જેમાં પડોશી અને હિંદ મહાસાગરના દેશોના ઘણા વરિષ્ઠ નેતાઓએ હાજરી આપી હતી. પીએમ મોદી સાથેની મુલાકાત દરમિયાન બાંગ્લાદેશના વડા પ્રધાન શેખ હસીનાએ તેમને દ્વિપક્ષીય બેઠક માટે તેમના દેશની મુલાકાત લેવા આમંત્રણ આપ્યું હતું.

 સૂત્રોએ  જણાવ્યું કે ઢાકા ઈચ્છે છે કે પીએમ નરેન્દ્ર મોદી તેમની પ્રથમ સત્તાવાર વિદેશ યાત્રામાં બાંગ્લાદેશની મુલાકાત લે, જેમ કે તેમણે 2015માં કરી હતી. સૂત્રોના જણાવ્યા અનુસાર, બાંગ્લાદેશે પીએમ હસીનાની ચીનની મુલાકાત પહેલા પીએમ મોદીની "વહેલી ઉપલબ્ધતા"ની માંગ કરી છે, જેની પુષ્ટિ થોડા મહિના પહેલા કરવામાં આવી છે. ઢાકા હવે દ્વિપક્ષીય વાટાઘાટોને આગલા સ્તર પર લઈ જઈ રહ્યું છે. 

 દરમિયાન બાંગ્લાદેશના વિદેશ મંત્રી હસન મહમૂદે કહ્યું કે, "અમે ભારત સાથે વેપાર અને કનેક્ટિવિટી સંબંધો વધારવાની આશા રાખીએ છીએ. તેમણે વધુમાં કહ્યું કે અમે ભારતના 'બોર્ડર હાટ' દ્વારા માલસામાનની હેરફેરને સુધારવા માટે પગલાં લીધાં છે. ઘણું બધું થઈ ચૂક્યું છે, તેથી અમે ઈચ્છીએ છીએ કે પીએમ મોદી જલ્દી ઢાકાની મુલાકાત લે.

દરમિયાન, બાંગ્લાદેશના વડા પ્રધાન શેખ હસીના સોમવારે વડા પ્રધાન મોદીને મળ્યા હતા અને સત્તાવાર આમંત્રણ આપ્યું હતું, અને દ્વિપક્ષીય સંબંધોની પ્રગતિ માટેની યોજનાઓની પુષ્ટિ પણ કરી હતી. તેમની સાથે તેમની પુત્રી સાયમા વાજેદ પણ હાજર હતી, જેઓ વર્લ્ડ હેલ્થ ઓર્ગેનાઈઝેશનના દક્ષિણ એશિયાના વડા પણ છે.

  બીજી તરફ, બાંગ્લાદેશની સત્તાધારી પાર્ટી અવામી લીગે એક નિવેદનમાં જણાવ્યું હતું કે વડા પ્રધાન શેખ હસીના અને તેમના ભારતીય સમકક્ષ મોદીએ બાંગ્લાદેશ અને ભારત વચ્ચેના દ્વિપક્ષીય સંબંધોને વધુ ગાઢ બનાવવાની ઈચ્છા વ્યક્ત કરી છે. જ્યાં રવિવારે (9 જૂન) સાંજે મોદી કેબિનેટના શપથ ગ્રહણ સમારોહ પછી બંને વડા પ્રધાનો વચ્ચેની ખાનગી વાતચીત દરમિયાન આ અપેક્ષાઓ શેર કરવામાં આવી હતી.