નવી દિલ્હી :વડાપ્રધાન મોદી સતત ત્રીજી વખત કાર્યભાર સંભાળ્યા બાદ તેમની પ્રથમ વિદેશ યાત્રા માટે બુધવારે ઇટાલી જવા રવાના થયા છે. પીએમ મોદી ઈટાલીમાં યોજાનારી G7 સમિટમાં ભાગ લેશે. જી 7 સમિટ 13થી 15 જૂન દરમિયાન ઇટાલીના અપુલિયા પ્રદેશના લક્ઝરી રિસોર્ટ બોર્ગો એગ્નાઝિયા ખાતે યોજાશે. વડાપ્રધાન મોદી ઈટાલીના વડાંપ્રધાન જ્યોર્જિયા મેલોનીના આમંત્રણ પર 14મી જૂને જી7 આઉટરીચ સમિટમાં ભાગ લેશે. સમિટ દરમિયાન બંને નેતાઓ વચ્ચે દ્વિપક્ષીય બેઠક થશે.

G7 બેઠકમાં યુક્રેન અને ગાઝા યુદ્ધ પર ચર્ચા થવાની શક્યતા છે. G7 એ વિશ્વની સાત મુખ્ય અર્થવ્યવસ્થાઓનું એક ગ્રૂપ છે, જેમાં અમેરિકા, બ્રિટન, ફ્રાન્સ, ઇટાલી, જર્મની, કેનેડા અને જાપાનનો સમાવેશ થાય છે. સમિટમાં ભાગ લેનારા ટોચના નેતાઓમાં યુએસ પ્રમુખ જો બાઇડન, ફ્રાંસના પ્રમુખ ઈમેન્યુઅલ મેક્રોન, જાપાનના વડા પ્રધાન ફ્યુમિયો કિશિદા અને કેનેડાના વડા પ્રધાન જસ્ટિન ટ્રુડોનો સમાવેશ થાય છે.
ઇટાલીમાં ભારતીય રાજદૂત વાણી રાવે જણાવ્યું હતું કે વડાપ્રધાન મોદી G7 સમિટમાં ઉપસ્થિત અન્ય નેતાઓ સાથે ભારત અને વૈશ્વિક દક્ષિણ માટે મહત્વપૂર્ણ મુદ્દાઓ પર ચર્ચા કરી શકે છે. ઇટાલીના વડાંપ્રધાન જ્યોર્જિયા મેલોનીએ વડાપ્રધાન મોદીને G7 સમિટમાં ભાગ લેવા આમંત્રણ આપ્યું હતું. G7 સમિટમાં ભારતની આ 11મી ભાગીદારી હશે, આ સાથે PM નરેન્દ્ર મોદી સતત પાંચમી વખત G7 સમિટમાં ભાગ લઈ રહ્યા છે.
વિદેશ સચિવ ક્વાત્રાએ કહ્યું કે વડાપ્રધાન મોદી ઈટાલીના પીએમ જ્યોર્જિયા મેલોની સાથે દ્વિપક્ષીય ચર્ચા કરશે. એક વિશેષ બ્રીફિંગને સંબોધતા વિદેશ સચિવ વિનય ક્વાત્રાએ જણાવ્યું હતું કે આ મુલાકાત મહત્વપૂર્ણ છે કારણ કે સતત ત્રીજી મુદત માટે પદ સંભાળ્યા બાદ વડાપ્રધાનની આ પ્રથમ વિદેશ મુલાકાત હશે.

સચિવે કહ્યું કે તે તેમને G7 સમિટમાં ઉપસ્થિત અન્ય વિશ્વ નેતાઓ સાથે ભારત અને ગ્લોબલ સાઉથ માટે મહત્વપૂર્ણ મુદ્દાઓ પર વાતચીત કરવાની તક પણ આપશે. ક્વાત્રાએ કહ્યું કે G7 સમિટના આઉટરીચ સત્રનું ફોકસ આર્ટિફિશિયલ ઈન્ટેલિજન્સ (AI), ઊર્જા, આફ્રિકા અને ભૂમધ્ય સમુદ્ર પર રહેશે. આ દરમિયાન પીએમ મોદી અમેરિકી રાષ્ટ્રપતિ જો બાઇડનને પણ મળી શકે છે.
તેમણે કહ્યું કે G7 સમિટમાં ભારતની ભાગીદારી વૈશ્વિક પડકારોને ઉકેલવા માટે ભારત દ્વારા કરવામાં આવી રહેલા પ્રયાસોની વધતી જતી માન્યતા અને યોગદાનને પ્રતિબિંબિત કરે છે. જેમાં શાંતિ, સુરક્ષા, વિકાસ અને પર્યાવરણ સંરક્ષણનો સમાવેશ થાય છે.

આ G7 સમિટમાં ભારતની સહભાગિતા ખાસ કરીને G20ના ભારતના તાજેતરના પ્રમુખપદના સંદર્ભમાં નોંધપાત્ર છે, જ્યાં ભારતે ઘણા વિવાદાસ્પદ મુદ્દાઓ પર વૈશ્વિક સર્વસંમતિ બનાવવા માટે અગ્રણી ભૂમિકા ભજવી હતી.
ભારતે અત્યાર સુધીમાં વોઈસ ઓફ ધ ગ્લોબલ સાઉથ સમિટના બે સત્રોનું આયોજન કર્યું છે, જેનો ઉદ્દેશ્ય ગ્લોબલ સાઉથના હિતો, પ્રાથમિકતાઓ અને ચિંતાઓને વૈશ્વિક મંચ પર લાવવાનો છે. G7માં પણ અમે ગ્લોબલ સાઉથના મુદ્દાઓને હંમેશા મોખરે રાખ્યા છે.