છોકરીના અન્ડર ગારમેન્ટ્સ ઉતારવા બળાત્કાર નથી
રાજસ્થાન હાઇકોર્ટનો ગજબ ચુકાદો
જયપુર,તા. ૧૪: ભારતમાં રેપ (બળાત્કાર)ની ઘટના સામે હજી પણ ગંભીર ધ્યાન આપવામાં આવતું નથી એવા પુરાવા આપતો ચુકાદો દેશની એક અદાલતે આપી છે. હાલમાં ૩૩ વર્ષ જૂના એક કેસમાં રાજસ્થાન હાઈ કોર્ટે ચુકાદો આપતા કહ્યું કે છોકરીના અને પોતાના કપડા ઉતારીને સંપૂર્ણપણે નગ્ન થવું તેને બળાત્કાર નહીં માનવમાં આવે. અદાલતે આપેલા આવા ચુકાદાથી દેશભરમાં આક્રોશ વ્યક્ત કરવામાં આવી રહ્યો છે.
રાજસ્થાન હાઈ કોર્ટના જસ્ટિસ અનુપ કુમાર ધાંડની બેંચે એક ૩૩ વર્ષ જૂના બળાત્કારના કેસમાં પોતાનો ચુકાદો આપતા જણાવ્યું હતું કે છોકરીના અંડર ગારમેન્ટ્સ ઉતારીને પોતે પણ સંપૂર્ણરીતે નગ્ન થવું તેને બળાત્કાર કરવાનો પ્રયત્ન નહીં માની શકાય. આવું કરવાની ક્રિયાને પીઆઇસીની કલમ ૩૭૬ અને ૫૧૧ હેઠળ સજા આપી શકાય નહીં. જો કે આવી ઘટનામાં આરોપી સામે કલમ ૩૫૪ હેઠળ સ્ત્રીની નમ્રતાને ઠેસ પહોંચાડવાના ઈરાદાથી હુમલો કરવો તે અંગે સજા ફટકારી શકાય છે.
ચુકાદો આપતી વખતે, જસ્ટિસ અનુપ કુમાર ધાંડે સિત્તુ વર્સેસ રાજસ્થાન સ્ટેટ કેસનો ઉલ્લેખ કર્યો હતો. સિત્તુ વર્સેસ રાજસ્થાન સ્ટેટ કેસમાં આરોપીએ બળજબરીપૂર્વક એક છોકરીના કપડા ઉતાર્યા અને તે બાદ છોકરીના વિરોધ છતાં તેની સાથે શારીરિક સંબંધ બનાવવાનો પ્રયાસ કર્યો હતો. જો કે આ કેસમાં આરોપી સામે બળાત્કાર કરવાનો પ્રયાસ હેઠળ ગુનો દાખલ કરી તેને સજા ફટકારવામાં આવી હતી. આ પહેલા પણ દામોદર બેહરા વર્સેસ ઓડિશા કેસમાં પણ સમાન ઘટના બની હતી.
દામોદર બેહરા વર્સેસ ઓડિશા કેસમાં આરોપીએ એક મહિલાની સાડી ઉતારી દીધી હતી, અને જયારે તે ચીસો પાડવા લાગી, ત્યારે આરોપી ભીડ જોઈને ત્યાંથી ભાગી છૂટ્યો હતો. જોકે અદાલતે આ કેસમાં બળાત્કાર ન થયું હોવાનું કહી તેને આઇપીસીની કલમ ૩૫૪ હેઠળસ્ત્રીની નમ્રતાને ઠેસ પહોંચાડવાનો ગુનો ગણાવી આરોપીને સજા આપવામાં આવી, પરંતુ રાજસ્થાનના આ ૩૩ વર્ષના કેસમાં તો આરોપીએ એક છ વર્ષની છોકરી સાથે છેડછાડ કરી હોવાની અમાનવી ઘટના બની હતી.
મીડિયા રિપોર્ટ્સ મુજબ, નવ માર્ચ ૧૯૯૧ના કેસમાં આરોપી સુવાલાલ ૨૫ વર્ષનો હતો જયારે તેણે આ ગુનો કર્યો હતો. સુવાલાલે એક છ વર્ષની છોકરીના અને પોતાના બધા કપડા ઉતારી દીધા હતા અને જયારે છોકરીએ પોતાનો બચાવ કરવા ચીસો પાડી ત્યારે આરોપી પણ ત્યાંથી ભાગી ગયો હતો. રાજસ્થાનના ટાંક જિલ્લાના ડિસ્ટ્રિક્ટ કોર્ટ દ્વારા સુવાલાલને બળાત્કાર કરવાનો પ્રયાસ કરવાના આરોપમાં દોષી ઠરાવવામાં આવ્યો હતો અને ટ્રાયલ દરમિયાન તેને અઢી મહિના સુધી જેલમાં પણ રાખવામાં આવ્યો હતો.
(10:53 AM IST)
છેલ્લા 8 દિવસમાં સૌથી લોકપ્રિય 
