<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Saturday, 15th June 2024

યુપી : ૪૪૪૦ કરોડની કિંમતની જમીન અને યુનિવર્સિટીની ઇમારત જપ્‍ત

ફરાર ખાણ માફિયા મોહમ્‍મદ ઇકબાલ સામે EDની કાર્યવાહી

નવી દિલ્‍હી તા. ૧૫ : ઈડીએ ઉત્તર પ્રદેશના સહારનપુરમાં ભૂતપૂર્વ MLC મોહમ્‍મદ ઈકબાલ વિરુદ્ધ મોટી કાર્યવાહી કરી છે. સેન્‍ટ્રલ ઇન્‍વેસ્‍ટિગેશન એજન્‍સીએ ભૂતપૂર્વ MLCની ૪ હજાર કરોડ રૂપિયાથી વધુની સંપત્તિ જપ્ત કરી છે. અહીં ૪,૪૪૦ કરોડની કિંમતની યુનિવર્સિટીની ઇમારત અને જમીન અટેચ કરવામાં આવી છે.

તપાસ એજન્‍સીએ મની લોન્‍ડરિંગ કેસમાં પ્રોવિઝનલ એટેચમેન્‍ટ ઓર્ડર જારી કર્યો હતો, ત્‍યારબાદ ૧૨૧ એકર જમીન અને ગ્‍લોકલ યુનિવર્સિટીની ઇમારત જપ્ત કરવામાં આવી છે. ઈડીએ એક નિવેદનમાં જણાવ્‍યું હતું કે આ સંપત્તિઓ અબ્‍દુલ વહીદ એજયુકેશનલ એન્‍ડ ચેરિટેબલ ટ્રસ્‍ટના નામે નોંધવામાં આવી હતી, જેનું નિયંત્રણ મોહમ્‍મદ ઇકબાલ અને તેના પરિવારના સભ્‍યો દ્વારા કરવામાં આવ્‍યું હતું.

મોહમ્‍મદ ઈકબાલ, ટ્રસ્‍ટ અને તેના પરિવારના સભ્‍યો સામે લેવાયેલી આ કાર્યવાહી ગેરકાયદેસર માઈનિંગ કેસ સાથે સંબંધિત છે. ED અનુસાર, પૂર્વ MLC ફરાર છે. એવું માનવામાં આવે છે કે તે દુબઈમાં છે. મોહમ્‍મદ ઈકબાલને ચાર પુત્રો છે. જેલમાં રહેલા પુત્રો અને ભાઈ સામે ઘણા કેસ નોંધાયેલા છે.

મની લોન્‍ડરિંગનો કેસ ઉત્તર પ્રદેશના સહારનપુરમાં રેતીના ખનન, લીઝના ગેરકાયદેસર નવીકરણ અને કેટલાક ખાણ લીઝ ધારકો, કેટલાક અધિકારીઓ અને અજાણ્‍યા લોકો સામે દિલ્‍હીમાં નોંધાયેલી CBI FIR સાથે સંબંધિત છે. તમામ ખાણકામ કંપનીઓ મોહમ્‍મદ ઈકબાલ ગ્રૂપની માલિકીની અને સંચાલિત હતી. આ કંપનીઓ સહારનપુર અને આસપાસના વિસ્‍તારોમાં મોટા પાયે ગેરકાયદેસર ખાણકામમાં સામેલ હતી.

EDએ જણાવ્‍યું હતું કે ITRમાં નજીવી આવક દર્શાવવામાં આવી હોવા છતાં ખાણકામ કંપનીઓ અને મોહમ્‍મદ ઇકબાલની જૂથની કંપનીઓ વચ્‍ચે કોઇપણ વ્‍યવસાયિક સંબંધ વિના કરોડોના વ્‍યવહારો જોવા મળ્‍યા હતા

(2:46 PM IST)