<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Sunday, 16th June 2024

અયોધ્યામાં મળેલ હારને કારણે RSSના વડા મોહન ભાગવત અને ઉત્તર પ્રદેશના મુખ્ય પ્રધાન યોગી આદિત્યનાથે ગોરખપુરમાં કથિત રીતે બે બંધ બારણે બેઠકો યોજી

આ બેઠક લગભગ 30 મિનિટ સુધી ચાલી હતી. એવું માનવામાં આવે છે કે લોકસભામાં પાર્ટીના ખરાબ પ્રદર્શનને લઈને આ બેઠકોમાં ચર્ચાનો મુખ્‍ય વિષય બન્‍યો હતો

નવી દિલ્‍હીઃ  RSSના વડા મોહન ભાગવત અને ઉત્તર પ્રદેશના મુખ્ય પ્રધાન યોગી આદિત્યનાથે શનિવારે (15 જૂન 2024) ગોરખપુરમાં કથિત રીતે બે બંધ બારણે બેઠકો યોજી હતી. આ બેઠક લગભગ 30 મિનિટ સુધી ચાલી હતી. એવું માનવામાં આવે છે કે લોકસભા ચૂંટણી 2024માં ઉત્તર પ્રદેશમાં ભારતીય જનતા પાર્ટી (BJP) ના ખરાબ પ્રદર્શનને લઈને આ બેઠકોમાં ચર્ચા કરવામાં આવી છે.

આદિત્યનાથ પ્રથમવાર ભાગવતને શનિવારે બપોરે કેમ્પિયરગંજ વિસ્તારની એક શાળામાં મળ્યા હતા. મોહન ભાગવત અહીં સંઘના એક કાર્યક્રમમાં હાજરી આપવા આવ્યા હતા. સીએમ યોગી આદિત્યનાથ અને મોહન ભાગવત વચ્ચે બીજી બેઠક પાકીબાગ વિસ્તારના સરસ્વતી શિશુ મંદિરમાં લગભગ 8:30 વાગ્યે થઈ હતી.

ચર્ચા છે કે મોહન ભાગવતની આ મુલાકાત નિયમિત નથી. ત્રણ દાયકાથી સંઘ સાથે જોડાયેલા એક વરિષ્ઠ બીજેપી નેતાનું કહેવું છે કે ભાગવત ઉત્તર પ્રદેશમાં હાર પાછળના મુખ્ય કારણો અંગે આદિત્યનાથ સાથે ચર્ચા કરવા જઈ રહ્યા હતા. શક્ય છે કે આ બંને બેઠકો આ જ કારણોસર થઈ હોય. વાસ્તવમાં, ભાજપ યુપીમાં સૌથી મજબૂત સ્થિતિમાં હોય તેવું લાગતું હતું, પરંતુ પરિણામો તેનાથી વિપરીત હતા. અહીં 80 બેઠકોમાંથી ભાજપને માત્ર 33 બેઠકો મળી છે. જ્યારે 2014ની લોકસભા ચૂંટણીમાં પાર્ટીએ 71 સીટો જીતી હતી અને 2019ની લોકસભા ચૂંટણીમાં પાર્ટીએ 62 સીટો જીતી હતી. બીજી તરફ યુપીમાં ઈન્ડિયા એલાયન્સે 43 સીટો જીતી છે. તેમાંથી સપાએ 37 અને કોંગ્રેસે 6 બેઠકો જીતી છે.

યુપીમાં સૌથી ચોંકાવનારા પરિણામો અયોધ્યા વિભાગના હતા. વાસ્તવમાં, ભાજપ અયોધ્યા રામ મંદિરના આધારે સમગ્ર દેશમાં સારા પરિણામોની અપેક્ષા રાખતો હતો, પરંતુ પાર્ટીએ અયોધ્યા વિભાગની મોટાભાગની બેઠકો ગુમાવી દીધી હતી. એટલું જ નહીં, અયોધ્યા રામ મંદિર જે અંતર્ગત આવે છે તે ફૈઝાબાદ સીટ પર ભાજપ જીત નોંધાવી શકી નથી.

(12:48 PM IST)