<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Sunday, 16th June 2024

ભાજપ તેમને જે સમર્થન આપે છે તેમને જ દગો આપે છે: સંજય રાઉત વિવાદસ્‍પદ નિવેદનથી રાજકારણમાં ગરમાયુ

જો TDP લોકસભા અધ્યક્ષ પદ માટે પોતાનો ઉમેદવાર ઉતારે છે, તો ઈન્ડી ગઠબંધન તેને સમર્થન આપશેઃ રાઉત

મુંબઇ શિવસેના (ઉદ્ધવ બાળાસાહેબ ઠાકરે)ના નેતા સંજય રાઉતે રવિવારે કહ્યું હતું કે જો સત્તાધારી ગઠબંધન તેલુગુ દેશમ પાર્ટી (ટીડીપી) લોકસભા સ્પીકર પદ માટે ઉમેદવાર ઊભો કરે છે, તો વિપક્ષી ઈન્ડી ગઠબંધનના તમામ સહયોગી પક્ષો સમર્થન સુનિશ્ચિત કરવાનો પ્રયત્ન કરશે. અહીં પત્રકારો સાથે વાત કરતા રાઉતે દાવો કર્યો હતો કે લોકસભા અધ્યક્ષની ચૂંટણી મહત્વની રહેશે અને જો ભાજપને આ પદ મળે છે, તો સરકારને ટેકો આપતી પાર્ટીઓ TDP, જનતા દળ યુનાઇટેડ (JDU) અને ચિરાગ પાસવાન અને જયંત ચૌધરીના રાજકીય સંગઠનોને તોડી નાખશે.

તેમણે દાવો કર્યો કે, “અમને અનુભવ છે કે ભાજપને જે સમર્થન આપે છે તેમને તે દગો આપે છે.” રાઉતે કહ્યું, “મેં સાંભળ્યું છે કે ટીડીપી પોતાનો ઉમેદવાર ઉતારવા માંગે છે. જો આવું થશે, તો ઈન્ડી ગઠબંધનના ભાગીદારો આ મુદ્દે ચર્ચા કરશે અને ખાતરી કરવાનો પ્રયાસ કરશે કે તમામ વિપક્ષી ગઠબંધન ભાગીદારો ટીડીપીને સમર્થન આપે.’

રાજ્યસભાના સભ્યએ કહ્યું કે નિયમો અનુસાર વિપક્ષને ડેપ્યુટી સ્પીકરનું પદ મળવું જોઈએ. તેમણે દાવો કર્યો કે એનડીએ સરકાર સ્થિર નથી. લોકસભા ચૂંટણી પછી રાષ્ટ્રીય સ્વયંસેવક સંઘના કેટલાક નેતાઓ દ્વારા ભાજપ વિશે આપેલા તાજેતરના નિવેદનો વિશે પૂછવામાં આવતા, રાઉતે કહ્યું કે જો RSS ભૂતકાળની “ભૂલો” સુધારવા માંગે તો તે સારું છે.

તેમણે કહ્યું કે, “અમે ઘટનાક્રમ પર નજર રાખી રહ્યા છીએ.” રાઉતે દાવો કર્યો કે વડા પ્રધાન નરેન્દ્ર મોદીને ભાજપ સંસદીય દળની બેઠકમાં નથી પરંતુ રાષ્ટ્રીય લોકતાંત્રિક ગઠબંધન (એનડીએ) સંસદીય દળની બેઠકમાં નેતા તરીકે પસંદ કરવામાં આવ્યા હતા. તેમણે કહ્યું, “ભાજપ સંસદીય દળની બેઠક થઈ ન હતી. જો ભાજપ સંસદીય દળની બેઠકમાં નેતૃત્વનો મુદ્દો આવ્યો હોત તો પરિણામો અલગ આવી શકતા હતા. તેથી જ NDA સંસદીય દળની બેઠકમાં મોદીને નેતા તરીકે પસંદ કરવામાં આવ્યા હતા. આ ગંભીર બાબત છે.”

(4:12 PM IST)