નવી દિલ્‍હી તા. ૧૮ : NEET UG પરીક્ષા ૨૦૨૪ને લઈને શેરીઓથી લઈને સુપ્રીમ કોર્ટ સુધી હંગામો ચાલુ છે. મંગળવારે સુપ્રીમ કોર્ટમાં NEET ૨૦૨૪ પરીક્ષાને લઈને દાખલ અરજીઓ પર સુનાવણી હાથ ધરવામાં આવી હતી. આ દરમિયાન સુપ્રીમ કોર્ટે NEET વિવાદ પર કડક વલણ દાખવ્‍યું હતું. સુપ્રીમ કોર્ટે એનટીએને આડે હાથ લીધી અને કહ્યું કે જો ૦.૦૦૧ ટકા પણ ખામી જણાશે તો અમે તેની સાથે કડક કાર્યવાહી કરીશું. સુપ્રીમ કોર્ટે આ મામલે NTAને નોટિસ પાઠવીને જવાબ માંગ્‍યો છે. હકીકતમાં, શિક્ષણવિદ નીતિન વિજય સહિતની અરજી પર આજે સુપ્રીમ કોર્ટમાં સુનાવણી થઈ હતી જેમાં NEET પરીક્ષા રદ કરવાની માંગ કરવામાં આવી હતી.

સુપ્રીમ કોર્ટે ATA એટલે કે નેશનલ ટેસ્‍ટિંગ એજન્‍સી અને કેન્‍દ્ર સરકારને નોટિસ જારી કરીને આ સમગ્ર મામલે તેમનો જવાબ માંગ્‍યો છે. સુપ્રીમ કોર્ટમાં જસ્‍ટિસ વિક્રમનાથ અને જસ્‍ટિસ એસવીએન ભાટીની ખંડપીઠે કહ્યું કે જો ૦.૦૦૧% પણ કોઈ ખામી જણાશે તો અમે તેની સાથે કડક કાર્યવાહી કરીશું. અમે પરીક્ષાની તૈયારીમાં વિદ્યાર્થીઓની મહેનતને સમજીએ છીએ.

સુપ્રીમ કોર્ટે NTAને વિદ્યાર્થીઓની ફરિયાદોને નજરઅંદાજ ન કરવા જણાવ્‍યું હતું. જો ખરેખર પરીક્ષામાં કોઈ ભૂલ થઈ હોય તો તેને સમયસર સુધારવી જોઈએ. આ પછી કોર્ટે બંને અરજીઓને અગાઉની અરજીઓ સાથે જોડી દીધી હતી. અરજીઓમાં NEET પરીક્ષા રદ કરવાની માંગ કરવામાં આવી છે.

તે જ સમયે, અરજદાર નીતિન વિજયે તેમની અરજીમાં કહ્યું કે NEET પરીક્ષામાં ગેરરીતિઓને લઈને ચલાવવામાં આવી રહેલા ડિજિટલ સત્‍યાગ્રહ હેઠળ ૨૦ હજાર વિદ્યાર્થીઓએ તેમની ફરિયાદ આપી છે. પેપર લીક અને ગેરરીતિઓને ટાંકીને અરજીમાં માંગ કરવામાં આવી હતી કે સમગ્ર પરીક્ષા રદ કરવામાં આવે અને નવેસરથી પરીક્ષા લેવામાં આવે. હવે આ કેસની સુનાવણી ૮મી જુલાઈએ થશે.