મહારાષ્ટ્ર વિધાનસભા ચૂંટણી પહેલા મરાઠા આરક્ષણની માંગને લઈને રાજ્યના રાજકારણમાં ફરી ગરમાવો આવી શકે છે.પુણે જિલ્લામાં મરાઠા આરક્ષણની માંગ સાથે 38 વર્ષીય વ્યક્તિએ કથિત રીતે આત્મહત્યા કરી હતી. તેણે ફેસબુક લાઈવ સેશનનું આયોજન કર્યું અને મરાઠાઓ માટે આરક્ષણની માંગ ઉઠાવી અને પછી આત્મહત્યા કરી.

  લોનીકંદ વિસ્તારમાં વહેલી સવારે મૃતક પ્રસાદ દેથેનો મૃતદેહ ટ્રક પર લોખંડના સળિયાથી લટકતો મળી આવ્યો હતો. એક પોલીસ અધિકારીએ જણાવ્યું કે તેના શરીર પરથી એક સુસાઈડ નોટ મળી આવી છે.

   હસ્તલિખિત નોંધમાં, દેથેએ અનામતના લાભો માટે મરાઠા સમુદાયને OBC શ્રેણીમાં સામેલ કરવાની હિમાયત કરી હતી, જેના માટે મરાઠા કાર્યકર્તા મનોજ જરાંગે આંદોલન કરી રહ્યા છે. નોંધમાં, જરાંગેને જ્યાં સુધી અનામત ન મળે ત્યાં સુધી તેમનું આંદોલન ચાલુ રાખવા વિનંતી કરવામાં આવી હતી.

 અધિકારીએ જણાવ્યું કે આમાં પંકજા મુંડે અને છગન ભુજબલ જેવી અગ્રણી રાજકીય હસ્તીઓને પણ મરાઠા ક્વોટા અધિકારોને સમર્થન આપવા અપીલ કરવામાં આવી છે. આ પગલું ભરતા પહેલા, દેથેએ 'ફેસબુક લાઈવ' સત્ર યોજ્યું હતું અને ક્વોટા મુદ્દે વિગતવાર વાત કરી હતી.

   દેથે એક ખાનગી કંપનીમાં સિક્યુરિટી ગાર્ડ તરીકે નોકરી કરતો હતો. તેમના પરિવારમાં તેમની પત્ની અને ત્રણ બાળકો છે. જરાંગેના નેતૃત્વમાં મરાઠા સમુદાય સરકારી નોકરીઓ અને શિક્ષણમાં ઓબીસી જૂથ હેઠળ ક્વોટાની માંગ કરી રહ્યો છે.

   આ દરમિયાન મનોજ જરાંગેએ કહ્યું છે કે મરાઠા સમુદાય અનામતની માંગ સાથે મોટી સંખ્યામાં રસ્તા પર ઉતરશે. મનોજ જરાંગે પાટીલે કહ્યું કે મરાઠા સમાજ મરાઠા આરક્ષણની માંગ સાથે રેલી કાઢશે.

  જારંગેએ કહ્યું કે મરાઠા આરક્ષણની માંગ પર તેઓ 6 જુલાઈએ હિંગોલીમાં, 7 જુલાઈએ પરભણી, 8 જુલાઈએ નાંદેડ, 9 જુલાઈએ લાતુર, 10 જુલાઈએ ધારશિવ, 11 જુલાઈએ બીડ અને 12 જુલાઈએ જાલનામાં રેલીઓ યોજવાના છે.