નવી દિલ્‍હી, તા.૨૦: GST કાઉન્‍સિલ શનિવારે યોજાનારી બેઠકમાં ઘણા મહત્‍વપૂર્ણ મુદ્દાઓ પર ચર્ચા કરી શકે છે. તેમાં ઓનલાઈન ગેમિંગ પર કરવેરાનો મુખ્‍ય મુદ્દો સામેલ છે. હાલમાં ઓનલાઈન ગેમિંગ પર ૨૮ ટકા GST વસૂલવામાં આવે છે. એવું કહેવામાં આવી રહ્યું છે કે આ બેઠકમાં તેની સમીક્ષા થશે.

ST કાઉન્‍સિલની ૫૩મી બેઠક કેન્‍દ્રીય નાણા મંત્રી નિર્મલા સીતારમણની અધ્‍યક્ષતામાં યોજાશે. આ કાઉન્‍સિલમાં રાજ્‍યોના નાણા મંત્રીઓનો સમાવેશ થાય છે. GST દરોને તર્કસંગત બનાવવા અંગે મંત્રીઓના જૂથ (GoM)ના અહેવાલને અંતિમ સ્‍વરૂપ આપવામાં થયેલી પ્રગતિની પણ આ બેઠકમાં ચર્ચા થવાની સંભાવના છે.

GST કાઉન્‍સિલની આ બેઠક આઠ મહિનાના અંતરાલ બાદ મળી રહી છે. અગાઉ, GST કાઉન્‍સિલની ૫૨મી બેઠક ૭ ઓક્‍ટોબર, ૨૦૨૩ના રોજ મળી હતી. ખાતરો પરથી GST હટાવવામાં આવી શકે છે. આ મામલે બનેલી કમિટીએ ખાતરને GSTમાંથી મુક્‍તિ આપવાનો પ્રસ્‍તાવ મૂકયો છે. તેની ભલામણ સરકારને મોકલવામાં આવી છે. હાલમાં ખાતર પર પાંચ ટકા GST વસૂલવામાં આવે છે. તેની સાથે સંકળાયેલા ઉદ્યોગો તેને સંપૂર્ણ રીતે હટાવવાની માંગ કરી રહ્યા છે.

GST કાઉન્‍સિલ ઑનલાઇન ગેમિંગ કંપનીઓ માટે બેટ્‍સના સંપૂર્ણ મૂલ્‍ય પર ૨૮ ટકા GST લાદવાના નિર્ણયની સમીક્ષા કરી શકે છે. આ નિર્ણય ૧ ઓક્‍ટોબર, ૨૦૨૩થી અમલમાં આવ્‍યો છે. GST કાઉન્‍સિલે, જુલાઈ અને ઓગસ્‍ટમાં તેની બેઠકોમાં, કરપાત્ર દાવાઓ તરીકે ઑનલાઇન ગેમિંગ, કેસિનો અને હોર્સ રેસિંગનો સમાવેશ કરવા માટે કાયદામાં સુધારાને મંજૂરી આપી હતી. તે પણ સ્‍પષ્ટ કરવામાં આવ્‍યું હતું કે શરતની સંપૂર્ણ કિંમત પર ૨૮ ટકા ટેક્‍સ વસૂલવામાં આવશે. ત્‍યારે એવું કહેવામાં આવ્‍યું હતું કે અમલના છ મહિના પછી આ નિર્ણયની સમીક્ષા કરવામાં આવશે.

ગેમિંગ કંપનીઓ શું ઇચ્‍છે છેઃ ઑનલાઇન ગેમિંગ કંપનીઓ બેટ્‍સના સંપૂર્ણ મૂલ્‍યને બદલે ગ્રોસ ગેમિંગ રેવન્‍યુ (GGR) પર ૨૮ ટકા GSTની માંગ કરી રહી છે. ગેમિંગની કુલ આવક એ કુલ રકમ અને જીતેલી રકમ વચ્‍ચેનો તફાવત છે. ગેમિંગ ઉદ્યોગ સાથે જોડાયેલા લોકોને આશા છે કે સમીક્ષા બેઠકમાં થોડી રાહત મળી શકે છે.

દેશમાં મોટી સંખ્‍યામાં ઉચ્‍ચ મેનેજમેન્‍ટ સ્‍તરના અધિકારીઓ GST વિશે સકારાત્‍મક ધારણા ધરાવે છે. ડેલોઈટના સર્વેમાં આ હકીકત સામે આવી છે. આમાંના ઘણા અધિકારીઓએ ટેક્‍સ દરોને તર્કસંગત બનાવવા અને GST ૨.૦ હેઠળ વિવાદના નિરાકરણ માટે અસરકારક સિસ્‍ટમની હિમાયત કરી છે.

આ અધિકારીઓ વિવિધ ઉદ્યોગ ક્ષેત્રો સાથે સંકળાયેલા છે. તેમાં તે બાબતોનો ઉલ્લેખ કરવામાં આવ્‍યો છે, જે GSTમાં વધતો વિશ્વાસ દર્શાવે છે. સર્વેમાં સામેલ ૮૪ ટકા અધિકારીઓએ ૨૦૨૪માં GST વિશે સકારાત્‍મક અભિપ્રાય વ્‍યક્‍ત કર્યો હતો. આ સંખ્‍યા ૨૦૨૩માં ૭૨ ટકા અને ૨૦૨૨માં ૫૯ ટકા હતી.