નવી દિલ્‍હી,તા.૨૦: મિત્રતા વ્‍યક્‍ત કરવા માટે કોઈને ભેટ આપવી એ વધુ સારી રીત માનવામાં આવે છે. રશિયાના પ્રમુખ વ્‍લાદિમીર પુતિને પણ કંઈક આવું જ કર્યું છે. વ્‍લાદિમીર પુતિને કિમ જોંગ ઉનને ઓરસ સેનેટ લક્‍ઝરી કાર ભેટમાં આપી છે. પુતિને ન માત્ર આ લક્‍ઝરી કાર ગિફટ કરી, પરંતુ તેઓ કિમ જોંગ ઉનને આ કારમાં ડ્રાઈવ કરવા પણ લઈ ગયા હતા. આ દરમિયાન પુતિને પોતે કાર ચલાવી હતી અને કિમ જોંગ ઉન તેમની બાજુમાં કો-ડ્રાઈવિંગ સીટ પર બેઠેલા જોવા મળ્‍યા હતા. ટોચના નેતાઓની આ લક્‍ઝરી રાઈડનો વીડિયો સોશિયલ મીડિયા પર વાયરલ થઈ રહ્યો છે.

રશિયાના પ્રમુખ વ્‍લાદિમીર પુતિન છેલ્લા ૨૪ વર્ષમાં પ્રથમ વખત ઉત્તર કોરિયાની મુલાકાતે છે. પુતિન બુધવારે વહેલી સવારે ઉત્તર કોરિયા પહોંચ્‍યા હતા જયાં ઉત્તર કોરિયાના મુખ્‍ય નેતા કિમ જોંગ ઉને તેમનું ભવ્‍ય સ્‍વાગત કર્યું હતું. આ અવસર પર બંને વરિષ્ઠ નેતાઓએ એકબીજાને કિંમતી ભેટ પણ આપી હતી, જેમાં વ્‍લાદિમીર પુતિનની ભેટની ખૂબ ચર્ચા થઈ રહી છે.

ઉલ્લેખનીય છે કે, ઓરસ સેનેટ રશિયાના પ્રમુખની સત્તાવાર રાજય કાર પણ છે. તેને રશિયાની અગ્રણી કાર ઉત્‍પાદક ઓરસ મોટર્સ દ્વારા સેન્‍ટ્રલ સાયન્‍ટિફિક રિસર્ચ ઓટોમોબાઈલ અને ઓટોમોટિવ એન્‍જિન ઈન્‍સ્‍ટિટ્‍યૂટ, જેને NAMI તરીકે પણ ઓળખવામાં આવે છે, સાથે મળીને વિકસાવવામાં આવી છે. હવે રશિયાના પ્રમુખ પુતિને કિમ જોંગ ઉનને આવી જ કાર ગિફટ કરી છે.

આ એક ફૂલ સાઈઝની લક્‍ઝરી લિમોઝીન કાર છે, જેને રશિયાની રોલ્‍સ રોયસ પણ કહેવામાં આવે છે. હકીકતમાં, તેનો ફ્રન્‍ટ લુક એટલે કે ગ્રીલની ડિઝાઇન રોલ્‍સ રોયસ કાર જેવી જ છે. મહત્ત્વપૂર્ણ છે કે, આ પહેલા ફેબ્રુઆરીમાં પણ પુતિને કિમ જોંગને ઓરસ લિમોઝીન કાર ગિફટ કરી હતી, એટલે કે હવે કિમ પાસે આવી બે કાર છે.

આ કારમાં ૪.૪-લિટર ક્ષમતાના ટ્‍વિન ટર્બો V8 એન્‍જિનનો ઉપયોગ કરવામાં આવ્‍યો છે જે 590bhpનો પાવર જનરેટ કરે છે. સરળ શબ્‍દોમાં કહીએ તો, તેના એન્‍જિનનું પાવર આઉટપુટ ભારતીય બજારમાં વેચાતી ટોયોટા ફોર્ચ્‍યુનર કરતાં લગભગ બમણું છે. કેટલાક મીડિયા રિપોર્ટ્‍સમાં એવું પણ કહેવાય છે કે, જર્મન કાર કંપની પોર્શે પણ આ કારને ડેવલપ કરવામાં મદદ કરી છે.

જોકે, સુરક્ષાના કારણોસર આ લક્‍ઝરી કારના ફીચર્સ અને સ્‍પેસિફિકેશન વિશે કોઈ માહિતી જાહેર કરવામાં આવી નથી. પરંતુ એવું માનવામાં આવે છે કે, અન્‍ય રાજયની સત્તાવાર કારની જેમ, આ કાર પણ બખ્‍તરવાળી છે. જે ફાયરિંગ અને બોંબ વિસ્‍ફોટનો સામનો કરવાની ક્ષમતા ધરાવે છે.

કેટલાક મીડિયા રિપોર્ટ્‍સમાં કહેવામાં આવ્‍યું છે કે, એડવાન્‍સ્‍ડ ડ્રાઇવિંગ આસિસ્‍ટન્‍સ સિસ્‍ટમની સાથે આ કારમાં ઈમરજન્‍સી બ્રેકિંગ સિસ્‍ટમ, ઈમરજન્‍સી કોલ સપોર્ટ, ૮ મોડ્‍સ સાથે બેક LED લાઇટિંગ, વાયરલેસ ફોન ચાર્જર જેવી સુવિધાઓ છે.