નવી દિલ્‍હી,તા. ૨૫: તમાકુ અને સંબંધિત પ્રોડક્‍ટ્‍સના વપરાશમાં વધારો થવાથી ભારતમાં માથા અને ગરદનના કેન્‍સરના કેસમાં ચિંતાજનક વધારો થયો છે. ભારતમાં ૨૦૪૦ સુધીમાં કેન્‍સરના નવા ૨૧ લાખ કેસ નોંધાય તેવો અંદાજ છે, જે ૨૦૨૦ કરતા ૫૭.૫ ટકાનો મોટો વધારો દર્શાવે છે. માથા અને ગરદનના કેન્‍સરમાં જીભ, મોં અને ગળાના અન્‍ય ભાગોના કેન્‍સરનો સમાવેશ થાય છે. 

સર એચએન રિલાયન્‍સ ફાઉન્‍ડેશન હોસ્‍પિટલના મેડિકલ ઓન્‍કોલોજીના કન્‍સલ્‍ટન્‍ટ પ્રીતમ કટારિયાએ જણાવ્‍યું હતું કે મોઢાના વિવિધ ભાગોના કેન્‍સરનું મુખ્‍ય કારણ તમાકુ અને તમાકુ સંબંધિત પ્રોડક્‍ટ્‍સ, સોપારી અને ધૂમ્રપાન અને આલ્‍કોહોલ છે. કેટલીકવાર ણ્‍ભ્‍સ્‍ ચેપ પણ તેમાં ફાળો આપે છે. જો તમાકુ અને સંબંધિત પ્રોડક્‍ટ્‍સને દૂર કરવામાં આવે તો મોટા ભાગના માથા અને ગરદનના કેન્‍સરમાં ઘટાડો થશે. આ એક મોટો પડકાર છે. તે માટે લોકોમાં જાગૃતિ ફેલાવવાની જરૂર છે. લોકોની બદલાતી વર્તણુક પણ કેન્‍સરને અટકાવવા માટેના પ્રયાસો સામે એક મોટી મુશ્‍કેલી છે.

માથા અને ગરદનના કેન્‍સરને ઘટાડવા માટે નિષ્‍ણાતે તમાકુ અને તમાકુ સંબંધિત પ્રોડક્‍ટ્‍સ અને આલ્‍કોહોલના સેવન અંગે કડક નિયમો બનાવવાની હાકલ કરી હતી. ભારતમાં કુલ કેન્‍સરમાં માથા અને ગળાના કેન્‍સરનું પ્રમાણ આશરે ૩૦ ટકા અને તે ભારતમાં સૌથી વધુ સામાન્‍ય છે. ભારતમાં કેન્‍સરની સારવારનું ભારણ પણ અમેરિકા, બ્રિટન, ઓસ્‍ટ્રેલિયા, આફ્રિકા અને બ્રાઝિલ કરતાં વધુ છે.  ભારતમાં કેન્‍સરના કેસોની સંખ્‍યા વધી રહી છે. ગ્‍લોબોકેન ૨૦૨૦ અનુસાર ભારતમાં ૨૦૪૦ સુધીમાં કેન્‍સરના નવા ૨૧ લાખ કેસ નોંધાશે, જે ૨૦૨૦ કરતા ૫૭.૫ ટકાનો ચિંતાજનક વધારો છે. આ સમસ્‍યાને કાબૂમાં લેવા માટે પુણ્‍યશ્‍લોક અહિલ્‍યાદેવી હોલકર હેડ એન્‍ડ નેક કેન્‍સર ઈન્‍સ્‍ટિટ્‍યૂટ ઓફ ઈન્‍ડિયાના ડાયરેક્‍ટર અને સર્જન પ્રથમેશ પાઈએ તમાકુ, સોપારી અને આલ્‍કોહોલના નુકસાન અંગે જનજાગૃતિ વધારવાની જરૂરિયાત પર ભાર મૂક્‍યો હતો. તેમણે જણાવ્‍યું હતું કે યુવાનોને તમાકુ પ્રોડક્‍ટ્‍સની આદતોથી દૂર રાખવા માટે માતાપિતા અને શાળાઓને સામેલ કરવી જોઇએ. તમાકુ, સોપારી અને આલ્‍કોહોલના ઉત્‍પાદન અને વેચાણ પર પ્રતિબંધ મૂકવા માટે જાહેર ઝુંબેશ ચલાવવી જોઇએ.