<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Thursday, 27th June 2024

સવારે 11 વાગ્યે રાષ્ટ્રપતિ દ્રૌપદી મુર્મુનું અભિભાષણ : બંને ગૃહોને એક સાથે સંબોધશે

તમામ સાંસદોને સવારે 10.30 વાગ્યા સુધીમાં સંસદમાં પહોંચવા અને સવારે 10.55 વાગ્યા સુધીમાં લોકસભામાં તેમની બેઠક લેવા માટે કહેવાયુ

નવી દિલ્હી :રાષ્ટ્રપતિ દ્રૌપદી મુર્મુ ગુરુવારે લોકસભા અને રાજ્યસભાની સંયુક્ત બેઠકને સંબોધિત કરશે. આમાં તે વડાપ્રધાન મોદીની આગેવાની હેઠળની નવી ચૂંટાયેલી સરકારની પ્રાથમિકતાઓને આગળ વધારી શકે છે. આ સંયુક્ત બેઠક લોકસભા ચેમ્બર (નવી સંસદ)માં યોજાશે, જ્યાં રાષ્ટ્રપતિ મુર્મુનું સંબોધન સવારે 11 વાગ્યે થશે. તમામ સાંસદોને સવારે 10.30 વાગ્યા સુધીમાં સંસદમાં પહોંચવા અને સવારે 10.55 વાગ્યા સુધીમાં લોકસભા ચેમ્બરમાં તેમની બેઠક લેવા માટે કહેવામાં આવ્યું છે.

  મળતી માહિતી મુજબ રાષ્ટ્રપતિનો કાફલો સવારે 10.35 કલાકે રાષ્ટ્રપતિ ભવનથી નીકળશે અને સવારે 10.55 કલાકે સંસદ ભવનનાં પ્રાંગણના ગેટ પર પહોંચશે. અહીં ઉપરાષ્ટ્રપતિ વેંકૈયા નાયડુ, પીએમ નરેન્દ્ર મોદી, સ્પીકર ઓમ બિરલા અને સંસદીય કાર્ય મંત્રી કિરેન રિજિજુ તેમનું સ્વાગત કરશે અને તેમને સેંગોલની સાથે લોકસભા ચેમ્બરમાં લાવશે. રાષ્ટ્રપતિ દ્રૌપદી મુર્મુનું સંબોધન સવારે 11 વાગ્યે લોકસભા ચેમ્બરમાં શરૂ થશે.

  સંબોધન સમાપ્ત થયાના અડધા કલાક પછી બંને ગૃહોની અલગ-અલગ બેઠકો થશે. જ્યાં રાષ્ટ્રપતિના સંબોધનની નકલ અને અન્ય દસ્તાવેજો ગૃહના ટેબલ પર મૂકવામાં આવશે. તમને જણાવી દઈએ કે રાષ્ટ્રપતિના સંબોધન દ્વારા સરકાર પોતાની નીતિઓ અને કાર્યક્રમોનો રોડમેપ આગળ મૂકે છે અને તેની સરકારની પ્રાથમિકતાઓ પણ વ્યક્ત કરે છે.

  આવી સ્થિતિમાં, સતત ત્રીજી વખત સત્તામાં આવેલી મોદી સરકાર આવતીકાલે રાષ્ટ્રપતિના સંબોધન દ્વારા તેના વિઝન, પ્રાથમિકતાઓ અને રોડમેપને જાહેર કરી શકે છે. મુર્મુના સંબોધન પછી, શાસક પક્ષ સંસદના બંને ગૃહોમાં આભાર પ્રસ્તાવ રજૂ કરશે, જેના પર સભ્યો દ્વારા ચર્ચા કરવામાં આવશે. વડાપ્રધાન મોદી 2 કે 3 જુલાઈના રોજ આભાર પ્રસ્તાવ પર ચર્ચાનો જવાબ આપી શકે છે.

   તાજેતરમાં યોજાયેલી સામાન્ય ચૂંટણીઓમાં, શાસક ભાજપની આગેવાની હેઠળ એનડીએ 293 બેઠકો જીતીને સતત ત્રીજી વખત સત્તામાં પરત ફર્યું હતું. જો કે, આ સંખ્યા ભાજપની અપેક્ષા કરતા ઘણી ઓછી છે કારણ કે તે શાસક ગઠબંધન માટે 400 થી વધુ બેઠકોની અપેક્ષા રાખતી હતી. આ ચૂંટણીમાં વિપક્ષ મજબૂત ઉભરી આવ્યો છે અને ઈન્ડિયા એલાયન્સે 234 સીટો જીતી છે. તેમાં કોંગ્રેસની 99 બેઠકોનો સમાવેશ થાય છે, જે 2019માં જીતેલી 52 બેઠકો કરતાં લગભગ બમણી છે.

(12:27 AM IST)