તા. ૧૩ નવેમ્બર ર૦ર૬ વિક્રમ સંવત ર૦૮૩ કારતક સુદ – ૪ શુક્રવાર
આનંદો...સેવિંગ એકાઉન્ટ પર મળશે બજેટમાં રાહત
૨૫૦૦૦ સુધીનાં વ્યાજ પર મળી શકે છે છુટ : બચત ખાતામાં વ્યાજ પર મળતી કરમુકિતની મર્યાદા વધારીને રૂ.૨૫૦૦૦ કરવા પ્રસ્તાવ : હાલ લીમીટ ૧૦,૦૦૦ રૂા.ની છે
નવી દિલ્હી, તા.૬: નાણામંત્રી નિર્મલા સીતારમણ આ મહિને રજૂ થનારા બજેટમાં કરદાતાઓને ઘણી રાહતો આપી શકે છે. અહેવાલો અનુસાર, તેમાંથી એક રાહત કરદાતાઓના બચત ખાતા સાથે સંબંધિત હોઈ શકે છે. સરકાર સેવિંગ્સ એકાઉન્ટ પર બેંકો પાસેથી મળતા વ્યાજ પર ટેક્સને લઈને ભેટ આપવાની તૈયારી કરી રહી છે.
ETના એક રિપોર્ટ અનુસાર, બચત ખાતા પર વ્યાજમાંથી ૨૫ હજાર રૂપિયા સુધીની આવક પર બજેટમાં કપાતનો લાભ મળી શકે છે. રિપોર્ટમાં મામલા સાથે જોડાયેલા લોકોને ટાંકીને કહેવામાં આવ્યું છે કે સરકારને આ સંબંધમાં એક -સ્તાવ મળ્યો છે, જેનું મૂલ્યાંકન કરવામાં આવી રહ્યું છે. દરખાસ્તમાં કહેવામાં આવ્યું છે કે સરકારે બચત ખાતાની વ્યાજની આવક પર કર-કપાતપાત્ર રકમ વધારવી જોઈએ.
ગયા અઠવાડિયે નાણા મંત્રાલયના અધિકારીઓની બેંકો સાથે બેઠક યોજાઈ હતી. બેઠકમાં, બેંકોએ નાણાં મંત્રાલયના અધિકારીઓને બચત ખાતા પરના વ્યાજમાંથી મળેલી આવક પર કર લાભો વધારવાનો પ્રસ્તાવ રજૂ કર્યો હતો. સરકારી અધિકારીઓનું કહેવું છે કે બેંકોના પ્રસ્તાવની હજુ સમીક્ષા કરવામાં આવી રહી છે. આ અંગેની અંતિમ જાહેરાત બજેટમાં શકય છે.
જો બજેટમાં આ રાહત આપવામાં આવે તો તેનાથી સામાન્ય કરદાતાઓ અને બેંકો બંનેને ફાયદો થઈ શકે છે. આજે, લગભગ તમામ કરદાતાઓનું કોઈને કોઈ બેંકમાં બચત ખાતું હોય છે. બેંકો થાપણદારોને બચત ખાતામાં રાખવામાં આવેલા નાણાં પર વ્યાજના રૂપમાં વળતર આપે છે. બચત ખાતા પર વ્યાજ દર તુલનાત્મક રીતે નીચો છે, પરંતુ કરદાતાઓને બચત ખાતામાં નાણાં રાખવા પ્રોત્સાહિત કરી શકે છે. બેંકો માટે આ ફાયદાકારક સ્થિતિ હશે અને તેમને ડિપોઝીટના રૂપમાં વધુ પૈસા મળશે.
વર્તમાન આવકવેરા કાયદા હેઠળ, કરદાતાઓને બચત ખાતામાંથી વ્યાજની આવક પર મર્યાદિત છૂટ મળે છે. આવકવેરા કાયદાની કલમ ૮૦TTA હેઠળ, ૧૦,૦૦૦ રૂપિયા સુધીની આવી આવકને કરમાંથી મુક્તિ આપવામાં આવે છે. ૬૦ વર્ષથી વધુ વયના વરિષ્ઠ નાગરિકો માટે કરમુક્તિની આ મર્યાદા ૫૦ હજાર રૂપિયા છે, જેમાં કલમ ૮૦ TTB હેઠળ FD પરની વ્યાજની આવકનો પણ સમાવેશ થાય છે. કરમુક્તિના આ લાભો જૂના કર શાસન હેઠળ ઉપલબ્ધ છે.
નવી કર વ્યવસ્થા હેઠળ, કરદાતાઓને હાલમાં બચત ખાતાના વ્યાજ પર કર મુક્તિ મળતી નથી. જો કે, પોસ્ટ ઓફિસમાં બચત ખાતા ધરાવતા કરદાતાઓ પણ નવી કર વ્યવસ્થામાં કેટલાક લાભો મેળવી શકે છે. તેમના માટે, વ્યક્તિગત ખાતા પર ૩,૫૦૦ રૂપિયા સુધીની વ્યાજની કમાણી અને સંયુક્ત ખાતા પર ૭,૦૦૦ રૂપિયા સુધીની વ્યાજની કમાણી કરમાંથી મુક્ત છે.
(10:32 AM IST)
છેલ્લા 8 દિવસમાં સૌથી લોકપ્રિય 
