અમદાવાદ : ગુજરાતના ગૃહ રાજ્યમંત્રી હર્ષ સંઘવીએ કહ્યું કે, રાહુલ ગાંધી પોતાની રાજકીય યાત્રા અંતર્ગત ગુજરાત આવ્યા હતા. રાહુલ ગાંધી અને સંવેદના વચ્ચે કોઈ જ સંબંધ નથી. તેમની અંદર ક્યારેય સંવેદના હતી જ નહીં. હું ભગવાનને પ્રાર્થના કરું છું કે તેમણે થોડી સંવેદના જરુરથી આપે. તેઓ દરેક મુદ્દાને જૂઠ અને રાજનીતિ સાથે જોડવામાં હોશિયાર છે.

રાહુલ ગાંધી પોતાના I.N.D.I.A. સહયોગીઓની સાથે મળીને તમિલનાડુમાં સરકાર ચલાવી રહ્યાં છે. જે રીતે ત્યાં ઝેરીલી શરાબ પીવાથી અનેક લોકો માર્યા ગયા છે, શું તેમના પરિવારના ખબર અંતર પૂછવા રાહુલ ગાંધી ક્યારેય ગયા છે. શું તમે ક્યારેય તમિલનાડુના પીડિત પરિવારો માટે રાહુલ ગાંધીના મોઢેથી એક પણ શબ્દ સાંભળ્યો છે. એક બસપા નેતાની હત્યા થઈ ગઈ, શું રાહુલ ગાંધી તેમના માટે એક શબ્દ બોલ્યા છે?

બંગાળમાં એક મહિલાને રસ્તા પર ક્રૂરતાપૂર્વક મારવામાં આવી, શું રાહુલ ગાંધીએ તેના પર એક શબ્દ કહ્યું છે. સંઘવીએ કહ્યું કે, રાહુલ ગાંધીની યાત્રા માત્ર જૂઠાણાં અને રાજનીતિ માટે જ હોય છે. તેમણે વધુમાં કહ્યું કે, રાહુલ ગાંધી અને સંવેદનાનો કોઈ સંબંધ હતો જ નહીં અને ભવિષ્યમાં પણ નહીં હોય.
આ પહેલા રાહુલ ગાંધીએ અમદાવાદમાં કોંગ્રેસ કાર્યકર્તાઓને સંબોધિત કર્યા હતા. કોંગ્રેસ ઓફિસ પર થયેલા હુમલા અંગે રાહુલ ગાંધીએ કહ્યું કે, તેમણે અમારી પાર્ટી ઓફિસ પર હુમલો કરીને અમને ચેલેન્જ આપી છે. રાહુલે કહ્યું કે, લખીને રાખો કોંગ્રેસ ગુજરાતમાં ચૂંટણી જીતશે અને રાજ્યમાં એક નવી શરુઆત કરશે.

સંસદમાં રાહુલ ગાંધીએ હિન્દુઓને લઈને જે નિવેદન આપ્યું હતું તેનો ગુજરાતમાં ભારે વિરોધ થયો હતો. અમદાવાદ સ્થિત કોંગ્રેસ મુખ્યાલયમાં રાહુલ ગાંધીના પોસ્ટર પર કાળો પીંછડો મારવામાં આવ્યો હતો. જેને લઈને ભાજપ યુવા મોર્ચાના કાર્યકર્તાઓ અને કોંગ્રેસના કાર્યકર્તાઓ વચ્ચે હિંસક અથડામણ પણ થઈ હતી.