મુંબઇ, તા.૧૨: અનંત અંબાણીના લગ્નમાં બનારસના ચોક વિસ્‍તારમાં આવેલી રામચંદ્ર પાનની દુકાનના પાન વેચનારાઓ પણ પહોંચ્‍યા છે. પાન વેચનાર અશોક ચૌરસિયાને લગ્નમાં ખાસ તૈયાર પાન પીરસવાની જવાબદારી સોંપવામાં આવી છે. તેમના પુત્ર રાઘવ ચૌરસિયાએ જણાવ્‍યું કે અનંત અંબાણીના લગ્નમાં સોનાના કામ સાથેનું પાન પીરસવામાં આવશે. નીતા અંબાણીએ વારાણસીની મુલાકાતે આવ્‍યા ત્‍યારે આ નિર્ણય લીધો હતો અને તેણે પોતાની દુકાનમાંથી પાનનો સ્‍વાદ પણ ચાખ્‍યો હતો. તેમણે કહ્યું કે શ્રેષ્ઠ પાન એ છે જેમાં ચાંદી અને સોનાનું કામ હોય. જે રૂ.૨૦૦ થી રૂ.૧૨૦૦ સુધીની છે. આમાં હોમમેઇડ મસાલા અને કેચુનો ઉપયોગ કરવામાં આવે છે. રાઘવ ત્રીજી પેઢીના પાન વેચનાર છે અને તે કહે છે કે તે ગર્વ અનુભવે છે કે તેના પિતાને આટલી મોટી ઇવેન્‍ટમાં પાન પીરસવાની તક મળી.