ફડણવીસ-અજિત પવારના હેલિકોપ્ટર સાથે બની મોટી દુર્ઘટનાઃ માંડ માંડ બચ્યા
ગઢચિરોલી જતી વખતે એક એવી ઘટના બનીઃ ખરાબ હવામાનને કારણે હેલિકોપ્ટર વરસાદના વાદળમાં ખોવાઈ ગયું
મુંબઇ,તા. ૧૮: મહાયુતિ સરકાર (BJP, શિવસેના એકનાથ શિંદે જૂથ,NCP અજિત પવાર જૂથ) દ્વારા ચૂંટણી માટેની તૈયારીઓ શરૂ થઈ ગઈ છે. આ તૈયારીઓ માટે રાજયના મુખ્ય પ્રધાન એકનાથ શિંદે સહિત રાજયના બંને નાયબ મુખ્ય પ્રધાન દેવેન્દ્ર ફડણવીસ અને અજિત પવાર અનેક વિસ્તારોની મુલાકાત લઈ રહ્યા છે. જો કે હાલમાં નાયબ મુખ્ય પ્રધાન દેવેન્દ્ર ફડણવીસ અને અજિત પવાર સાથે ગઢચિરોલીમાં જતી વખતે એક એવી ઘટના બની હતી જેમાં તેઓ માંડ માંડ બચી ગયા હતા.
મહારાષ્ટ્રના બંને નાયબ મુખ્ય પ્રધાન દેવેન્દ્ર ફડણવીસ અને અજિત પવાર ઉદ્યોગ પ્રધાનો ઉદય સામંત અને પાર્થ પવાર સાથે નાગપુરથી ગઢચિરોલી સુધીની હેલિકોપ્ટર મુસાફરી દરમિયાન સદનસીબે બચી ગયા હતા. આ નેતાઓની મુસાફરી દરમિયાન ખરાબ હવામાનને કારણે હેલિકોપ્ટર વરસાદના વાદળમાં ખોવાઈ ગયું હતું. ખરાબ હવામાનને કારણે વિઝિબિલિટી પણ ખૂબ જ ઓછી થઈ હતી, પરંતુ હેલિકોપ્ટરના પાયલોટે તેની ભારે કુશળતાથી હેલિકોપ્ટરને લેન્ડ કરાવ્યું હતું જેને કારણે મોટી દુર્ઘટના થતાં અટકાઈ ગઈ હતી.
આ હેલિકોપ્ટરમાં ચાર મહત્વના નેતાઓ હતા. તે સમયે હેલિકોપ્ટર ભટકી ગયું હતું. તેઓને ગઢચિરોલીમાં ખરાબ હવામાનને કારણે અસર થઈ હતી. પરંતુ સદનસીબે તમામ સુરક્ષિત છે. કહેવાય છે કે આ વખતે પાયલોટે પોતાનું કૌશલ્ય બતાવી હેલિકોપ્ટરને સુરક્ષિત રીતે લેન્ડ કર્યું હતું. નાયબ પ્રધાનો સાથે બનેલી આ ઘટના બાબતે અજિત પવારે માહિતી આપી હતી. અજિત પવારે આ ભયાવહ ઘટના બાબતે માહિતી આપતા કહ્યું કે હેલિકોપ્ટરે સારી ટેક ઓફ કર્યું હતું, પરંતુ થોડા સમય બાદ તે વાદળોમાં ખોવાઈ ગયું હતું. આ સમયે દેવેન્દ્ર ફડણવીસ શાંતિથી વાતચીત કરી રહ્યા હતા. સદનસીબે, પાઇલટે કુશળતા બતાવી અને હેલિકોપ્ટરને લેન્ડ કર્યું. જે બાદ બંને નાયબ મુખ્યમંત્રી ગઢચિરોલીના કાર્યક્રમમાં હાજર રહ્યા હતા.
અજિત પવારે કહ્યું કે શરૂઆતમાં સારું લાગ્યું, પરંતુ અહીં-ત્યાં વાદળો છવાયેલા હતા. મેં ફડણવીસને બહાર જોવા કહ્યું. પરંતુ, તેમણે ચિંતા ન કરવાનું કહ્યું. ફડણવીસે મને કહ્યું કે અત્યાર સુધીમાં મારી સાથે આવા છ અકસ્માતો થયા છે. આવા અકસ્માતમાં મને કંઈ થયું નથી. તો તને પણ કંઈ થશે નહીં. તમે શાંત રહો. હું ચિંતામાં હત, પરંતુ ફડણવીસ એકદમ સ્ટ્રેસફ્રી હતા. પાછળના પુણ્ય હશે. તેથી જ તેઓ અહીં સુધી પહોંચ્યા છે. ઉદય સામંત પણ અમારી સાથે હતા. જયારે અમને જમીન દેખાવા લાગી ત્યારે મારો જીવ આવ્યો. અજિત પવારે ગઢચિરોલીમાં એક કાર્યક્રમને સંબોધતી વખતે આ વાત કહી હતી. મહારાષ્ટ્રમાં આગામી થોડા મહિનામાં વિધાન સભાની ચૂંટણી થવાની છે.
(9:40 AM IST)
છેલ્લા 8 દિવસમાં સૌથી લોકપ્રિય 
