મુંબઈ : મરાઠા આરક્ષણની માંગ કરી રહેલા મનોજ જરાંગે શિંદે સરકારની મુશ્કેલીઓમાં વધુ વધારો કર્યો છે. જરાંગે હવે સરકારને નવું અલ્ટીમેટમ આપ્યું છે. તેમણે ઉપવાસ મોકૂફ રાખવાની જાહેરાત કરી છે. દરમિયાન તેમણે રાજ્ય સરકારને 13 ઓગસ્ટ સુધીનો સમય આપ્યો છે.

  તેણે કહ્યું, મેં રાત્રે સલાઈન લગાવી છે. સલાઈન લગાવીને ઉપવાસ કરવાનો કોઈ અર્થ નથી. સરકારે અમારી માંગણીઓ 13મી ઓગસ્ટ સુધીમાં પૂરી કરવી જોઈએ. સરકાર પાસે 13મી સુધીનો સમય છે. મનોજ જરાંગેએ કહ્યું, દેવેન્દ્ર ફડણવીસ સરકાર પડી જશે. ભાજપનો એક પણ ધારાસભ્ય આવશે નહીં. 28 ઓગસ્ટે નક્કી થશે કે રાજ્યના 288 ઉમેદવારો હારશે કે જીતશે.

 સામાજિક કાર્યકર્તા મનોજ જરાંગે મહારાષ્ટ્રના મુખ્ય પ્રધાન એકનાથ શિંદે પર પ્રહાર કરતાં કહ્યું કે તેઓ મરાઠા સમુદાયને નોકરીઓ અને શૈક્ષણિક સંસ્થાઓમાં અન્ય પછાત વર્ગો (OBC) હેઠળ અનામત આપવાની પ્રક્રિયામાં વિલંબ કરી રહ્યા છે. જરંગાની માંગણીઓમાં કુણબી સમુદાયને મરાઠા સમુદાયના સભ્યો સાથે લોહીના સંબંધો તરીકે માન્યતા આપતા ડ્રાફ્ટ નોટિફિકેશનનો અમલ અને OBC શ્રેણી હેઠળ મરાઠાઓને અનામત આપવાનો સમાવેશ થાય છે. કુણબી એક ખેત સમુદાય છે. મહારાષ્ટ્રમાં તેને ઓબીસીનો દરજ્જો છે.

   જરાંગે માંગણી કરી છે કે તમામ મરાઠાઓને કુણબી પ્રમાણપત્ર આપવામાં આવે જેથી તેઓ સરકારી નોકરીઓ અને શિક્ષણમાં ક્વોટા માટે પાત્ર બની શકે. મીડિયાકર્મીઓ સાથે વાત કરતા, જરાંગે કહ્યું, “મુખ્યમંત્રી શિંદે મરાઠા સમુદાયને આરક્ષણ આપી શકે છે, પરંતુ તેઓ (પ્રક્રિયામાં) વિલંબ કરી રહ્યા છે. માત્ર શિંદે સાહેબ જ અનામત આપી શકે છે, પરંતુ તેઓ શા માટે વિલંબ કરી રહ્યા છે?

  જરાંગે કહ્યું કે સરકારે મરાઠાઓને તેમની માંગણીઓ પૂરી ન થાય ત્યાં સુધી ત્રણ અનામત વિકલ્પો પ્રદાન કરવા જોઈએ - આર્થિક રીતે નબળા વિભાગ (EWS) હેઠળ 10 ટકા, સામાજિક અને શૈક્ષણિક રીતે પછાત વર્ગ (SEBC) અને OBC ક્વોટા (27 ટકા).