<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Sunday, 28th July 2024

દિલ્હીનો કોચિંગ સેન્ટરનો ગેટ બંધ હતો છતાં કેવી રીતે આવ્યું જીવલેણ પૂર: થયો ખુલાસો : જુઓ નવો વિડિઓ

આ વીડિયોમાં જોઈ શકાય છે કે કોચિંગ સેન્ટરનો ગેટ કેવી રીતે તૂટ્યો અને ભોંયરામાં પાણી કેવી રીતે ઘૂસ્યું.

નવી દિલ્હી : શનિવારે સાંજે દિલ્હીના રાજેન્દ્રનગર વિસ્તારમાં આવેલા કોચિંગ સેન્ટરમાં પાણી ભરાઈ જતાં ત્રણ વિદ્યાર્થીઓના મોત થયા હતા.શનિવારે સાંજે ભારે વરસાદને કારણે આ વિસ્તારમાં પાણી ભરાઈ ગયા હતા. આ પાણી પાછળથી કોચિંગ સેન્ટરમાં ઘૂસી ગયું જેના કારણે ત્રણ વિદ્યાર્થીઓ ડૂબી ગયા અને મૃત્યુ પામ્યા.

   આ કોચિંગ સેન્ટર ત્રણ માળની ઇમારતના ભોંયરામાં આવેલું હતું. ઘટના સમયે અહીં 30 વિદ્યાર્થીઓ હાજર હતા. પોલીસ, ફાયર વિભાગના જવાનો અને એનડીઆરએફની ટીમે તમામ વિદ્યાર્થીઓને ભારે મુશ્કેલીથી બહાર કાઢ્યા હતા પરંતુ તેમાંથી ત્રણ વિદ્યાર્થીઓ જીવનની લડાઈ હારી ગયા હતા.

 દરમિયાન, સોશિયલ મીડિયા પર એક વીડિયો વાયરલ થઈ રહ્યો છે જે તે જ વિસ્તારનો હોવાનું કહેવાય છે જ્યાં કોચિંગ સેન્ટર આવેલું છે. આ વીડિયોમાં જોઈ શકાય છે કે કોચિંગ સેન્ટરનો ગેટ કેવી રીતે તૂટ્યો અને ભોંયરામાં પાણી કેવી રીતે ઘૂસ્યું. આ વિડીયોમાં ચારેબાજુ વિસ્તાર પાણી જોઈ શકાય છે.

  આ દરમિયાન એક કાળા રંગની કાર પાણીમાંથી તેજ ગતિએ પસાર થતી જોવા મળે છે. આ સ્પીડ એટલી ઝડપી હતી કે પાણીનો પ્રવાહ વધી ગયો અને આ પ્રવાહને કારણે કોચિંગ સેન્ટરનો ગેટ તૂટી ગયો. આ પછી, ભોંયરામાં પાણી એટલી ઝડપથી પ્રવેશ્યું કે તરત જ આખું ભોંયરું ભરાઈ ગયું.

  રેસ્ક્યુ ટીમને શનિવારે સાંજે લગભગ 7 વાગે ભોંયરામાં પાણી ભરાવાની માહિતી મળી હતી. કેટલાક લોકો ફસાયા હોવાની આશંકા પણ વ્યક્ત કરી હતી. રેસ્ક્યુ ટીમ ઘટનાસ્થળે પહોંચીને બચાવ કામગીરી શરૂ કરી હતી. આ વિસ્તારમાં પાણી ભરાવાને કારણે લાઈટો પણ કાપી નાખવામાં આવી હતી જેથી વીજ કરંટથી કોઈને નુકસાન ન થાય. આવી સ્થિતિમાં અંધારામાં વિદ્યાર્થીઓને બહાર કાઢવા માટે રેસ્ક્યુ ટીમને ભારે જહેમત ઉઠાવવી પડી હતી.

   મળતી માહિતી મુજબ, કોચિંગ સેન્ટરની અંદરનું પાણી એટલું ગંદુ હતું કે વિદ્યાર્થીઓને કંઈ દેખાતું નહોતું. રેસ્ક્યુ ટીમે એક પછી એક વિદ્યાર્થીઓને અંદર દોરડું નાખીને બચાવ્યા.

   દરમિયાન ડીએફએસના વડા અતુલ ગર્ગે જણાવ્યું હતું કે સૌથી મોટો પડકાર ભોંયરામાંથી પાણી બહાર કાઢવાનો હતો. તેમણે કહ્યું, “અમારા પંપ મશીનો પાણીને બહાર કાઢી શકે છે, પરંતુ ભારે વરસાદને કારણે રસ્તા પર અને ભોંયરામાં પાણીનું સ્તર લગભગ સમાન હતું. જેમ જેમ અમે પાણી બહાર કાઢીશું, તે ફરીથી ભરાઈ જશે.

  અધિકારીએ જણાવ્યું હતું કે ભારે વરસાદને કારણે રસ્તાઓ પર એકઠા થયેલા પાણીને દૂર કરવા માટે અગ્નિશામકોને અડધા કલાકથી વધુ રાહ જોવી પડી હતી. તેમણે જણાવ્યું કે જ્યારે રસ્તાઓ પર એકઠું થયેલું પાણી ઓસરી ગયું ત્યારે ફાયરના જવાનોએ તુરંત જ ભોંયરામાંથી પાણી કાઢીને બચાવ કાર્ય શરૂ કર્યું. તેમણે એ પણ ધ્યાન દોર્યું કે મકાનમાં પાણી બહાર કાઢવા માટે કોઈ પંપ નથી.

  ફાયર વિભાગ પાસેથી મળેલી એનઓસીમાં, બિલ્ડિંગના માલિકે ભોંયરું સ્ટોર રૂમ તરીકે દર્શાવ્યું હતું, પરંતુ માલિકે નિયમોનું ઉલ્લંઘન કરીને સ્ટોર રૂમનો લાઇબ્રેરી/ક્લાસરૂમ તરીકે ઉપયોગ કર્યો હતો. આ દરમિયાન દિલ્હી પોલીસે કોચિંગ સેન્ટરના માલિક અને સંયોજકની ધરપકડ કરી છે.

(10:24 PM IST)