<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Sunday, 28th July 2024

પાકિસ્તાનમાં બે જૂથો વચ્ચે જમીનના ટુકડા મામલે લોહિયાળ સંઘર્ષ:30 લોકોના મોત:145 લોકો ઘાયલ

હરીફ સમુદાયો એકબીજા સામે મોર્ટાર શેલ અને રોકેટ લોન્ચર સહિત વધુ અત્યાધુનિક હથિયારોનો ઉપયોગ કરી રહ્યાં છે

ઉત્તર-પશ્ચિમ પાકિસ્તાનના અશાંત આદિવાસી જિલ્લામાં જમીનના ટુકડાને લઈને બે જૂથો વચ્ચે સંઘર્ષ થયો. જોકે આ સંઘર્ષ ઘણા દિવસોથી ચાલી રહ્યો હતો, પરંતુ રવિવારે તેણે હિંસક વળાંક લીધો હતો. બંને તરફથી થયેલા ગોળીબારમાં ઓછામાં ઓછા 30 લોકો માર્યા ગયા અને 145 લોકો ઘાયલ થયાના અહેવાલ છે.

  પાકિસ્તાનની સેના અને સ્થાનિક નેતાઓ બંને જૂથો વચ્ચે સમાધાન કરાવવામાં વ્યસ્ત છે. સેનાએ સમગ્ર વિસ્તારને ઘેરી લીધો છે. આ પછી પણ અહીં અવાર-નવાર ગોળીબાર ચાલુ છે. રોકેટ લોન્ચર વડે હુમલા કરવામાં આવી રહ્યા છે.

  મળતી માહિતી મુજબ, અફઘાનિસ્તાનની સરહદે આવેલા ખૈબર પખ્તુનખ્વાના કુર્રમ જિલ્લામાં છેલ્લા પાંચ દિવસમાં આદિવાસી અથડામણમાં 30 લોકો માર્યા ગયા અને 145 લોકો ઘાયલ થયા. અહીં કેટલાક જૂથો વચ્ચે ઘણા સમયથી તણાવ ચાલી રહ્યો છે.

  થોડા સમય પહેલા બોશેરા, મલિકેલ અને દાંડાર વિસ્તારમાં શિયા અને સુન્ની જાતિઓ વચ્ચે સંઘર્ષ થયો હતો, પરંતુ પોલીસ અને સેનાના અધિકારીઓ, વૃદ્ધ નેતાઓ અને જિલ્લા વહીવટીતંત્રની મદદથી આ સંઘર્ષ શાંત થયો હતો. પરંતુ જમીનની વહેંચણી બાબતે ફરીથી બે જૂથો વચ્ચે ગોળીબાર થયો હતો. અને આ ગોળીબાર હજુ પણ ચાલુ છે. પોલીસ અને સેનાની દરમિયાનગીરીથી યુદ્ધવિરામ સ્થાપિત કરવાના પ્રયાસો કરવામાં આવી રહ્યા છે.

   આદિવાસી લડવૈયાઓએ કેટલાક વિસ્તારો ખાલી કરી દીધા છે, જે હવે વહીવટીતંત્રના નિયંત્રણમાં છે. ચાર દિવસ પહેલા જમીનના વિવાદને લઈને બે આદિવાસીઓ વચ્ચે અથડામણ થઈ હતી

  . અથડામણ પેવાર, ટાંગી, બાલિશખેલ, ખાર કાલે, મકબાલ, કુંજ અલીઝાઈ, પારા ચમકાની અને કરમાન સહિતના અન્ય વિસ્તારોમાં ફેલાઈ ગઈ હતી. સ્થાનિક રહેવાસીઓએ જણાવ્યું હતું કે હરીફ સમુદાયો એકબીજા સામે મોર્ટાર શેલ અને રોકેટ લોન્ચર સહિત વધુ અત્યાધુનિક હથિયારોનો ઉપયોગ કરી રહ્યાં છે. કુર્રમ આદિવાસી જિલ્લાના પારાચિનાર અને સદ્દા પર પણ મોર્ટાર અને રોકેટ શેલ છોડવામાં આવ્યા હતા. ગત રાત્રિના એન્કાઉન્ટરમાં ઓછામાં ઓછા ચાર હુમલા થયા હતા. આમાં ઘણા લોકો માર્યા ગયા હતા. આ હુમલાને જોતા તમામ શાળા, કોલેજો અને બજારો બંધ છે.

(11:28 PM IST)