છેલ્લા 8 દિવસમાં સૌથી લોકપ્રિય હેં...વારાણસીમાં ભાજપનો પરાજય 9:51 AM
રાહુલ ગાંધી સહિત ૭ સાંસદોને કેરીઓ મોકલી
પાકિસ્તાનની ‘મેંગો ડિપ્લોમસી' : ભાજપે દાવો કર્યો છે કે વિપક્ષી નેતા રાહુલ ગાંધી ઉપરાંત પાકિસ્તાન હાઈ કમિશનમાંથી કેરીઓ મેળવનારાઓમાં શશિ થરૂર અને સમાજવાદી પાર્ટીના સાંસદો મોહિબુલ્લા નદવી, ઝિયા ઉર રહેમાન બર્ક, અફઝલ અંસારી, ઈકરા ચૌધરી અને કપિલ સિબ્બલનો સમાવેશ થાય છે
નવી દિલ્હી તા. ૮ : એક તરફ બાંગ્લાદેશ સળગી રહ્યું છે અને બીજી તરફ પાકિસ્તાન મેંગો ડિપ્લોમસી દ્વારા ભારતના વિપક્ષી સાંસદો સુધી પહોંચવાનો પ્રયાસ કરી રહ્યું છે. ભાજપે દાવો કર્યો છે કે દિલ્હી સ્થિત પાકિસ્તાન હાઈ કમિશનરે વિપક્ષી નેતા રાહુલ ગાંધી સહિત ૭ ભારતીય સાંસદોને કેરીના કાર્ટન મોકલ્યા છે. મેંગો ડિપ્લોમસીનો એકબીજા પ્રત્યેના સંબંધોમાં સૌહાર્દના માધ્યમ તરીકે ઉપયોગ કરવામાં આવ્યો છે.
રાહુલ ગાંધી અને અન્ય વિપક્ષી સાંસદોને પાકિસ્તાની દૂતાવાસમાંથી કેરીઓ મળ્યા બાદ ભાજપે વિપક્ષ પર પ્રહારો કર્યા છે. બીજેપી નેતા અમિત માલવિયાએ ટ્વિટર પર પોસ્ટ કર્યું કે, ‘પાકિસ્તાન હાઈ કમિશન આ પસંદ કરેલા ૭ ભારતીય સાંસદોને કેરીના કાર્ટન કેમ મોકલશે? રાહુલ ગાંધી, કપિલ સિબ્બલ, શશિ થરૂર, મોહીબુલ્લા નદવી, ઝિયા ઉર રહેમાન બર્ક, અફઝલ અંસારી અને ઇકરા હસન. કેટલાક લોકોને કેરી કોણ મોકલે છે તેના પરથી પણ ઓળખી શકાય છે.
એક્સ પર પોસ્ટ કરતી વખતે કેન્દ્રીય મંત્રી ગિરિરાજે લખ્યું, ‘રાહુલ ગાંધીને ઉત્તર પ્રદેશની કેરીઓ ગમતી નથી, પરંતુ જયારે રાહુલ અને તેની ટુકડે ટુકડે ગેંગને પાકિસ્તાનથી કેરીઓ મળે છે, ત્યારે તેમને તેનો સ્વાદ ગમે છે! શું મેંગો ડિપ્લોમસીમાં પાકિસ્તાન સાથે કોઈ ડીલ થઈ રહી છે?'
મીડિયા સાથે વાત કરતા ગિરિરાજ સિંહે કહ્યું, ‘રાહુલ ગાંધીએ થોડા સમય પહેલા કહ્યું હતું કે તેમને યુપીની કેરી પસંદ નથી. પાકિસ્તાન એમ્બેસીએ તેમને કેરીઓ મોકલી છે, રાહુલ ગાંધીએ જણાવવું જોઈએ કે તેમને પાકિસ્તાની કેરીઓ સાથે અન્ય કઈ વસ્તુઓ પસંદ છે. શું તમે મોદીને હટાવવા પાકિસ્તાન પાસે કંઈક નવું માગવા ગયા છો? પાકિસ્તાન સાથે તેમના નાપાક સંબંધો છે.'
તમને જણાવી દઈએ કે કેરી પરંપરાગત રીતે રાજદ્વારી હથિયાર તરીકે કામ કરે છે. બાંગ્લાદેશના ભૂતપૂર્વ વડા પ્રધાન શેખ હસીનાએ સત્તા સંભાળ્યા પછી લગભગ દર વર્ષે વડા પ્રધાન મોદીને કેરીઓ મોકલતા હતા. આ પહેલા તેમણે પશ્ચિમ બંગાળના મુખ્યમંત્રી મમતા બેનર્જી અને પૂર્વ કોંગ્રેસ અધ્યક્ષ સોનિયા ગાંધીને પણ કેરીઓ મોકલી હતી.
ઉલ્લેખનીય છે કે વર્ષ ૨૦૧૫માં પાકિસ્તાન તરફથી સરહદ પર ગોળીબારની ઘટનાઓ વચ્ચે તત્કાલિન પાકિસ્તાનના પીએમ નવાઝ શરીફે ‘મેંગો ડિપ્લોમસી' દ્વારા મિત્રતાનો હાથ લંબાવ્યો હતો. ત્યારબાદ નવાઝ શરીફે પીએમ નરેન્દ્ર મોદીને કેરીઓ મોકલી હતી. પીએમ મોદી ઉપરાંત પાકિસ્તાનથી તત્કાલિન રાષ્ટ્રપતિ પ્રણવ મુખર્જી અને કોંગ્રેસ અધ્યક્ષ સોનિયા ગાંધીને પણ કેરીઓ મોકલવામાં આવી હતી.
(9:57 AM IST)
