કોલકાતા, તા.૮: કોલેસ્‍ટ્રોલ એક પ્રકારની ચરબી છે જે આપણા શરીરમાં ઘણા મહત્‍વપૂર્ણ કાર્યો કરે છે. પરંતુ જ્‍યારે તેની માત્રા વધે છે, ત્‍યારે તે હૃદયની બીમારીઓ, સ્‍ટ્રોક જેવા ગંભીર સ્‍વાસ્‍થ્‍ય ખતરાનું કારણ બની શકે છે.

હાલમાં કોલેસ્‍ટ્રોલને નિયંત્રિત કરવા માટે ઘણી દવાઓ ઉપલબ્‍ધ છે . જો કે, આ દવાઓ કયારેક મોંઘી હોય છે અને દરેક માટે યોગ્‍ય નથી. આ સિવાય આ દવાઓની કેટલીક આડઅસર પણ થઈ શકે છે.

કોલકાતાના એસ. એન. બોસ નેશનલ સેન્‍ટર ફોર બેઝિક સાયન્‍સના સંશોધકોએ કોલેસ્‍ટ્રોલની સમસ્‍યાનો સામનો કરવા માટે એક નવી વ્‍યૂહરચના શોધી કાઢી છે. તેઓએ પ્રોટીનની વર્તણૂક બદલીને કોલેસ્‍ટ્રોલનું સ્‍તર ઘટાડવાનો માર્ગ શોધી કાઢયો છે.

પ્રોટીન આપણા શરીર માટે ખૂબ જ મહત્‍વપૂર્ણ છે, પરંતુ કેટલીકવાર તેમાં ખોટી પ્રતિક્રિયાઓ થાય છે જે રોગો તરફ દોરી શકે છે. વૈજ્ઞાનિકોએ અત્‍યાર સુધી આ પ્રતિક્રિયાઓને રોકવા માટે નાના અણુઓનો ઉપયોગ કર્યો છે, પરંતુ આ અભિગમ બહુ અસરકારક સાબિત થયો નથી.

ભારતીય સંશોધકોએ એક નવી ટેકનિક વિકસાવી છે જેમાં પ્રોટીનના ચોક્કસ ભાગને નિશાન બનાવવામાં આવે છે. આ પ્રોટીનની વર્તણૂકમાં ફેરફાર કરે છે અને તે હાનિકારક પ્રતિક્રિયાઓ કરવામાં અસમર્થ બની જાય છે. આ ટેક્રોલોજીનો ઉપયોગ કરીને કોલેસ્‍ટ્રોલનું પ્રમાણ ઘટાડતી દવાઓ બનાવી શકાય છે.

આ નવી રીતે બનેલી દવાઓ માત્ર સસ્‍તી જ નહીં પરંતુ હાલની દવાઓ કરતાં વધુ અસરકારક પણ હોઈ શકે છે. આ એક એવી શોધ છે જેનાથી લાખો લોકોને ફાયદો થઈ શકે છે.

આ સંશોધન માત્ર કોલેસ્‍ટ્રોલની સમસ્‍યાને હલ કરવાની દિશામાં એક પગલું નથી, પરંતુ તે ભવિષ્‍યની દવાઓના વિકાસ માટે એક નવો માર્ગ પણ ખોલે છે. આનાથી અન્‍ય ઘણા રોગોની સારવારમાં પણ મદદ મળી શકે છે.

ભારતીય વૈજ્ઞાનિકોની આ શોધે માત્ર દેશને જ ગૌરવ અપાવ્‍યું નથી પરંતુ સમગ્ર વિશ્વમાં સ્‍વાસ્‍થ્‍ય ક્ષેત્રે એક નવી આશા જગાવી છે.(૯.ર૪)