નવી દિલ્હી : પીઆર શ્રીજેશ…આ નામ હંમેશા ભારતીય હોકીના ઈતિહાસમાં ગુંજતું રહેશે. જેને ગોલકીપર નહીં પણ હોપકીપર કહેવામાં આવે છે. ટીમ ઈન્ડિયાના સૌથી દિગ્ગજ ખેલાડી પીઆર શ્રીજેશે ગુરુવારે ફરી એકવાર ટીમ ઈન્ડિયાનું સપનું પૂરું કર્યું. તેણે ભારતની આશાઓને બ્રોન્ઝ અપાવ્યો હતો. ભારતની આ દીવાલ તેની છેલ્લી મેચમાં પહેલાની જેમ જ ઉત્સાહમાં જોવા મળી હતી. 36 વર્ષીય પીઆર શ્રીજેશ સ્પેન સામે ભારતીય ગોલ પોસ્ટની સામે મજબૂત રીતે ઉભો હતો

  તેણે છેલ્લી 90 સેકન્ડમાં 4 પેનલ્ટી કોર્નરનો બચાવ કર્યો હતો. એક સમયે એવું લાગતું હતું કે સ્પેનિશ ટીમ ભારત પર પ્રભુત્વ મેળવશે અને લીડ મેળવશે, પરંતુ શ્રીજેશે દરેક શોટનો યોગ્ય જવાબ આપ્યો. જ્યારે છેલ્લી 1.20 મિનિટ બાકી હતી ત્યારે સ્પેનને પેનલ્ટી કોર્નર મળ્યો, પરંતુ તે તેની સામે અડગ રહીને ગોલ થવા દીધો નહીં.

  સ્પેને ભારત સામે 15 વખત હુમલો કર્યો. આમાં 9 પેનલ્ટી કોર્નર અને 5 ફિલ્ડ ગોલના પ્રયાસોનો સમાવેશ થાય છે, પરંતુ તે માત્ર એક જ વાર સફળ રહ્યો હતો. તમને જણાવી દઈએ કે શ્રીજેશે ઈંગ્લેન્ડ સામે 11 ગોલનો બચાવ કર્યો હતો. શ્રીજેશની મદદથી આયર્લેન્ડ સામે 14, ન્યુઝીલેન્ડ સામે 14, આર્જેન્ટીના સામે 10, ઓસ્ટ્રેલિયા સામે 19, બ્રિટન સામે 21 અને જર્મની સામે 13 ગોલનો બચાવ કર્યો હતો.