મુંબઈ: મહારાષ્ટ્ર સરકારે આજે યોજાયેલી કેબિનેટ બેઠકમાં કેટલાક મહત્વના નિર્ણયો લીધા છે. કેબિનેટે 6,000 કિલોમીટરના રસ્તાઓના સિમેન્ટ કોંક્રીટાઇઝેશન માટે રૂ. 37,000 કરોડના સુધારેલા બજેટને મંજૂરી આપી છે. ખાસ કરીને ખાડાઓથી ભરેલા મુંબઈ મેટ્રોપોલિટન રિજન, મુંબઈ-ગોવા હાઈવે અને થાણે-નાસિક હાઈવેમાં રસ્તાઓની ખરાબ સ્થિતિ અંગેની ટીકા વચ્ચે આ નિર્ણય લેવામાં આવ્યો છે. મહારાષ્ટ્રમાં લાંબા સમયથી રસ્તાઓની હાલતને લઈને રોષ જોવા મળી રહ્યો છે, ખાસ કરીને વરસાદની મોસમમાં ખાડાઓથી ભરેલા રસ્તાઓને કારણે લોકોમાં રોષ જોવા મળી રહ્યો છે.

   ગયા શુક્રવારે ખુદ મુખ્યમંત્રી એકનાથ શિંદે થાણે જિલ્લાના ભિવંડીની મુલાકાત લીધી હતી અને રસ્તાના કામનું નિરીક્ષણ કર્યું હતું. તેમણે રસ્તાઓના સમારકામ અને સુધારણા પ્રત્યે તેમની પ્રતિબદ્ધતા વ્યક્ત કરી છે

   9 ઓગસ્ટના રોજ, મુખ્ય પ્રધાન એકનાથ શિંદેએ થાણે-નાસિક અને મુંબઈ-અમદાવાદ જેવા મુખ્ય હાઇવે પરના ખાડાઓનું તાત્કાલિક સમારકામ કરવા સૂચનાઓ જારી કરી હતી. નાસિક-ભિવંડી રોડની ખરાબ સ્થિતિને ટાંકીને, તેમણે આ હાઈવે પર ઉચ્ચ ગુણવત્તાની સમારકામની જરૂરિયાત પર ભાર મૂક્યો.

    મુંબઈમાં ખાડાઓની સમસ્યાનો અંત લાવવા માટે, મહાયુતિ સરકારે 2022માં શહેરના તમામ રસ્તાઓને સિમેન્ટ કોંક્રીટમાં ફેરવવાનું વચન આપ્યું હતું, જેથી આ સમસ્યા કાયમ માટે દૂર થઈ શકે.

    આ કેબિનેટ બેઠકમાં મુખ્ય પ્રધાન એકનાથ શિંદે, નાયબ મુખ્ય પ્રધાન દેવેન્દ્ર ફડણવીસ અને નાયબ મુખ્ય પ્રધાન અજિત પવારની હાજરીમાં કેટલાક અન્ય મોટા નિર્ણયો પણ લેવામાં આવ્યા હતા. તેમાં વિદર્ભ અને મરાઠવાડામાં ડેરી વિકાસ માટે ₹149 કરોડની મંજૂરી, ડેક્કન કોલેજના શિક્ષકો અને નોન-ટીચિંગ સ્ટાફ માટે મેડિકલ રિઈમ્બર્સમેન્ટ સ્કીમની મંજૂરી, ગોખલે ઈન્સ્ટિટ્યૂટ ઑફ પોલિટિક્સ એન્ડ ઈકોનોમિક્સ અને તિલક મહારાષ્ટ્ર યુનિવર્સિટીનો પણ સમાવેશ થાય છે. આ ઉપરાંત ખાનગી અને સરકારી મેડિકલ કોલેજોના નિવૃત્ત શિક્ષકોના ફિક્સ પગારનો નિર્ણય પણ લેવામાં આવ્યો હતો. 

    અન્ય એક મોટા નિર્ણયમાં નગરપાલિકા પ્રમુખનો કાર્યકાળ હવે 2.5 વર્ષથી વધારીને 5 વર્ષ કરવામાં આવ્યો છે. કેબિનેટે સોલાર પાવર પ્રોજેક્ટ્સ માટે KfW ડેવલપમેન્ટ બેંક સાથેના નિશ્ચિત વ્યાજ કરારને માર્ચ 2025 સુધી અને પાવર લૂમ્સ માટે રજિસ્ટ્રેશનમાં મુક્તિ તેમજ વધારાના પાવર રેટ વળતર આપવાનો પણ નિર્ણય લીધો હતો.