બેંગ્‍લોર, તા.૨૨: ભરણપોષણની માંગણી કરતી પત્‍નીનો એક અજીબોગરીબ મામલો કર્ણાટક હાઈકોર્ટમાં પહોંચ્‍યો કે છૂટાછેડા માંગતી મહિલાની માંગ સાંભળીને કોર્ટમાં હાજર લોકો પણ દંગ રહી ગયા. કેસની સુનાવણી કરી રહેલા જજ પણ બેંગલુરુની એક મહિલાની ભારે માંગ સાંભળીને આશ્‍ચર્યચકિત થઈ ગયા હતા. ભરણપોષણ ભથ્‍થામાં માંગવામાં આવેલી રકમની સુનાવણી પછી ન્‍યાયાધીશે કહ્યું, આગામી સુનાવણીમાં સાચા આંકડા સાથે આવો. આટલા પૈસા કોણ ખર્ચે છે? તેના પર મહિલાના વકીલે કહ્યું કે તેનો અસીલ બ્રાન્‍ડેડ કપડા પહેરે છે અને આ સિવાય તેણે એક શ્વાસમાં અનેક ખર્ચાઓ ગણાવી દીધા. આટલી મોટી રકમ કયાં ખર્ચાશે તેની માંગ સાંભળીને જજ ગુસ્‍સે થઈ ગયા.

ભરણપોષણ ભથ્‍થા પેટે દર મહિને ૬ લાખ ૧૬ હજાર રૂપિયા

- ઘૂંટણની ફિઝિયોથેરાપી માટે દર મહિને ૪-૫ લાખ.

- જૂતા અને કપડાં માટે દર મહિને ૧૫,૦૦૦ રૂપિયા.

- ઘરે ખાવા માટે ૬૦,૦૦૦ રૂપિયા દર મહિને.

- આમાં બહાર ખાવા માટે અલગથી પૈસાની માંગણીનો સમાવેશ થાય છે.

હાઈકોર્ટના જજે ખૂબ જ કડક ટિપ્‍પણી કરી અને કહ્યું કે, એકલી મહિલા આટલો ખર્ચ કરી શકે નહીં. જો તેણીને બ્રાન્‍ડેડનો શોખ છે તો તેણે પોતે જ કમાવવું જોઈએ. આવા કિસ્‍સાઓ કોર્ટ પ્રક્રિયાનું શોષણ છે. જો તે આટલા પૈસા ખર્ચવા માંગે છે, તો તે પોતે કમાઈ શકે છે. મહેરબાની કરીને કોર્ટને ન કહો કે આ બધું જ વ્‍યક્‍તિને જોઈએ છે. ૬૧૬૩૦૦ રૂપિયા પ્રતિ માસ. શું કોઈ આટલો ખર્ચ કરે છે? એકલીસ્ત્રી પોતાના માટે આટલો ખર્ચ કરી શકે છે. જો તેણી ખર્ચ કરવા માંગે છે, તો તેણીને કમાવવા દો. તમારે બાળકોની સંભાળ લેવાની જરૂર નથી. તમારે આ પૈસા ફક્‍ત તમારા માટે જોઈએ છે. તમારે સંવેદનશીલ બનવું જોઈએ. ન્‍યાયાધીશે મહિલાના વકીલને વાજબી રકમની માગણી કરવા કહ્યું અન્‍યથા તેની અરજી ફગાવી દેવામાં આવશે.

તેવી જ રીતે, ભારતની અદાલતોમાં લાખો કેસ પેન્‍ડિંગ છે અને ફાઇલો કોર્ટના રેકોર્ડ રૂમમાં ધૂળ ભેગી કરી રહી છે. આવી સ્‍થિતિમાં લગ્ન અને છૂટાછેડાની કાનૂની ગૂંચવણો લોકોને આશ્‍ચર્યમાં મૂકી દે છે. આવા જ એક કેસમાં જ્‍યારે એક મહિલાએ કર્ણાટક હાઈકોર્ટમાં તેના પતિ પાસેથી ૬ લાખ ૧૬ હજાર રૂપિયા ભરણપોષણની માંગણી કરી તો આ મામલો સોશિયલ મીડિયા પર વાયરલ થઈ ગયો. કેટલાક નેટીઝન્‍સે કહ્યું, અરે બહેન, આ એ પતિ (ભૂતપૂર્વ પતિ) છે, ‘ગિની' નથી જે છૂટાછેડા પછી પણ તમારી દરેક ઇચ્‍છા પૂરી કરવાનું ચાલુ રાખશે.