નવી દિલ્હી તા.૨૨ :ભારત બંધ દરમિયાન પોલીસ સ્ટેશન પર પથ્થરમારો કરવા બદલ છતરપુર  પોલીસે પૂર્વ સદર શહેઝાદ હાજી વિરુદ્ધ કાર્યવાહી કરી છે. શહજાદ હાજીએ પોલીસ સ્ટેશનનો ઘેરાવ કર્યો હતો. ઘેરાબંધી દરમિયાન પથ્થરમારામાં પોલીસકર્મીઓ સહિત ઘણા અધિકારીઓ ઘાયલ થયા હતા. હવે પ્રશાસનનું બુલડોઝર આલીશાન ઘર સુધી પહોંચી ગયું અને બિલ્ડીંગને તોડી પાડવાનું શરૂ કર્યું.

ગુરુવારે સવારે વહીવટીતંત્રનું બુલડોઝર પૂર્વ સદર શહેઝાદ હાજીના આલીશાન ઘર પર પહોંચી ગયું હતું અને બિલ્ડિંગને તોડવાનું શરૂ કર્યું હતું. આ પ્રસંગે વહીવટી તંત્રના પોલીસ અધિકારીઓ હાજર રહ્યા હતા. સમગ્ર શહેરમાં ચુસ્ત સુરક્ષા વ્યવસ્થા ગોઠવવામાં આવી છે. એસપી અગમ જૈને સમગ્ર છતરપુર શહેરને છાવણીની જેમ ફેરવી દીધું છે. દરેક શેરી બજારમાં પોલીસની ટીમો એલર્ટ પર છે.

મુખ્યમંત્રી મોહન યાદવે પણ છતરપુરની ઘટનાની આકરી ટીકા કરી અને કહ્યું કે બદમાશો વિરુદ્ધ કાર્યવાહી થવી જોઈએ અને તેમની ઓળખ થવી જોઈએ. આ પછી છતરપુર પોલીસ પ્રશાસન બદમાશોની ઓળખ કરવામાં લાગી ગયું.