નવી દિલ્હી. વડાપ્રધાન મોદી પોલેન્ડની બે દિવસીય મુલાકાતે છે. પીએમ મોદીએ પોલેન્ડના વડાપ્રધાન ડોનાલ્ડ ટસ્ક સાથે પત્રકાર પરિષદને સંબોધી હતી. બંને પક્ષો 2024-2028ના વર્ષોમાં દ્વિપક્ષીય સહકારને માર્ગદર્શન આપતી પાંચ વર્ષની કાર્ય યોજના તૈયાર કરવા અને અમલ કરવા સંમત થયા હતા.

   યુરોપિયન દેશો સાથે પોતાના સંબંધોને મજબૂત કરવામાં વ્યસ્ત ભારત મધ્ય યુરોપમાં ઝડપથી આર્થિક પ્રગતિ કરી રહ્યું છે. પોલેન્ડ સાથેના તેના દ્વિપક્ષીય સંબંધોને દેશે વ્યૂહાત્મક ભાગીદારીનો દરજ્જો આપ્યો છે. પીએમ મોદીએ વોર્સોમાં પોલેન્ડના રાષ્ટ્રપતિ એન્ડ્રેજ ડુડા સાથે મુલાકાત કરી હતી. બંને દેશોએ વ્યૂહાત્મક ભાગીદારી હેઠળ વર્ષ 2024-28 માટે દ્વિપક્ષીય સંબંધોના વિવિધ ક્ષેત્રો માટે ઘણા લક્ષ્યો નક્કી કર્યા છે. વોર્સોમાં પોલેન્ડના પીએમ ડોનાલજ ટસ્ક અને પીએમ મોદી વચ્ચે યોજાયેલી બેઠકમાં આ નિર્ણય લેવામાં આવ્યો હતો.

    ભારતીય વડાપ્રધાન 45 વર્ષ બાદ પોલેન્ડની મુલાકાતે આવ્યા છે. ટસ્ક સરકારે પીએમ મોદીનું ખૂબ જ ઉષ્માભર્યું સ્વાગત કર્યું છે. બંને વડાપ્રધાનોએ વેપાર અને રોકાણ, ટેક્નોલોજી અને શહેરી ઈન્ફ્રાસ્ટ્રક્ચરના ક્ષેત્રોમાં સંબંધોને ગાઢ બનાવવા પર વિશેષ ભાર મૂક્યો છે. પોલેન્ડ હાલમાં મધ્ય એશિયામાં ભારતનું સૌથી મોટું વેપારી ભાગીદાર છે અને મોદીએ તેમની મુલાકાત બાદ દ્વિપક્ષીય વેપારમાં વધુ વૃદ્ધિની શક્યતા વ્યક્ત કરી છે. પોલેન્ડમાં પ્રશિક્ષિત અને કુશળ ભારતીય કામદારોને વધુ તકો પૂરી પાડવા માટે બંને સરકારો વચ્ચે કરાર કરવા પર પણ સંમતિ દર્શાવવામાં આવી છે. 

    ટસ્ક સાથે અંગત અને સત્તાવાર વાતચીત બાદ યોજાયેલી પ્રેસ કોન્ફરન્સમાં પીએમ મોદીએ કહ્યું, “રાજદ્વારી સંબંધોની 70મી વર્ષગાંઠ પર અમે સંબંધોને વ્યૂહાત્મક ભાગીદારીમાં બદલવાનો નિર્ણય લીધો છે. અમે સંબંધોને નવી દિશા આપવા માટે ઘણી નવી તકો ઓળખી છે. આપણી સંસદો વચ્ચે આદાનપ્રદાન વધારવું જોઈએ. આર્થિક સહયોગનું વ્યાપક સ્વરૂપ આપવા માટે ખાનગી ક્ષેત્રને સામેલ કરવામાં આવશે. પોલેન્ડ ફૂડ પ્રોસેસિંગમાં વિશ્વ અગ્રણી છે. અમે ઈચ્છીએ છીએ કે તેઓ ભારતમાં બની રહેલા મેગા ફૂડ પાર્કમાં જોડાય. ભારતમાં થઈ રહેલા ઝડપી શહેરીકરણને કારણે, પોલેન્ડની કંપનીઓ માટે જળ શુદ્ધિકરણ, કચરાનું વ્યવસ્થાપન અને શહેરોમાં માળખાકીય સુવિધાઓ ઊભી કરવાની ઘણી તકો છે. 

  બંને દેશો વચ્ચે આતંકવાદ અને સુરક્ષાને લઈને પણ વાતચીત થઈ હતી. બંને વચ્ચે સંમતિ સધાઈ હતી કે તેઓ આતંકવાદ સામે સાથે મળીને લડશે.