<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 2nd September 2024

નોકરીની શોધમાં અન્‍ય રાજ્‍યોમાં જનારામાંથી અડધા લોકો બિહાર-યુપીના

દેશભરમાં લગભગ ૩૦ કરોડ લોકો કામ માટે અન્‍ય રાજયોમાં જાય છે ઉત્તર પ્રદેશના ૧૦ કરોડ લોકોએ સ્‍થળાંતર કર્યુ : ૩ કરોડ લોકો બિહારના છે

નવી દિલ્‍હી, તા.૨:  નોકરીની શોધમાં અન્‍ય રાજ્‍યોમાં સ્‍થળાંતર કરનારા લગભગ અડધા લોકો માત્ર બે રાજ્‍યો બિહાર અને ઉત્તર પ્રદેશના છે. સરકારી આંકડામાં આ વાત સામે આવી છે. દેશભરમાં લગભગ ૩૦ કરોડ લોકો નોકરી માટે અન્‍ય રાજ્‍યોમાં જાય છે અને આ અંતર્ગત તેઓ સરકાર દ્વારા બનાવવામાં આવેલા ઈ-શ્રમ પોર્ટલ પર તેમના નામ નોંધણી કરાવે છે. અત્‍યાર સુધીમાં લગભગ ૩૦ કરોડ લોકોએ આમાં પોતાના નામ નોંધાવ્‍યા છે. તેમાંથી લગભગ ૩ કરોડ બિહારના છે, જ્‍યારે લગભગ ૧૦ કરોડ ઉત્તર પ્રદેશના છે. આમાંના મોટાભાગના કામદારો અન્‍ય રાજ્‍યોમાં કામ કરે છે.

આરજેડીના રાજ્‍યસભા સાંસદ સંજય યાદવે સંસદમાં પૂછયું હતું કે શું એ વાત સાચી નથી કે બિહારમાં રોજગાર અને નોકરીના વિકલ્‍પોના અભાવે રાજ્‍યના લોકોને અન્‍ય રાજ્‍યોમાં સ્‍થળાંતર કરવું પડે છે? તેમણે આ સંબંધિત ડેટા વિશે માહિતી માંગી હતી. તેના પર તેમણે સરકારને એ પણ પૂછયું કે બિહારમાંથી રોજગાર માટે અન્‍ય રાજ્‍યોમાં સ્‍થળાંતર કરનારા લોકોની કુલ સંખ્‍યા છે? કેન્‍દ્રીય શ્રમ અને રોજગાર મંત્રીએ તેમના પ્રશ્‍ન પર રજૂ કરેલા આંકડાઓ અનુસાર, બિહારમાંથી ૨ કરોડ ૯૦ લાખથી વધુ લોકો અન્‍ય રાજ્‍યોમાં નોકરી માટે સ્‍થળાંતર કરી ચૂકયા છે. આ માત્ર એ જ નંબર છે જેમણે ઈ-શ્રમ પોર્ટલ પર પોતાના નામ નોંધાવ્‍યા છે. આ સાથે, ઈ-શ્રમ પોર્ટલ પર અન્‍ય એક ચિંતાજનક આંકડો એ છે કે બિહારમાં ૯૦ ટકા કામદારોની માસિક આવક ૧૦,૦૦૦ રૂપિયાથી ઓછી છે. ઓછી આવકને સ્‍થળાંતરનું મુખ્‍ય કારણ માનવામાં આવે છે. ઉપરાંત, સરકારી અધિકારીઓ પોતે સ્‍વીકારે છે કે હજુ પણ શ્રમ પોર્ટલ પર કરોડો નામ નોંધાયા નથી.

છેલ્લા કેટલાક વર્ષોમાં હિન્‍દી પટ્ટામાં યુવા મતદારોના ઉદભવ પછી, સ્‍થળાંતર અને રોજગાર હવે એક મોટો મુદ્દો બનવા લાગ્‍યો છે. આ મુદ્દો સીધો જ મુખ્‍ય પ્રવાહનો રાજકીય મુદ્દો બની ગયો છે જેના કારણે તમામ રાજકીય પક્ષોએ તેને તેમના એજન્‍ડામાં સામેલ કરવો પડ્‍યો છે. તેની આડ અસર પણ જોવા મળી રહી છે કે રિવર્સ માઈગ્રેશનને આકર્ષવા માટે રાજ્‍ય અન્‍ય રાજ્‍યોના લોકોને નોકરી આપવાનું ટાળી રહ્યું છે અને આ માટે કાયદાકીય માર્ગ પણ અપનાવી રહ્યું છે. પરંતુ નિષ્‍ણાતોના મતે, આ એક શોર્ટ કટ રસ્‍તો છે અને આ વધતા ગંભીર મુદ્દાને ઉકેલવા માટે, રાજકીય પક્ષોએ વ્‍યવહારુ અને લાંબા ગાળાની યોજના સાથે આવવું પડશે

(12:42 PM IST)