તા. ૩ સપ્ટેમ્બર ર૦ર૪ વિક્રમ સંવત ર૦૮૦ શ્રાવણ વદ-૧૫, મંગળવાર
News of Monday, 2nd September 2024
હરિયાણા ચૂંટણીઃ કોંગ્રેસની CEC બેઠકમાં 34 નામોને મંજૂરી :ભૂપેન્દ્ર હુડ્ડા ગઢી સાંપલાથી ચૂંટણી લડી શકે:સુરેજવાલા-સૈલજાના નામની ચર્ચા નહીં
હરિયાણામાં વિધાનસભાની 90 બેઠકો માટે 5 ઓક્ટોબરે એક જ તબક્કામાં મતદાન થશે

હરિયાણા વિધાનસભા ચૂંટણીને લઈને કોંગ્રેસ CECની બેઠક યોજાઈ હતી. આ બેઠકમાં હરિયાણાની 90 વિધાનસભા બેઠકોમાંથી 49 બેઠકો પર ચર્ચા કરવામાં આવી હતી જ્યારે 34 બેઠકો માટે ઉમેદવારો પણ નક્કી કરવામાં આવ્યા છે. બાકીની 41 બેઠકો પર આવતીકાલે ફરીથી બેઠક યોજાશે.
સૂત્રોના જણાવ્યા અનુસાર કોંગ્રેસ પાર્ટી ભૂપેન્દ્ર સિંહ હુડ્ડાને ગઢી સાંપલા કિલોઈ વિધાનસભા સીટ પરથી ઉમેદવાર બનાવી શકે છે. સાથે જ પ્રદેશ પ્રમુખ ઉદયભાન હોડલ બેઠક પરથી ઉમેદવાર બની શકે છે. બેઠકમાં વિનેશ ફોગટ, કુમારી શૈલજા અને રણદીપ સુરજેવાલાના નામ પર કોઈ ચર્ચા થઈ ન હતી.
દિલ્હીમાં પાર્ટી હેડક્વાર્ટરમાં આયોજિત આ બેઠકમાં પૂર્વ અધ્યક્ષ રાહુલ ગાંધી અને CECના અન્ય સભ્યો સાથે પ્રમુખ મલ્લિકાર્જુન ખડગેએ હાજરી આપી હતી. કોંગ્રેસે હરિયાણાને લઈને હજુ સુધી એક પણ યાદી બહાર પાડી નથી. લોકસભા ચૂંટણીમાં સારા દેખાવથી ખુશ પાર્ટી વિધાનસભાની ચૂંટણીમાં ઉતાવળ કરવા માંગતી નથી.
હરિયાણા કોંગ્રેસના પ્રભારી દીપક બાવરિયાએ કહ્યું કે સામાન્ય રીતે સતત બે વાર હારનારાઓને ટિકિટ આપવામાં આવશે નહીં. સ્ક્રિનિંગ કમિટીએ કોઈ પણ સાંસદને ટિકિટ નહીં આપવાનો નિર્ણય લીધો હતો, આખરી નિર્ણય હાઈકમાન્ડ લેશે, પરંતુ હજુ સુધી હાઈકમાન્ડે અમને સાંસદોને ટિકિટ આપવાનું કહ્યું નથી.
રાજ્યમાં વિધાનસભાની ચૂંટણી પહેલા મુખ્યમંત્રીના ચહેરાને લઈને કોંગ્રેસમાં જંગ શરૂ થઈ ગયો છે. કોંગ્રેસ નેતા કુમારી સેલજા પોતાને સીએમ ચહેરો ગણાવી રહી છે, બીજી તરફ ભૂપેન્દ્ર સિંહ હુડ્ડાનું જૂથ તેમના પુત્ર દીપેન્દ્ર હુડ્ડાને સીએમ ચહેરો ગણાવી રહ્યું છે. હુડ્ડા અને શૈલજા વચ્ચે ઘણા મુદ્દાઓ પર અણબનાવ હોવાના અહેવાલો પહેલા પણ આવી ચૂક્યા છે
કોંગ્રેસને એવો પણ ડર છે કે પાર્ટીમાં જૂથવાદને કારણે તેને નુકસાન વેઠવું પડી શકે છે. સીઈસીની બેઠક પહેલા, જ્યારે ગયા મહિને હરિયાણાના નેતાઓ સાથે બેઠક થઈ હતી, ત્યારે પાર્ટીએ હરિયાણા કોંગ્રેસના કેટલાક નેતાઓને સલાહ પણ આપી હતી. આ માટે કહેવામાં આવ્યું હતું કે પાર્ટીના મહાસચિવ કેસી વેણુગોપાલ અલગથી વાત કરશે અને મુદ્દાઓનો ઉકેલ શોધશે.
(9:52 PM IST)









છેલ્લા 8 દિવસમાં સૌથી લોકપ્રિય 
