<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Saturday, 7th September 2024

લો કરલો બાત.... રોડ બનાવવામાં ૧૮૯૬ કરોડ ખર્ચાયા : ટોલ વડે ૮૩૪૯ કરોડ વસૂલ્‍યા

RTIના ખુલાસા બાદ સોશિયલ મીડિયા પર ગુસ્‍સો

નવી દિલ્‍હી, તા.૭: આ દિવસોમાં સોશિયલ મીડિયા પર રોડ અને ટોલ વસૂલાતના મુદ્દે જબરદસ્‍ત ચર્ચા શરૂ થઈ ગઈ છે. ૧૮૯૬ કરોડ રૂપિયાના ખર્ચે નેશનલ હાઈવે બનાવવામાં આવ્‍યો હતો, જ્‍યારે તેના પર બનેલા ટોલ પ્‍લાઝામાંથી ૮૩૪૯ કરોડ રૂપિયા વસૂલવામાં આવ્‍યા હોવાની માહિતી સામે આવ્‍યા બાદ આ ચર્ચા શરૂ થઈ હતી.

રાજસ્‍થાનના જયપુરથી પત્ર લખનાર દર્શકે કહ્યું કે દિલ્‍હી-જયપુર હાઈવે એટલે કે NH-8 પર મનોહરપુર ટોલ પ્‍લાઝા છે. આ ટોલ ઘણા સમયથી વસૂલવામાં આવી રહ્યો છે. તેની કિંમત વસૂલ કરવામાં આવી છે, તે પછી પણ ટોલ બંધ કરવામાં આવી રહ્યો નથી.

આ નેશનલ હાઈવે પર મનોહરપુર સિવાય શાહજહાંપુર અને દૌલતપુર બે ટોલ પ્‍લાઝા છે. આ પછી આજતકે આરટીઆઈ દ્વારા ત્રણેય ટોલ પ્‍લાઝાની માહિતી માંગી હતી, જેમાંથી એક આરટીઆઈનો જવાબ મળ્‍યો હતો.

RTIમાં પૂછવામાં આવ્‍યું કે રાજસ્‍થાનમાં ગુરુગ્રામ-કોટપુતલી-જયપુરથી NH-૮નું નિર્માણ કયારે થયું અને ટોલ ટેક્‍સ કયારે લાગુ કરવામાં આવ્‍યો? જવાબમાં જણાવાયું હતું કે આ ટોલ પ્‍લાઝા પર ૦૩-૦૪-૨૦૦૯થી ટોલ વસૂલવામાં આવે છે. આ પછી આજતકે એ પણ પૂછયું હતું કે રોડ બનાવવાનો ખર્ચ કેટલો થયો અને તેમાં સરકારનો કેટલો હિસ્‍સો હતો? કહેવામાં આવ્‍યું હતું કે હાઈવેના નિર્માણમાં ૧૮૯૬ કરોડ રૂપિયાનો ખર્ચ કરવામાં આવ્‍યો હતો.

આરટીઆઈમાં આગળનો પ્રશ્‍ન પૂછવામાં આવ્‍યો હતો કે આ રોડ પર કેટલો ટોલ ટેક્‍સ વસૂલવામાં આવ્‍યો છે? તેના જવાબમાં જણાવવામાં આવ્‍યું હતું કે ૨૦૨૩ સુધી આ ટોલમાંથી ૮૩૪૯ કરોડ રૂપિયા એકત્ર થયા છે. તમને જણાવી દઈએ કે આ રકમથી ગુરુગ્રામથી જયપુરને જોડતા ૪ હાઈવે બનાવવામાં આવી શકે છે. તેમજ આ ટોલ પ્‍લાઝા આજ સુધી બંધ કરવામાં આવ્‍યો નથી.

જ્‍યારે આ માહિતી આજતક દ્વારા સામે આવી ત્‍યારે સોશિયલ મીડિયા પર ચર્ચા શરૂ થઈ ગઈ. લોકો તેમની પોસ્‍ટ દ્વારા આ સવાલ પૂછી રહ્યા છે કે જ્‍યારે વાહન ખરીદતી વખતે રોડ ટેક્‍સ ભરાય છે તો પછી રસ્‍તા પર મુસાફરી કરવા પર દર ૫૦ કિલોમીટરે ટોલ ટેક્‍સ કેમ વસૂલવામાં આવે છે? અન્‍ય એક યુઝરે કહ્યું કે જો આવા તમામ મોટા હાઈવેની પણ RTI દ્વારા તપાસ કરવામાં આવે તો ૪ ગણા નફાના સમાન આંકડાઓ સામે આવશે.

(10:39 AM IST)