જમ્મુ-કાશ્મીરમાં વિધાનસભાની ચૂંટણીને લઈને રાજકીય ગતિવિધિઓ તેજ છે. બુધવારે દિલ્હીની તિહાર જેલમાં બંધ જમ્મુ-કાશ્મીરના બારામુલાના સાંસદ શેખ અબ્દુલ રશીદ બહાર આવ્યા છે.

    અત્રે ઉલ્લેખનીય છે કે એન્જિનિયર રાશિદ તરીકે ઓળખાતા આ સાંસદે લોકસભા 2024ની ચૂંટણીમાં પૂર્વ સીએમ ઓમર અબ્દુલ્લાને હરાવ્યા હતા. જેલમાંથી બહાર આવ્યા બાદ સાંસદે કહ્યું કે તેમની લડાઈ સત્તા માટે નહીં પણ જનતા માટે છે. તેમણે વધુમાં કહ્યું કે ઓમર અબ્દુલ્લાની લડાઈ ખુરશી માટે છે પરંતુ મારી લડાઈ લોકો માટે છે.

   સાંસદ પર 2019માં આતંકવાદી ફંડિંગનો આરોપ છે. આ કેસમાં જ દિલ્હીની એક કોર્ટે તેને વચગાળાના જામીન આપ્યા છે. સાંસદે મીડિયામાં આપેલા પોતાના નિવેદનોમાં વડાપ્રધાન મોદી પર પણ નિશાન સાધતા કહ્યું કે પીએમની નવી કાશ્મીર વાર્તા નિષ્ફળ ગઈ છે. તેમણે કહ્યું કે હું કલમ 370 પર મારા લોકોને નિરાશ નહીં કરું. હું પ્રતિજ્ઞા કરું છું કે હું પીએમ મોદીના 'નયા કાશ્મીર'ના વર્ણન સામે લડીશ, જે સંપૂર્ણ રીતે નિષ્ફળ રહી છે.