નવી દિલ્‍હી તા. ૧૨ : આ વર્ષે દેશના અનેક રાજયોમાં ભારે વરસાદે તબાહી મચાવી છે. પર્વતોથી મેદાનો સુધી વરસાદ ચાલુ રહે છે. અનેક રાજયોમાં પૂર જેવી સ્‍થિતિ સર્જાઈ છે. અગાઉ આકરી ગરમીએ ઉત્તર ભારતને ખૂબ જ પરસેવો પાડ્‍યો હતો. મે-જૂન મહિનામાં રાજસ્‍થાનના અનેક વિસ્‍તારોમાં તાપમાનનો પારો ૫૦ ડિગ્રીને પાર કરી ગયો હતો. આકરી ગરમી અને મુશળધાર વરસાદ બાદ હવે ઠંડીએ લોકોને પરેશાન કરી દીધા છે. વર્લ્‍ડ મીટીરોલોજીકલ ઓર્ગેનાઈઝેશન એ આગાહી કરી છે કે આ વર્ષે કડકડતી ઠંડી પડશે. WMO કહે છે કે તીવ્ર ઠંડીનું કારણ લા નીના અસર હશે.

WMOનું કહેવું છે કે ભારતના ઉત્તરીય ભાગોમાં તીવ્ર ઠંડી પડશે. એ પણ નોંધનીય છે કે આ વર્ષે સામાન્‍ય કરતાં વધુ ઠંડી રહેશે એટલું જ નહીં પરંતુ શિયાળાની મોસમનો સમયગાળો પણ વધશે. WMO અનુસાર, વર્ષના અંત સુધીમાં લા નીનાની સ્‍થિતિ વધુ મજબૂત થવાની ૬૦ ટકા સંભાવના છે, જેના કારણે દેશના ઉત્તરીય ભાગોમાં સામાન્‍ય સ્‍થિતિ કરતાં વધુ ઠંડી પડશે.

WMO એ અહેવાલ આપ્‍યો છે કે સપ્‍ટેમ્‍બર-નવેમ્‍બર ૨૦૨૪ સુધીમાં લા નીના સ્‍થિતિ બનવાની ૫૫% સંભાવના છે અને તે ઓક્‍ટોબર ૨૦૨૪ થી ફેબ્રુઆરી ૨૦૨૫ સુધી ૬૦% સુધી મજબૂત થવાની અપેક્ષા છે. લા નીનાની અસર ભારતમાં ચોમાસા દરમિયાન તીવ્ર અને લાંબા સમય સુધી વરસાદનું કારણ બને છે અને ઉત્તર ભારતમાં સામાન્‍ય સ્‍થિતિ કરતાં વધુ ઠંડી પડે છે. વર્ષના અંત સુધીમાં લા નીનાની અસર વધશે, જેના કારણે ઉત્તર ભારતના રાજયોમાં સામાન્‍ય કરતાં વધુ ઠંડી પડી શકે છે.

અહીં એ જાણવું પણ જરૂરી છે કે લા નીના શું છે જેના કારણે આ વર્ષે ઠંડી વધુ પડી શકે છે. વાસ્‍તવમાં, લા નીનાનો અર્થ છે કે મધ્‍ય અને પૂર્વ વિષુવવૃત્તીય પેસિફિક મહાસાગરમાં સમુદ્રની સપાટીનું તાપમાન નોંધપાત્ર રીતે ઘટે છે. આ ફેરફાર ઉષ્‍ણકટિબંધીય વાતાવરણીય પરિભ્રમણને અસર કરે છે, જેમ કે પવન, દબાણ અને વરસાદ. સામાન્‍ય રીતે, લા નીના ભારતમાં ચોમાસા દરમિયાન તીવ્ર અને લાંબા સમય સુધી વરસાદનું કારણ બને છે. લા નીનાને કારણે શિયાળો પણ સામાન્‍ય કરતાં વધુ ઠંડો હોય છે. દરેક લા નીના ઇવેન્‍ટની અસર અલગ અલગ હોય છે. તે તેની તીવ્રતા, અવધિ, વર્ષનો સમય અને અન્‍ય આબોહવા પરિબળો પર આધાર રાખે છે. સામાન્‍ય રીતે, લા નીનાની અસર અલ નીનોથી વિપરીત હોય છે.