નવી દિલ્હી :મુસ્લિમ બહુમતી ધરાવતા દેશ તાજિકિસ્તાને હિજાબ અને અન્ય ધાર્મિક વસ્ત્રો પહેરવા પર પ્રતિબંધ મૂક્યો છે. તાજિકિસ્તાનમાં છેલ્લા 30 વર્ષથી સત્તા પર રહેલા રાષ્ટ્રપતિ ઈમોમાલી રહેમાનનું માનવું છે કે ધાર્મિક ઓળખ દેશના વિકાસમાં અવરોધ ઊભો કરે છે. સરકારે આ વર્ષે જૂનમાં આ કાયદો લાગુ કર્યો હતો. પરંતુ હવે તેનો કડક અમલ શરૂ થયો છે. 

  રાષ્ટ્રપતિ તેમના દેશમાં પશ્ચિમી જીવનશૈલીને પ્રોત્સાહન આપવામાં વ્યસ્ત છે. તાજિકિસ્તાનની સરકારનું કહેવું છે કે આ પ્રતિબંધનો હેતુ તેના રાષ્ટ્રીય સાંસ્કૃતિક મૂલ્યોનું રક્ષણ કરવાનો છે. આ અંધશ્રદ્ધા અને ઉગ્રવાદ સામે લડવામાં મદદ કરશે.

2020ની વસતિ ગણતરી મુજબ, તાજિકિસ્તાનમાં 96 ટકા વસ્તી મુસ્લિમ છે. પરંતુ ત્યાંની સરકાર ઇસ્લામિક જીવનશૈલી અને મુસ્લિમ ઓળખને બિનસાંપ્રદાયિકતા માટે પડકાર માને છે. 1994થી સત્તામાં રહેલા ઈમોમાલી રહેમાને પણ દાઢી રાખવા પર પ્રતિબંધ મૂક્યો હતો. આ પ્રતિબંધોનું ઉલ્લંઘન કરવા બદલ લોકોને સજા અને ભારે દંડનો સામનો કરવો પડે છે.

તાજિકિસ્તાને 2007થી શાળાઓમાં અને 2009થી જાહેર સંસ્થાઓમાં હિજાબ પહેરવા પર પ્રતિબંધ મૂક્યો હતો. પરંતુ હવે દેશમાં ક્યાંય પણ મહિલા હિજાબ કે કપડાથી માથું ઢાંકી શકશે નહીં. દેશમાં દાઢી રાખવા સામે કોઈ કાયદો નથી. આમ છતાં લોકોની દાઢી બળજબરીથી કાપી નાખવામાં આવે છે.

TRT વર્લ્ડના રિપોર્ટ અનુસાર, જો કોઈ વ્યક્તિ પ્રતિબંધિત કપડાં પહેરે છે, તો તેને ભારે દંડનો સામનો કરવો પડે છે. સામાન્ય લોકો પર 64,772 રૂપિયા, કંપનીઓ પર 2.93 લાખ રૂપિયા અને સરકારી અધિકારીઓ પર 4 લાખ રૂપિયાથી 4,28,325 રૂપિયા સુધીનો દંડ થઈ શકે છે.

તાજિકિસ્તાનમાં જો માતા-પિતા તેમના બાળકોને ધાર્મિક શિક્ષણ મેળવવા વિદેશ મોકલે છે, તો તેમને સજા કરવામાં આવે છે. આ ઉપરાંત 18 વર્ષથી ઓછી ઉંમરના બાળકો પરવાનગી વિના મસ્જિદમાં જઈ શકતા નથી. ઈદ-ઉલ-ફિત્ર અને ઈદ-ઉલ-અઝહા પર બાળકોની ઉજવણી પર પણ પ્રતિબંધ છે.

તાજિકિસ્તાન સુન્ની મુસ્લિમ બહુમતી ધરાવતો દેશ છે. પરંતુ અહીં હિજાબ અને દાઢી રાખવી એ વિદેશી સંસ્કૃતિ ગણાય છે. બે વર્ષ પહેલા તાજિકિસ્તાનની રાજધાની દુશાંબેમાં કાળા કપડાના વેચાણ પર પ્રતિબંધ લાદવામાં આવ્યો હતો. તુર્કીના દૈનિક સબાહના અહેવાલ મુજબ, 18 વર્ષથી ઓછી ઉંમરના કિશોરો શુક્રવારની પ્રાર્થનામાં ભાગ લઈ શકતા નથી. 2015માં તાજિકિસ્તાનની ધાર્મિક બાબતો માટેની રાજ્ય સમિતિએ 35 વર્ષથી ઓછી ઉંમરના લોકોને હજ યાત્રા પર જવા પર પ્રતિબંધ મૂક્યો હતો.
તાજિકિસ્તાનની સરકાર કટ્ટરવાદને સૌથી મોટો ખતરો માને છે. તેમનું માનવું છે કે આ પગલાં કટ્ટરવાદ સામે લડવામાં મદદ કરશે. છેલ્લા કેટલાક વર્ષોમાં તાજિક નાગરિકો મોટી સંખ્યામાં ISI સાથે જોડાયા છે. આ વર્ષે માર્ચમાં મોસ્કોના ક્રોકસ સિટી હોલ પર આતંકવાદી હુમલામાં તાજિક નાગરિકોની સંડોવણીના પુરાવા મળ્યા હતા. આ હુમલામાં 140થી વધુ લોકોના મોત થયા હતા.
તાજિકિસ્તાનના રાષ્ટ્રપતિ રહેમાનનું કહેવું છે કે મારો ઉદ્દેશ્ય તાજિકિસ્તાનને લોકતાંત્રિક, સાર્વભૌમ, કાયદા આધારિત અને ધર્મનિરપેક્ષ દેશબનાવવાનો છે. તેમણે લોકોને તેમના હૃદયમાં ભગવાનને પ્રેમ કરવાની સલાહ આપી.
2017માં તાજિકિસ્તાનની ધાર્મિક બાબતોની સમિતિએ અહેવાલ આપ્યો હતો કે દેશમાં એક વર્ષમાં 1,938 મસ્જિદો બંધ કરવામાં આવી હતી. આ સિવાય મસ્જિદોને ચાની દુકાનો અને મેડિકલ સેન્ટરોમાં ફેરવવામાં આવી રહી છે. ISISમાં જોડાવા માટે સીરિયા અને ઈરાક જતા તાજિક નાગરિકોની સંખ્યા 2014માં 200, 2015માં 1,000 અને 2018માં લગભગ 1,000 જેટલી હતી.