નવી દિલ્હી : વડાપ્રધાન મોદી તેમના નિવાસસ્થાને પેરિસ પેરાલિમ્પિક્સમાં ભાગ લઈ રહેલા ખેલાડીઓને મળ્યા હતા અને તેમના ઉત્કૃષ્ટ પ્રદર્શન બદલ અભિનંદન પાઠવ્યા હતા. ભારતે પેરિસમાં પેરાલિમ્પિક ગેમ્સમાં કુલ 29 મેડલ જીતીને તેનું અત્યાર સુધીનું સર્વશ્રેષ્ઠ પ્રદર્શન કર્યું હતું. સ્પોર્ટ્સ મિનિસ્ટ્રી દ્વારા શેર કરવામાં આવેલા વીડિયોમાં વડાપ્રધાન મોદી મેડલ વિજેતાઓને તેમની સાથે વાત કરતા પહેલા અભિનંદન આપતા જોવા મળે છે. આ દરમિયાન ખેલાડીઓએ પીએમને ખાસ વસ્તુઓ ભેટમાં આપી હતી. પેરાલિમ્પિક સુવર્ણ ચંદ્રક વિજેતા અવની લેખારાએ વડાપ્રધાન મોદીને હસ્તાક્ષરિત ભારતીય જર્સી આપી હતી.

    પેરિસ પેરાલિમ્પિકમાં ભાગ લઈ રહેલા ખેલાડીઓ સાથેની વાતચીત દરમિયાન રમતગમત મંત્રી મનસુખભાઈ  માંડવિયા અને ભારતીય પેરાલિમ્પિક સમિતિના વડા દેવેન્દ્ર ઝાઝરિયા પણ હાજર હતા. વડાપ્રધાન મોદી પણ મેડલ પર હસ્તાક્ષર કરતા જોવા મળ્યા હતા. મહિલાઓની 10 મીટર એર રાઈફલ (SH1) માં સુવર્ણ ચંદ્રક જીતનાર અવની લેખા અને દૃષ્ટિહીન જુડોકા કપિલ પરમાર અન્ય એથ્લેટ સાથે વડાપ્રધાન સાથે ફોટોગ્રાફ લેતા જોવા મળ્યા હતા. આ દરમિયાન પરમારે પોતાના મેડલ પર પીએમ મોદીની સહી પણ લીધી હતી.

  ભારતની 84 સભ્યોની ટુકડીએ પેરિસ ગેમ્સમાં ભાગ લીધો હતો, જેણે ત્રણ વર્ષ પહેલાં ટોક્યો ગેમ્સમાં હાંસલ કરેલા 19 મેડલના અગાઉના શ્રેષ્ઠ પ્રદર્શનને વટાવી દીધું હતું. આ ગેમ્સ દરમિયાન, ભારતે પ્રથમ વખત ટ્રેક અને ફિલ્ડ એથ્લેટિક્સમાં મેડલ જીતવા સિવાય (હરવિન્દર સિંઘ દ્વારા) પ્રથમ વખત તીરંદાજીમાં ગોલ્ડ મેડલ જીત્યો હતો. ભારતે સાત ગોલ્ડ, નવ સિલ્વર અને 13 બ્રોન્ઝ સહિત કુલ 29 મેડલ જીત્યા હતા. ભારતે પ્રથમ વખત પેરાલિમ્પિકમાં 7 ગોલ્ડ મેડલ જીત્યા હતા. 

  પેરિસથી પરત ફર્યા બાદ પેરાલિમ્પિક ખેલાડીઓનું સરકાર દ્વારા સન્માન કરવામાં આવી રહ્યું છે. રમતગમત મંત્રી માંડવિયાએ ગોલ્ડ મેડલ વિજેતાઓને 75 લાખ રૂપિયા, સિલ્વર મેડલ વિજેતાઓને 50 લાખ રૂપિયા અને બ્રોન્ઝ મેડલ વિજેતાઓને 30 લાખ રૂપિયા આપ્યા હતા. મિક્સ્ડ ટીમ ઈવેન્ટ્સમાં મેડલ જીતનારા ખેલાડીઓ, જેમ કે આર્મલેસ તીરંદાજ શીતલ દેવી, જેમણે રાકેશ કુમાર સાથે બ્રોન્ઝ મેડલ જીત્યો હતો, તેમને 22.5 લાખ રૂપિયાની રકમ મળી હતી.