હરિયાણામાં વિધાનસભા ચૂંટણીના પ્રચાર વચ્ચે ભાજપમાં મુખ્યમંત્રીના ચહેરાને લઈને રાજકારણ ગરમાયું છે. કેન્દ્રીય પ્રધાન ધર્મેન્દ્ર પ્રધાને રવિવારે કહ્યું કે નાયબ સિંહ સૈની હરિયાણામાં ભાજપનો મુખ્ય પ્રધાનપદનો ચહેરો છે અને તેમના નેતૃત્વમાં પાર્ટી રાજ્યમાં જીતની હેટ્રિક કરશે. કેન્દ્રીય મંત્રીનું આ નિવેદન ત્યારે આવ્યું જ્યારે હરિયાણામાં બીજેપીના વરિષ્ઠ નેતા અને રાજ્યના પૂર્વ ગૃહ મંત્રી અનિલ વિજે કહ્યું કે જો પાર્ટી સત્તામાં પરત ફરશે તો તેઓ મુખ્યમંત્રી પદ માટે દાવો રજૂ કરશે.

    કેન્દ્રીય મંત્રી ધર્મેન્દ્ર પ્રધાનનું આ નિવેદન એટલા માટે પણ ઘણું મહત્વનું છે કારણ કે ભાજપે તેમને હરિયાણા ચૂંટણીના પ્રભારી બનાવ્યા છે. કર્નાલમાં જ્યારે પ્રધાનને અનિલ વિજના નિવેદન વિશે પૂછવામાં આવ્યું ત્યારે તેમણે કહ્યું કે પાર્ટીના કાર્યકર હોવાના કારણે વિજે આવું કહ્યું હશે, પરંતુ નાયબ સિંહ સૈની ભાજપનો મુખ્યપ્રધાન ચહેરો છે. ભાજપ રાજ્યના લોકપ્રિય નેતા સૈનીના નેતૃત્વમાં ચૂંટણી લડી રહી છે અને જો વિજય થશે તો પાર્ટી હેટ્રિક પણ કરશે.

    મુદ્દાઓનો ઉલ્લેખ કરતા ધર્મેન્દ્ર પ્રધાને કહ્યું કે કોંગ્રેસ નેતા રાહુલ ગાંધીની અનામત અંગેની તાજેતરની ટિપ્પણીઓ વિધાનસભા ચૂંટણીમાં રાજકીય મુદ્દો હશે. તેમણે દાવો કર્યો કે થોડા દિવસો પહેલા કોંગ્રેસના નેતાએ કહ્યું હતું કે જ્યારે તેમની પાર્ટી સત્તામાં આવશે, ત્યારે તે અનામત ખતમ કરશે. આ કોઈ નવી વાત નથી. તેમનું નિવેદન કોંગ્રેસની માનસિક સ્થિતિ દર્શાવે છે.

   બીજેપી નેતા અને પૂર્વ મંત્રી અનિલ વિજે કહ્યું કે આજ સુધી મેં ક્યારેય પાર્ટી પાસેથી કંઈ માંગ્યું નથી. રાજ્યના લોકો મને મળવા આવી રહ્યા છે. અંબાલામાં પણ લોકો કહે છે કે હું સૌથી વરિષ્ઠ નેતા છું, પરંતુ હું મુખ્યમંત્રી નથી બન્યો. આવા સંજોગોમાં જો આ વખતે લોકોની માંગ અને સિનિયોરિટીના આધારે પરિણામ અનુકૂળ આવે તો હું મુખ્યમંત્રી બનવાનો દાવો દાખવીશ. અનિલ વિજ છ વખત ધારાસભ્ય રહી ચૂક્યા છે અને હરિયાણાની રાજનીતિ પર તેમની મજબૂત પકડ છે.